2 कुरिंती 6 - Korwa Bible

¹ अले भगवानरिकुःआ सेवा देंगवा होड़कू इदानलेःआ अते अपे एचेरेले असेयतना, भगवान अपे मुरुके मयावाडपेःआ, हना अपे जीवरे अहवइर अलोपे होया ओवा।

² भगवान नाःआ इया अनँयगराः कागदरेय कताकेरा, “ईंग तोल दोहोतेरा हनानाः बेला अपे मयावाडखनिंग अयूमतेरा, अरू सडावराः दिनरे अपेयिंग संघरावातेरा।” दो अपे ईंगपे अयूम, दोहोत बेला ननानाः हवे अरू सडावराः दिन तिनिसिंग इदा।

कटसिया बेलारे पउलूसराः हिदइत

³ अलेराः सेवा बेगर गारबारते दोहोन लगा अले तोनोंगीग होड़राः बिसवास दूर मेरले रेडता।

⁴ मनदो अलेराः नपाय बुताते होड़कू सुदीबाःगोडता, हँकू भगवानरिकुःआ सताय सेवकियाकू हवे, माःआन। अले सिकिसतारे अरू संतावरे अरू गरीबगुःरे मुरुक सहाव घड़ीनले दोहोना।

⁵ होड़कू अले गुरुंदतेकू ञेडतेडलेःआ अरू जेहेलरेकू सींगतेडलेःआ अरू अले बदीरेकू हलो-गदोड़िःआ। अले मुरुकले मिहनइतगेःआ अरू तोनोंग रइतरे बेगर अपीगते अरू रंगेगतेले दोहोना।

⁶ नाःआ जमा अले जीवरे होयानेना। हनारे हों अले सुद जीवले जियाःआ, अरू भगवानराः सरवनले ओंगोल बुझाःआ अरू सहाव घड़ीन सुधा होड़कूले दोहोना। अले एचेरे सुद बिरुवा दोहोनता अरू सतायते होड़कूले दुलारा।

⁷ अले भगवानराः जंगरते सताय कताले कता उदुःगेःआ अरू बेगर गारबारतेःआ जीव जियाः लगा बनर तिःईरे अवजारकून साबतोयीग होड़ इया इदानलेःआ।

⁸ तोनोंग बेला होड़कू अलेकू मान मरजइतलेःआ अरू तोनोंग बेलाकू बेग-हतावालेःआ, तोनोंग बेला अलेकू बदीलेःआ अरू तोनोंग बेला अलेकू भल भलवालेःआ। अले जमा बेला सतायले कताया हों अडिग होड़कू माःआनकू ओंगोललेःआ।

⁹ अनसिनहार होड़कू इया इदानलेःआ हों जगल इदानलेःआ, गोएगतो इया इदानलेःआ मनदो जिनियत इदानलेःआ, ञेडतेला होड़कू इदानलेःआ मनदो ञेड एंडात कोवालेःआ।

¹⁰ अले फिकिराः होड़कू इया इदानलेःआ, मनदो जमा बेला बनाहालतेले दोहोनता, गरीब होड़ इया इदानलेःआ मनदो मुरुक होड़कूले गिरहतगोडता। अले एचेरे कहिसाः कोवानेःआ, मनदो अले एचेरे जमालेःआ इदा।

¹¹ ने कुरिंती सहररिकुःआ वपक बोपोहकूतिंग, अले अपे एचेरे जमालेःआले कता उदुःकेरा अरू मिनी जीवतेले अलार-दुलारकेडपेःआ।

¹² अले अपे गुनहोन मेरले दुलारगडपेःआ, मनदो अपे गुनहोनपे दुलारकेडलेःआ।

¹³ ईंगरिकुःआ लइंकू इया ओंगोलकेडपेखनिंग कतायतना, अले मिनी जीवकियानखनले दुलारपेता हनन इया अपे हों मिनी जीवकियानखनपे दुलार बदलाले।

खाप मेर जोमता हँकुःआ होड़कू सुदा अलोपे मेसान

¹⁴ खाप मेरकिन जोमता हँकिनाः बएलकिनते हाड़ मेर सी अवेनता। दो अपे हों बेगर बिसवासी होड़कू सुदा मेसाकियानखन खाप अलोपे जोम। गारबार होड़कू अरू बेगर गारबार होड़कूराः खाप जोमता जा? सहे मरसल अरू अंदरा मिनीरे खापगुःता जा?

¹⁵ मसी अरू कलउराः खाप जोमता जा? अरू बिसवासी होड़कू बेगर बिसवासी होड़कू सुदा चिला खाप जोमता?

¹⁶ भगवानराः ओड़ाः अरू मुरतीकून तोनोंग इया मेसानता जा? भगवान कताकेरा, “ईंग हँकूराः इंदरीरेयिंग बसाःता, अरू हँकू एचेरेयिंग सेन दूरता, ईंग हँकूरीग भगवानिंग होयाःता, अरू हँकू ईंगरिकुःआ होड़कूकू दोहोनता।” हनन इया अबू जीयत भगवानराः ओड़ाः हवे।

¹⁷ हनालगा भगवान कतातेरा, “अपे हँकुःआ होड़कूराः तलाते उडुंग जुवाःपे, अरू हँकू अते एटाः जुवाःपे। अरू सुद कोवानेःआ हना तोनोंगाः जिनिस अलोपे टोँवावगे। दो ईंग अपेयिंग समुटावपेता।”

¹⁸ अरू, “ईंग अपेरीग अपांगिंग होयाःता, अरू अपे ईंगरिकुःआ बेटा बिटीकूपे होयाःता।” नाःआ अगम जंगरदार परबू भगवानराः सरवन हवे।