2 पतरस 2 - Korwa Bible

लबरा चेडदार होड़कू बदीरे सेताव

¹ मड़ंग जूगरे भगवानराः बड़रा लबरातेकू कताया हँकुःआ होड़कू दोहोना। हनन इया अपे तलारे हों भगवानराः बड़रा लबरातेकू कतायता हँकुःआ होड़कू वेगता। हँकू ओनोक दनंगरे लाय एंडागेराः सरवनकू अगूयता। अँननकूय सडावकेरा हाँयग परबू होंकू आड-बेकारवायता, अरू हना अते हँकू अँननकू अँकू ओहेनकू लाय एंडा जुवाःता।

² अरू मुरुक बगरा होड़कू हों हँकूराः सनहा-सनहिःआ दूरकू साबता, अरू हँकुःआ होड़कू अते, होड़कू सताय दूरकू बदीगेता।

³ हँकुःआ होड़कू लुभिया होड़कू इदानकुःआ। हनालगा हँकू बोनाव बड़राते अपेराः आन-धानकू अडिग जोमता। मनदो हँकुःआ होड़कू डंडियावकू लगा, भगवान मनाड़ंगतेय तोल दोहोकेरा हना डंडियाव ओरोय कुबेरतेरा, अरू भगवान हँकूय लनाय एंडाकूता।

⁴ उहियारगेपे, मनाड़ंग जूगरे सेरमो देसरिकुःआ अदोम बराहीलकू कसूरतेरा दो, हँकुःआ बराहीलकू हों डंडियाव अते भगवान मेरेय अड़ाःगाडकू। मनदो हाँय हँकू पतालपूररेय सोलोंगगोतेडकुःआ, अरू फड़ियावराः दिन वरी मुरुक अंदरात डोडहारे सिकिड़ीते तोलकेडकूखने सोलोंगगोतेडकुःआ।

⁵ अरू ननन इया भगवानराः कता मेरकू मनावगान, हँकुःआ मड़ंग जूगरिकुःआ होड़कू हों, डंडियावकू अते भगवान मेरेय अड़ाःगाडकू। हनमेला भगवानराः सताय कता बदीरेय परसारतेरा हाँयग नूह सुदा एटाः सातगोटोंग होड़कू हों पुरा दाः अते भगवान बनसावतेडकुःआ।

⁶ सदोम अरू अमोरा सहररिकुःआ होड़कू, अरीनकू ओनोबगुः वरी सेंगेलते भगवान लो एंड़ातेडकूखने डंडियावतेडकुःआ। दरवाःआ हना दिनरे भगवानराः कता मेरकू मनाःता हँकुःआ होड़कू लगा हना डंडियाव मीटोंग चिनहा इयाय दोहोकेरा।

⁷ हाँयग बेगर गारबारीग होड़ लूत हना जूगरिकुःआ बेलूर होड़कूराः बेलूर बुताकून ञेल अयूम घड़ीन दिनो दिन अनँयगराः जीव मुरुक कुभलाःआ।

⁸ अरू भगवान हना जूगरिकुःआ बेलूर होड़कूराः सनहा-सनही बुताते, अनँयग जीव मुरुक हुडिंगयना हाँयग बेगर गारबारीग होड़ लूते सडावतेरा दो,

⁹ हाँयकू सेवाता हँकुःआ होड़कू भगवान कटसिया अतेय सडावकू लगा अरू बेलूर होड़कू फड़ियावराः दिन वरी डंडियावगोड ञवन लगा होंय सुदीयता।

¹⁰ अँननकूराः बेलूर बुता ओंगोल इयाकू सलाःता अरू हातपात होड़कूकू आड-बेकारवाता, हँकुःआ होड़कू बदीरे नाःआ कता सताय हवे। हँकू बड़वारताकू अरू अँननकूराः मनबिदियारेकू दोहोनता। हँकू सेरमो देसरिकुःआ बराहीलकू हों ओपताकू लगा मेरकू बोरता।

