2 कुरिंती 9 - Korwa Bible

¹ भगवानरिकुःआ सुद होड़कू लगा बिहिरी उतराव बदीरे अपे एचेरे ईंग ओओजाः लगा कोवानेःआ।

² अपे संघरावाकू लगा ओसताज इदानपेःआ हनायिंग सुसुदीतना। अरू ईंग मकिदुनिया राइजरिकुःआ बिसवासी होड़कू एचेरे अपे बदीरे नपायिंग कताकेरा, कोनालोम वरीते अकाया राइजरिकुःआ होड़कू संघरावाकू लगा ओसताज इदानकुःआ, माःआन अरू अपे ओसताज इदानपे अते हँकू होंकू ओसताजयना।

³ ईंग अपे बदीरेयिंग कताकेरा हना सदाःआ अलो होयाः लगा अरू ईंग कताकेरा हनन इया अपे सपड़ावतोपे दोहोन लगा बिसवासी बोपोहकूतिंग वारतना।

⁴ दो मकुदिनियारिकुःआ बिसवासी होड़कू अते तोनोंगीग ईंग सुदाकू वेग अरू अपे सपड़ावतो मेरकू ञेलपे दो, चुवामन जा अले मुरुक भरसा घड़ीनले दोहोन अते, अले अरू अपे होँपे गियू जुवाःता।

⁵ हनालगा बिसवासी बोपोहकूतिंग मड़ंग अपे एचेरे वारकू लगा ईंगके नपाय लगावनेना, जेमहा अपे मिनी जीवते एमेय लगापे जबानकेरा हना बिहिरीपे जुमावका। दो अपेराः हना बिहिरी कुरबुरावकियानखन कोवान मनदो मिनी जीवकियानखनपे जुमाव अवेय।

मिनी जीवतेपे बिहिरी एएमे लगा इदा

⁶ नाःआ कता उहियारगेपे, “गुनमिने वेरता, हाँय गुनुनमिने ईरता, मनदो बगराय वेरता, हाँय बनागराय ईरता।”

⁷ भगवान बहालते एमेयीग होड़ सुदाय दुलारता। हनालगा अपे रेनहाते सहे बार जीवकियानखन अलोपे एमेय। मनदो अपे अनपेराः इंदरीरेपे ओंगोल दोहोकेरा हिनिनमिनपे एमेय।

⁸ भगवान अपेराः जीव-जहन जमालेःआतेय अहाल-बहाल अवेयता, जेमहा अपे जमा कताकूनरे, जमा बेला, अपेराः जमा जरूरइत जिनिसकून दोहोन अते, अपे जमा इयाःआ नपाय बुता बुता लगापे उडु-बुडू जुवाः।

⁹ भगवानराः कागदरे ओजाःतो इदा, “हाँय गरीब होड़कू बेगर किराटतेय हटिंगवाडकुःआ, अरू हाँयराः नपाय बुता सगर सइट दोनोहो जुवाःता।”

¹⁰ भगवान वेवेर होड़ लगा बिहाने एमेता अरू जोम जिनिस होंय एमेता। हाँय अपे हों बिहाने एमेवापेता अरूय बनाड़हावगोड ञवनता, जेमहा जरूरइतरे इदानकुःआ हँकुःआ होड़कू लगा अरू नाय नपायतेपे एमे अवेय।

¹¹ दो भगवान अपे जमालेःआतेय उडु-बुडूगोडपेता, जेमहा अपे जमा बेला देनहारकूपे बड़ाँव अवेन। अरू अले अपेराः बिहिरीराः जरूरइत इदा हँकुःआ होड़कूले एमेवा दो हँकू भगवानकू धनियाबादता।

¹² अपे नाःआ इया बिहिरीपे उतरावता हना अते भगवानरिकुःआ सुद होड़कूराः जरूरइत एकला मेरपे पुरावगेता, मनदो मुरुक एटाः होड़कू हों हना अते भगवानकू धनियाबादता।

¹³ नाःआ सेवाते होड़कू सुदीगोडता अपे मसीराः नपाय सरवन बिसवास घड़ीनपे मनावगोड ञवनतना अरू अपे गरीब होड़कू अरू एटाः बिसवासी होड़कू संघरावाकू लगा ओसताज इदानपेःआ, माःआन। अरू हना अते हँकू भगवानकू जागता।

¹⁴ भगवान अपे मुरुके मयावापेतना। हनालगा हँकुःआ होड़कूराः दुलार जोरोःता अरू अपे लगाकू अरजीगोड ञवनता।

¹⁵ अबू ओरोबू ओंगोल तजाः अवेतेरा हना भगवान अबू लगाय एचेयकेरा अरू हना अते हाँयराः धनियाबाद होनोया ञवन।