2 तिसलूनिका 3 - Korwa Bible

अरजीगोड ञवन लगा चेड

¹ टुनुटीगरे ईंगरिकुःआ अजी-बोपोहकूतिंग, ईंग अपे एचेरे मीटोंग बड़रा अरूयिंग कतायतना। परबू ईसूराः नपाय सरवन अपे तलारे सेड़यावनेना। हनन इया परबूराः नपाय सरवन जमा ततेररे ओहेनले सेड़याव अवेय लगा अरू हना सरवन होड़कू मान मरजइतगे लगा अपे अरजीगोड ञवनपे।

² जमा होड़कू ईसू मसी एचेरे मेरकू बिसवासगेता। हनालगा बेलूर अरू कसूर होड़कू अते भगवान अले बनसावले लगा होँपे अरजीगे।

³ मनदो परबू बिसवासगेयीग इदानिया। हनालगा हाँय अपेराः बिसवासे बड़ियाड़गेता अरू कलउ अते अपेय बनसावपेता।

⁴ अले अपेले हुकुमवाता, हना अपे मनाःतना। अरू मड़ंग दिनरे होँपे मनानावगोड ञवनता। ननानाः कता बदीरे परबू एचेरे अलेके भरसा इदा।

⁵ भगवान करा इया अबूय दुलारकेरा अरू ईसू मसी करा इया कटसियाय सहावतेरा हना अगी अपेराः जीवे अगुवाइवापे लगाले अरजीतना।

कुड़हिया होड़कू अलो होयाः लगा सेताव

⁶ ने अजी बोपोहकूतिंग, परबू ईसू मसी अले एचेरेय एमेकेरा हना हातपातते नाःआ हुकुमले एमेवापेतना। अले चेडतेडपेःआ हना कता तोनोंगीग होड़ मेरेय मनाःता अरूय कुड़हीतान दो, हाँयग होड़ अते तोरेपे दोहोन।

⁷ अपे अँननपे सुसुदीतना, करा उड़ी अलेरिकुःआ ञेल सिखात होड़कूपे बड़ाँः लगा इदा। अले अपे तलारे दोहोन मेला कुड़हिया होड़कू इया मेरले दोहोगान।

⁸ अले तोनोंगीग एचेरे तेरेग जोम लगा मेरले सेनेगान, मनदो दिन रइत मुरुक मिहनइतकेडखन बुता घड़ीनले जोमा, जेमहा अपे तोनोंगीगके बोझा अलो होयाः।

⁹ अपे एचेरे संघरा असेगे लगा अलेके हातपात दोहोना। हनते हों अँननले मुरुक मिहनइतकेडखनले बुता जोमा, जेमहा अपे अलेरिकुःआ ञेल सिखात होड़कूपे बड़ाँः लगा दावपे पवाः।

¹⁰ अले अपे सुदाले दोहोन मेला नाःआ हुकुमले एमेतेरा। तोनोंगीग होड़ मेरेय बुतातान दो हाँयग होड़ जउः हों अलोय जोम।

¹¹ अले अयुमेतनाले, अपे अते अदोम होड़कू कुड़ही इदानकुःआ। हँकुःआ होड़कू अँननकू अँकूते मेरकू बुताता अरू एटाः होड़कू हों बुता मेरकू बुता ओवाकूता।

¹² परबू ईसू मसीराः ञावते ननन इयाकुःआ होड़कू, अँनकूराः बुताकू ञेल लगा अरू नपायते बुता जोम लगा अले हुकुमवाकूता अरूले मंदरावकूता।

¹³ ने अजी बोपोहकूतिंग, नपाय नपाय एचेगे लगा अहापे हदासगुः।

¹⁴ तोनोंगीग होड़कू अलेराः नाःआ चिठीराः कता मेनेरेकू मनाःतान दो, हँकुःआ होड़कू ञेल हड़ाकूपे, अरू हँकू एचेरे सेन दूर लगापे अड़ाःगोड, जेमहाकू गियुः जुवाः।

¹⁵ हनारे हों हँकुःआ होड़कू मुदइ होड़कू इया अहापे ओंगोलकू मनदो हँकू नपाय वपक बोपोहकूतापे इयापे सेतावकू।

टुटीग सलाम

¹⁶ अबू जीवरे सलसते एमेयता हाँयग परबू ईसू, अपे लगा जमा इयाःआ सलसत सगर सइटे एमे हड़ाःवापे। अरू परबू ईसू अपे जमाकू सुदाय दोहोन।

¹⁷ ईंग पउलूस इनिंग तिःईते ओजाःकेडखन अपेयिंग सलामतना। नान इया जमा चिठीराः टुटीगरे ईंगराः ञाविंग ओजाःगेता।

¹⁸ अबूरीग परबू ईसू मसी अपे जमाकूय मयावा।