¹¹ मनदो नँकुःआ होड़कू अते मरंग अरू जंगरदार इदानकुःआ हँकुःआ सेरमो देसरिकुःआ बराहीलकू हों भगवान मड़ंगरे हँकुःआ बेलूर बराहीलकू बदीरे ओपता बड़रा मेरकू कतायता।

¹² हँकुःआ होड़कू बोको जानरकू इया बेगर ओंगोलते इदानकुःआ अरू ञेड एंडाकू लगाकू होयाकिया। हँकू मेरकू सुदीयता हनानाः कताकून बदीरे एटाः होड़कूकू ओपताता अरू हँकू पहाड़ जानरकू इयाकू लाय एंडा जुवाःता।

¹³ हँकू एटाः होड़कू सुदा बेलूरकू एचेकेरा अरू भगवान हँकू लगा बेलूरे एचे कुदायता। हँकू दिनीने दिनरे बेलूर बुता बुता घड़ीन जोम-ञूय लगाकू ननायगुःता। हँकू अपे सुदाकू जोम ञूयता दो अपे लगा दगी अरू जोरोड इयाकू दोहोनता।

¹⁴ हँकू जमा बेला सनहा-सनही ओंगोलरेकू दोहो ञवनता, अरूकू कसूरगोड ञवनता। हँकू बुकली-बोको होड़कू एचे कसूरकू लगाकू लहरावकूता। हँकू लुभिया ओंगोल लगाकू हेवायना अरू भगवान अगीते सती-सरापतो इदानकुःआ।

¹⁵ हँकू सताय दूर अड़ाःकेडखनकू एटाःयना अरू हँकू कसूरकेडखन ढिबुवा पवाः लगाय मंजूरयना हाँयग बओररीग बेटात बिलामराः दूररेकू सलाःतना।

¹⁶ मनदो मीटोंग गदहा, होड़ इया, भगवानराः बड़रा कता होड़ बिलाम सुदा बुतुड़ुनेनखन हाँयराः बउड़ाहाकू एचेयता हना इयाःआ बुता अतेय रोंकावतिरिया।

¹⁷ हँकुःआ होड़कू दाः सूती अंजेडतो इया अरू गड़रा घटा बदरी इया इदानकुःआ। अरू हँकुःआ होड़कू भगवान अनंदरा अंदरा पेंदारेय एचे दोहोकूता।

¹⁸ हँकू बेगर लूरराः बड़वार कताकूनकू कतायता। अरू हँकूराः सनहा-सनहिःआ बुताते, कसूर होड़कू अते निःईमिन लगाकू बनसावयना हँकुःआ होड़कू, देह दगलीकूनराः चाहाःतेकू एचे बझावगोडकूता।

¹⁹ तोनोंगाः कसूरे कनासूरगोड ञवनता हाँयग होड़, हनानाः कसूरराः बेगारी होड़े बड़ाँव जुवाःता। अरू हँकू एटाःकू अजइतकू लगाकू जबानगेता, मनदो अँननकू हनानाः कसूरराः बोझारे इदानकुःआ।

²⁰ होड़कू अबूरीग परबू अरू सडावदार ईसू मसीकू सुदीकेडखन, चउंदीसराः जमा बरानाः बेलूर बुताकून अतेकू बनसावनेन तयोमरे, हँकू अरू हनानाः कसूरकूनरेकू बझाव जुवाःतान दो, हँकूराः हलाइत मड़ंग अते अरू बगरा बेनेलूर जुवाःता।

²¹ हँकू भगवानराः सताय अरू बेगर गारबारतेःआ दूर सुदीकेडखन सुद जीव जियाःराः हुकुमकू आड-बेकारवा अते, हँकू हनानाः दूर कहियो अहाकू सुदीकेः दो, हँकू लगा अरू नपाय दोहोकुःआ।

²² हँकू लगा मड़ंगराः कता सताय इदा, “कुतू अनँयगराः उलात अरूय जड़ाःगेता,” अरू “ऊमतो सुकरी हनानाः सिकलारे अरूय घोलंडाव लेटाःता।”