2 कुरिंती 7 - Korwa Bible

¹ ने ईंगरिकुःआ वपक बोपोहकूतिंग, भगवान अगीते अबू लगा नाःआमिन जबानकून इदान दो, अबू अबूराः देह अरू बिरुवा मइलावगोडता हना जमालेःआतेबू सुदगे अरू भगवानराः अकूस मनाः घड़ीन जमालेःआतेबू सुद इदीन।

होड़कू पसताःआ अते पउलूस बहालगुःतना

² अले बदीरे अपेराः दुलारपे उदुःगोड। अले तोनोंगीगराः कहिसाः मेरले आडगरा, तोनोंगीग सुदा बेलूर मेरले एचेगरा अरू तोनोंगीग मेरले अडिगगरा।

³ नाःआ कता अपे बदीगे लगा मेरिंग कतायतना। ईंग मड़ंगरेयिंग कताकेरा, अले अपे मिनी जीवतेले दुलारपेतना, जेमहा अले अपे सुदा गुजुः अरू जियाः लगा सपड़ावतो इदानलेःआ, माःआन।

⁴ ईंग मीटोंग ऊबमिनाः कता हों ईंग जीवरे दोहोकेडखन अपे एचेरे मेरिंग कता उदुःगेतना। ईंग अपे बदीरे भल-भलायतो इदानिंगा। अपे बदीरे ईंग अहाल-बहाल इदानिंगा अरू ईंगराः जमा कटसियारे ईंग मुरुक बनाहालते इदानिंगा।

⁵ अले मकिदुनिया देसरेले सेनेड मेला अले मेरले लोड़ोगान, मनदो चइरो गतरते अलेके कटसिया होयाःआ। होड़कू अले मुरुककू संतावलेःआ अरू अलेराः जीव कुहकाः घड़ीन हदराःआ।

⁶ मनदो हदरावतो होड़कू डीड़े एमेवाकूता हाँयग भगवान अले एचेरे तितूस वारकेडखन अलेराः जीवे अहाल-बहालगोतेड।

⁷ तितूस अले एचेरेय वेजेड दो अलेराः जीव अहाल-बहालयान, अरू हाँय अपे सुदाय दोहोन मेला हाँयराः जीव होँपे अहाल-बहालगोतेड। हाँय अपे बदीरेय कतातेरा, हँकू आम बदीरेकू उसाडगुःतना अरू हँकूराः जीव हुडिंग जुवाःता अरू आम लगा मुरुक ओसताजकू दोहोनता, माःआन हाँय अले एचेरेय कता उदुःतेरा दो ईंगराः जीव अनउर अहाल-बहालयान।

⁸ ईंग अपे लगायिंग ओजाःतेरा हना चिठीते अपेराः जीव मुरुकिंग हुडिंगगोतेड। दो ईंग हना बदीरे मड़ंगरेयिंग पसताःआ। मनदो हना चिठीते अपेराः जीव गुनमिन बेला वरी हुडिंगनेना। हनालगा ईंग चिठीयिंग ओजाःतेरा हना बदीरे नुँहू मेरिंग पसताःतना।

⁹ नुँहू ईंग बहालगुःतना। अपेराः जीविंग हुडिंगतेरा हनालगा कोवान, मनदो अपे जीव हुडिंगनेना अते अपे भगवानराः ओंगोल इया जीवपे कुदाकेरा अरू अले अते अपे जीवरे तोनोंगाः हनी मेर होयागना।

¹⁰ तोनोंगीग होड़राः जीव भगवान अगीते हुडिंग जुवाःतान दो हना हाँयराः जीव बदलावगोडता अरू हाँय सडाव जुवाःता। हनते अरू हाँयके पसताः मेर पराःता। मनदो चउंदीसरिकुःआ होड़कू अगीते तोनोंगीग होड़राः जीव हुडिंग जुवाःतान, मनदो अनँयगराः कसूरकून मेरेय कबुलाःतान दो हाँय गुनुजुःए पवाःता।

¹¹ ईंगराः चिठी बछावनेनखन भगवान अगीते अपेराः जीव हुडिंगनेना दो ओंगलेपे अपेराः जीवरे चिला नफा होयाकिया? अपे बेगर गारबारते इदानकुःआ माःआन उदुःगुः लगापे कुरनिसगेःआ, अपे रीसनेना अरूपे बयावयना, अपे मुरुक ईंग ञेल लगापे उसाडनेना, अपे ओसताजपे दोहोना अरू कसूर होड़कू डंडियावकू लगा सपड़ावतोपे दोहोना। अपे जमा बेला नाःआ कतारे बेगर गारबार होड़कू इदानलेःआ माःआनपे उदुःबाःगोतेडा।

¹² गारबारकेरा हाँयग होड़राः ओजाहते सहे आडकिरिया हाँयग होड़राः ओजाहते ईंग नाःआ चिठी मेरिंग ओजाःगरा। मनदो भगवान मड़ंगरे अले बदीरे अपे ओसताज इदानपेःआ माःआन अपे अँननपे सुदीबाःगोड लगा नाःआ चिठीयिंग ओजाःकेरा।

¹³ नाःआ अते अलेराः जीव अपे बदीरे मुरुक हड़ियाड़यना। अलेराः जीव हड़ियाड़यना अरू तितूसराः जीव हों अपे अते अहाल-बहालयान अते अलेराः जीव अनउर हड़ियाड़यान।

¹⁴ अपे बदीरे हाँय एचेरे ईंग मुरुक ईंग भल-भलायनेना। अरू अपे ईंग मेरपे गियू ओवाडिंगा। अले अपे बदीरेले कतातेरा हना जमाकून सताय दोहोना अरू हनन इया अपे बदीरे तितूस एचेरेले भल-भलायनेना हना हों सनाताय होयायान।

¹⁵ अपे अकूस मनाः घड़ीन तितूस सुदापे जुमावनेनखन हाँयराः जमा कताकूनपे मनावनेना माःआने उहियार अगूयता अरू हनाते अपे बदीरे हाँयराः दुलार अनउर बगरा इदीनता।

¹⁶ ईंग अपे एचेरे जमा बरानाः लगायिंग भरसा अवेयता। हनालगा ईंग जीव मुरुक बहाल इदा।