2 कुरिंती 5 - Korwa Bible

नँवा देह लगाबू कुहकाव ञवनतना

¹ ईंगरिकुःआ अजी बोपोहकूतिंग, चउंदीसरे अबूराः देह बडे दिन मेर दोहोनता हना कुंबा इया इदा। मनदो हान लाय एंडा जुवाः दो, भगवान अगीते सेरमो देसरे अबू लगा मीटोंग ओड़ाः इदा। सगर सइट लगा दोहोनता हना ओड़ाः होड़कूराः तुलात ओड़ाः ना लवे।

² दो अबू नाःआ देहरेबू दोहोन मेला सेरमो देसराः देह पवाः लगा उसाडगुः घड़ीनबू कुहकावगोड ञवनता।

³ अरू अबू हना देहबू पवाव जुवाः अते, बेगर धउरते अबूराः बिरुवा ओरो दोहोनेना।

⁴ अरू अबू नाःआ कुंबा इयाःआ देहरे इदानबू मेला कुहकाः घड़ीन बोझारे इदानबुःआ। नाःआ देह अबू अअटू लगा मेरबू चहाःता, मनदो सेरमो देसराः देह पवाः लगाबू चहाःतना, जेमहा गुजुः इयाःआ देह ओरो टुटीगनेना हना देहते बदलाव जुवाः।

⁵ अरू ननानाः ओंगोलते भनगवान अबू लगा नँवा देहे संजोड़ दोहोकेरा, अरू हनाराः बयान इया हाँय आँयगराः सुद बिरुवाय एमेवाडबुःआ।

⁶ हनालगा अले डीड़गार इदानलेःआ अरूले सुसुदीतना नाःआ देहरे इदानले मेला परबू ईसू अते तोरेरे इदानलेःआ।

⁷ नुँहू अले ञेनेल मेड मेरले सलाःतना, मनदो अले बिनिसवासकेडखनले सलाःतना।

⁸ अले डीड़गार इदानलेःआ अरू नाःआ देह अटू एंडाकेडखन परबू सुदा बसाः लगाले तरसाःतना।

⁹ हनालगा अले नाःआ देहरेले दोहोन सहेले अटू एंडा अटू, हाँय ननायगेय लगा एकला तक-तकावतो इदानलेःआ।

¹⁰ अरू ईसू मसी अबू जमाकूय फड़ियावता। हना दिन अबू नाःआ देहरे दोहोन मेलाबू एचेकेरा हना नपाय सहे बेलूर बुताकूनराः इमान पवाः लगा हाँयराः गदी मड़ंगरे अबू जमाकू चड़ाँन पराःता।

ईसूते भगवान सुदा एचे हेल-मेल सेवा

¹¹ अले परबूराः अकूसले मनाःता। हनालगा अले होड़कू हाँय अगी कुदाकू लगाले मंदरावकूता। अरू भगवान अले बदीरे जमाकून नपायतेय सुदीयतना अरू हान अपे हों सुदीगोडपे लगाले असरातना।

¹² अले अँननले बदीरे भल भलायगुः लगा मेरले कुरनिसगेतना। मनदो अपे अले बदीरेपे भल भलाय अवेन लगा दोंगले एमेवापेतना, जेमहा इंदरीराः सताय कतारे कोवान मनदो मेड अंजउड़ी बुता बदीरेकू बड़वारता हँकुःआ होड़कूपे कता कुदा अवेवाकू।

¹³ हँकू बउड़ांग इदानकुःआ, माःआनकू कताय दो अले भगवान लगा बउड़ांग इदानलेःआ, अरू सुरतारे इदानलेःआ दो अँननपेराः नफा लगा इदानलेःआ।

¹⁴ जे हों सकालाःले एचेयता हना अले मसीराः दुलारतेले एनेचेयता अरूले सुदीबाःगोडता, मसी जमाकू लगाय गोएगनेना, माःआन। हनालगा अबू जमाकू हाँय सुदाबू गोएगयना।

¹⁵ अरू मसी जनामाकू लगाय गोएगनेना दो जीयत इदानकुःआ हँकुःआ होड़कू अँननकू लगा कोवान, मनदो भगवान गोएगतो अतेय जियाव रेमतिरिया हाँय लगा जियाः इदा।

¹⁶ नुँहू वरीते होड़कूराः ओंगोल इया तोनोंगीग ओरोले फड़ियावतिरिया। मड़ंगरे मसी बदीरे चउंदीसरिकुःआ होड़कू फड़ियावगेःआ हनन इया अले होंले फड़ियावतिरिया। मनदो नुँहू वरीते अले हनन इया ओरोले फड़ियावतिरिया।

¹⁷ तोनोंगीग मसी सुदाय मिनीयान दो हाँयराः जीव नँवायना। हाँयराः जुना जीव टुटीगयना अरू जमालेःआतेय नँवायना।

¹⁸ नाःआ नँवा जुवाःराः बुता भनगवान हमा एचेयतना। अरू हनाँय ईसू मसीते अनँयग सुदाय हेल-मेलगोतेडबुःआ अरू हेल-मेलराः सेवा अलेय जिमावारा।

¹⁹ भगवान चउंदीसरिकुःआ होड़कू ईसू मसीते अनँयग सुदाय हेल-मेलकूतना। हनालगा हाँय हँकूराः कसूर मेरेय ओंगोल दोहोगेतना। अरू हाँय हनानाः हेल-मेलराः सरवन अलेय जिमावारा।

²⁰ दो अले राजारिकुःआ बराहीलकू इया मसी बदीरेले कतायतना। भगवान अलेतेय असेयतान इयाय कतायतना, अरू मसी लगा अपेले असेतना, जेमहा भगवान सुदापे हेल-मेल जुवाः।

²¹ मसी कहियो मेरेय कसूरगरा। मनदो भगवान अनँयगराः ओंगोलरे अबू बेगर गारबार होड़कू बड़ाँवबू लगा, हाँयग मसी कसूर होड़े बड़ाँवतिरिया।