2 कुरिंती 8 - Korwa Bible

भगवानरिकुःआ सुद होड़कू लगा बिहिरी

¹ ने अजी बोपोहकूतिंग, मकिदुनिया राइजराः कलसियारिकुःआ होड़कू भगवान मयावाडकुःआ हना सरवन अपे सुदीगोड लगाले चहाःतना।

² हँकू मुरुक कटसियाकू सहाव पारतेरा अरू मुरुक गरीबकू दोहोना। हनारे हों हँकू मुरुक बनाहालते एटाः होड़कूकू संघरावाःआ।

³ ईंग हँकू बदीरे हिदइतिंग एमेयता, हँकू एमे अवेया हनाते मुरुक बगरा मिनी जीवकियानखन बिहिरीकू एमेबाःकातेरा।

⁴ एरुसलेम सहररे इदानकुःआ भगवानरिकुःआ सुद होड़कूराः सेवारे बिहिरी एमेवाडखन मेसान लगा दोंगकू पवाः लगा अले एचेरे घड़ी घड़ीकू गोड़न-पइयना।

⁵ अरू हँकू अलेराः ओंगोल अते मुरुक बगराकू एमेतेरा। हँकू अँननकू अँकू भगवानराः ओंगोल इया मड़ंगरे भगवान एचेरे अँननकू जिमायान अरू हना तयोमरे अले होंकू जिमागोतेड।

⁶ तिनितूस हमा नाःआ संघरागेराः बुता अपेतेय बुँहड़ीतेरा। हनालगा अपे बुँहड़ीकेरा हना बिहिरी उतरावराः बुता पुरावगे लगा अले हाँयले असेकेरा।

⁷ अपे बिसवासरे बड़ियाड़ इदानपेःआ, नपायतेपे बुतुड़ुता अरू कनहूनदारकू इदानपेःआ। अपे जमालेःआ लगा ओसताज इदानपेःआ अरू अले मुरुकपे दुलारलेता। नाःआ जमा कताकूनरे अपे उडु-बुडू इदानपेःआ। हनन इया अपे नाःआ बिहिरी उतरावगेराः बुतारे होँपे उडु-बुडू इदीन।

⁸ ईंग अपे मेरिंग हुकुमवापेतना, मनदो एटाः कलसियारिकुःआ होड़कू बिहिरीकू एमे लगा ओसताज इदानकुःआ अरू हनानाः बिहिरी एमे बदीरे अपेराः दुलार सताय इदा जा कोवान हना अउल-तउलगे लगा नाःआ इयायिंग कतायतना।

⁹ अपे सुसुदीतना अबूरीग परबू ईसू मसी मयावाडबुःआ। हाँय सेरमो देसरे गिरहते दोहोन हों हाँय अपे लगाय गरीबयान, जेमहा हाँय गरीबगुः अते अपे भगवान बदीरेपे गिरहत जुवाः।

¹⁰ नाःआ कता बदीरे अपेराः नफा लगा ईंग मीटोंग सलाहिंग उदुःता। कोनालोमते बिहिरी उतराव लगा एकला कोवान मनदो हान जुमावगे लगा हिछा हों मड़ंगरे अँननपे एचेरे दोहोना।

¹¹ दो नुँहू हनानाःपे बुता पुराव, जेमहा अपेराः हिछा इया पुरावगे लगा सपड़ावतो इदानपेःआ हनन इया अपेराः पुंजी पसर इयापे एमे अवेय।

¹² तोनोंगीग बिहिरी एमे लगा हाँयराः हिछा इदान दो, आँयग एचेरे कोवानेःआ हना अते कोवान मनदो हाँय एचेरे इदा हनानाः अतेय एमेगोडता दो भगवान हनाए मनेवाता।

¹³ एटाः होड़कू अहाल-बहाल जुवाः अरू अपे बोझारेपे दोहोन माःआन अले मेरले चहाःतना। मनदो अपे बरोबइरपे दोहोन लगा ईंग चहाःतना।

¹⁴ नुँहू अपे एचेरे बगरा इदान अते हँकूराः हुडिंग बगरारे संघरापे एमे अवेवाकेकुःआ, जेमहा हँकू एचेरे बगरा होयाःतान मेला अपेराः हुडिंग बगरारे संघराकू एमे अवेवापे। ननन इया अपे जमाकू बरोबइरपे दोहो अवेनता।

¹⁵ भगवानराः कागदरे ओजाःतो इदा, “बगराय अतिंग अदेरकेरा, हाँय एचेरे बगरा ओरो दोहोनेना, अरू गुनमिने अतिंग अदेरकेरा, हाँय एचेरे हुडिंग बगरा ओरो दोहोनेना।”

बिहिरी अगूगे लगा पउलूस तितूसे वारतेरा

¹⁶ अपे बदीरे इनिंग इया ओंगोल तितूस एचेरेय एमेकेरा हाँयग भगवानिंग धनियाबादगेयतना।

¹⁷ अपे एचेरे सेन लगा अले कतावातेरीग दो हाँय ओहेने सपड़ावनेना। अरू अले कतातेरा हना अते एकला कोवान, मनदो हाँय अनँयगराः हिछाते अपे एचेरे मुरुक बहालतेय सेनेकिया।

¹⁸ अरू हाँय सुदा अले मी होड़ बिसवासी होड़ले वारकेरा। जमा कलसियारिकुःआ होड़कू नपाय सरवन परसार बदीरे हाँयकू भल-भलायवाता।

¹⁹ निनमिनाः एकला कोवान, कलसियारिकुःआ होड़कू हाँयकू सुनावकेरा, जेमहा अले बिहिरी इदी अटू लगाले सेन मेला, हाँय हों अले सुदाय सेन। अरू अलेराः नाःआ सेवाते परबूराः मान मरजइत होयाःता अरू अले होड़कू संघरावा लगा सपड़ावतो इदानलेःआ माःआनले उदुः अवेय।

²⁰ अपे मिनी जीवकियानपे एमेकेरा हना बिहिरी इदी अटूराः सेवाले सेवाता दो हना बदीरे तोनोंगीग अले अहाकू बदीले लगा सवासितीले दोहोनता।

²¹ अरू अले परबू ननायगुः लगा एकला कोवानेःआ, मनदो होड़कूराः ओंगोलरे हों नपाय एचे लगा दोंगले जोह ञवनता।

²² अले मी होड़ होड़, हँकिन सुदाले वारेयतना। अरू अले घड़ी घड़ीले अंदजावतिरिया अरू हाँय मुरुक कताकूनरे ओसताज इदानिया माःआनले सुदीगोतेडिया। अरू अपे एचेरे हाँयके मुरुक भरसा इदा। हनालगा हाँय अनउर ओसताज इदानिया।

²³ तितूसराः बदीरेपे होंबरे दो हाँय ईंगरीग संग अरू अपे लगा ईंगरीग सेवा देंगवा होड़ हवे। अरू एटाः बार होड़किन कलसियारिकिनाः बराहीलकिन हवे अरू हँकिन मसीकिन मान मरजइतता।

²⁴ हनालगा अपे एटाः होड़कूपे दुलारता हनन इया हँकुःआ होड़कू होँपे दुलारकू। दो अपे बदीरेले भल-भलायनेना हना हँकू सताय हवे माःआनकू सुदीबाःगोडता, अरू अपे सतायतेपे दुलारतना माःआन जमा कलसियारिकुःआ होड़कू होंकू सुदीबाःगोडता।