2 तिसलूनिका 2 - Korwa Bible

कसूर रबूद होड़ वेगता हना बदीरे

¹ ने वपक बोपोहकूतिंग, परबू ईसू मसी कुदा वेग मेला, भगवान हाँय सुदा मिनीरेय जवारबूता हना बदीरे, अले अपे एचेरेले असेयतना,

² भगवानराः बड़रा कता होड़कूराः कताते सहे एटाः तोनोंगाः बड़राते सहे अले ञावते तोनोंगीग ओजाःतेरा हना चिठीते तोनोंगीग होड़ अपे एचेरेय कतायता, ईसू मसी कुदा वेगकिया, माःआन। दो हना बड़राते अपेराः जीव ओहेन अहापे कुंभलावगे अरू अहापे बयावगुः।

³ तोनोंग इया तोनोंगीग होड़ अपे अहाय अडिग अवेपे। होड़कू भगवान बदीरेकू अगड़-बगड़गोडता अरू कसूर रबूद होड़ अरीने एचे ञिलुः हना वरी, हना दिन ओरो होयानेना।

⁴ होड़कू, भगवान माःआनकू कतायता अरूकू सेवागेता हना जमाकूने घंटावगेता अरू हाँय कतायता, ईंग जमाकूते मरंग इदानिंगा, माःआन। हाँय भगवानराः ओड़ाःरे दुडुःकियानखन ईंग भगवान हवे, माःआने कतनता।

⁵ नाःआ कता अपे सुदायिंग दोहोन मेला अपे एचेरेयिंग कतागोड ञवना हना कता मेरपे उहियारगेतना जा?

⁶ हाँयग रबूद होड़ वेग अते चिला रोंकावकिडिया हना अपे सुसुदीतना। अरू हाँय भगवान तोल दोहोकेरा हनानाः बेलारेय एचे ञिलुःता।

⁷ नुँहू वरी होड़कू सोटो बोटो होड़ेंगतनाकू अरू हँकू भगवान मेरकू मनवेयतना। रोरोंकावीग दोहोन वरी हाँयग रबूद होड़ रोनोंकावतोय दोहोनता। मनदो रोरोंकावीग चलाः जुवाः दो,

⁸ कसूर रबूद होड़ एचे ञिलुःता। मनदो परबू ईसू ओंगकेडखन हाँयग रबूद होड़े ञेड एंडागोडेयता अरू परबू हितकाःतो सेंगेलरेय वेगतान अते हाँय लाय जुवाःता।

⁹ हाँयग कसूर रबूद होड़ कलउराः जंगरतेय एचे ञिलुःता अरू जमा बयाव जुवाः इयाःआ चिनहाकूने एचे उदुःता अरू लबरा बुता, सताय बुता इयाय एचे उदुःगोडता।

¹⁰ हाँय, सडावकेकुःआ हना सताय सरवन मेरकू दुलारगाड हँकुःआ लायतो होड़कू, जमा बरानाः बेलूर बुताकूनतेय अडिगगोडकूता।

¹¹ भगवान हँकुःआ होड़कू एचे लहकावकू लगा मीटोंग बिरुवाय वारगोडता अरू हँकू जमा लबरा बड़राकू बिसवासगेता।

¹² हँकुःआ होड़कू बेलूर बेलूर एचेय लगाकू मंजूरवाता अरू सताय सरवन ओरोकू बिसवासतेरा, जेमहा हँकू भगवानते डंडकू पनावाः।

नपाय सरवन मनावगोड ञवन इदा

¹³ ने अजी बोपोहकूतिंग, सुद बिरुवाराः बुताते अपेराः जीव सुदयना अते, अरू परबू ईसू मसीराः सताय सरवनरेपे बिसवासगेतान अते, भगवान अपे मड़ंगाः जोःओ इयाय सडावकेडपेःआ। हनालगा अपेय दुलारपेतना हाँयग भगवान एचेरे, अले अपे बदीरे जमा बेलाले जागगोड ञवन लगा इदा।

¹⁴ अले अपे एचेरे ईसू मसीराः नपाय सरवनले कता उदुःतेरा अरू हना सरवनते भगवान, अपे ईसू मसीराः मान मरजइतरे मेसान लगाय राःकेडपेःआ।

¹⁵ हनालगा ईंग अजी बोपोहकूतिंग, अपे ईसू मसीराः बिसवासरे बड़ियाड़गुःपे अरू अले अपे सुदा दोहोन मेलाले चेडतेडपेःआ अरू चिठीरेले ओजाःतेरा हना जमा कताकून मनावगोड ञवनपे।

¹⁶ दो अबूय दुलारकेरा, अरू मयावाडबूखन सगर सइट लगा अबू जीवे हड़ियड़गोतेडा, अरू नपाय असराय एमेकेरा अबूरीग अपांग भगवान अरू परबू इनीसू मसी,

¹⁷ अपेराः जीवे हड़ियड़गे, अरू जमा इयाःआ नपाय बुतापे बुता अवेय लगा अरू जमा नपाय बड़रापे बड़रा अवेन लगाय बड़ियाड़गोडपे।