2 कुरिंती 3 - Korwa Bible

¹ दो अले अँननले अले अरूले भल-भलायगुःता जा? एटाः होड़कू इया अलेके एचे सुदीगेराः चिठी अपे एचेरे वार लगा सहे अपे अते अलेके गोगोः लगा इदा जा?

² अलेराः इंदरीरे ओजाःतो इदा अरू जमा होड़कू सुदीयता अरूकू बछाःता हना चिठी अँननपे हवे।

³ अलेराः सेवाते ईसू मसी ओजाःकेरा हना चिठी अँनपे हवे। अरू हना चिठी सियाहीते सहे दिरिराः पटरारे ओजाःतो कोवान, मनदो जीयत भगवानराः बिरुवाते अँननलेराः इंदरीरे ओजाःतो इदानपेःआ।

⁴ अले ईसू मसीते भगवान एचेरेले भरसातना। हनालगा नाःआ इयाले कतायतना।

⁵ अले अँननले जमालेःआ एएचे जुकूर इदानलेःआ माःआन मेरले ककतातना, मनदो अले जमालेःआ एचेय जुकूर भनगवान हमा बड़ाँवलेता।

⁶ अरू हनाँय अले नँवा कता-जमकावतोराः सेवकिया जुकूरे बड़ाँवगोतेडलेःआ। नाःआ नँवा कता-जमकावतो ओजाःतो नियामकूनते कोवानेःआ, मनदो सुद बिरुवाते इदा। ओजाःतो नियमकून मेरबू मनाःतान अते गुजुःराः डंडबू पवाःता, मनदो सुद बिरुवाते जीवबू पवाःता।

नँवा कता-जमकाव मुरुक नाय नपाय इदा

⁷ गुजुःराः डंड एमेता हना जुना कता-जमकावतो भगवान दिरिरे ओजाःतेडखन मोसेसे ओवातेरा। लवकाःतो भगवान अते मोसेस हना नियमे पवावनेन अते हाँयराः सुरइत हों लवकाःआ। हना लवकाः ओहराव उतराःआ। हनते हों इसराएल होड़कू हाँयराः सुरइतरे मेरकू ञेल रोपाव अवेया।

⁸ दो सुद बिरुवाराः सेवा मड़ंगाः कता-जमकावतोराः सेवा अते अरू नाय नपायते चिला लगा मेर होयाकुःआ?

⁹ डंड एमेता हना कता-जमकावतो नपाय दोहोना दो, होड़कू बेगर गारबारकू बड़ाँवगोडकूता हना नँवा कता-जमकावतो, जुना कता-जमकावतो अते अरू बगरा नाय नपाय चिला लगा मेर होयाकुःआ?

¹⁰ जुना कता-जमकावतो मरंग दोहोना। मनदो नँवा कता-जमकावतो जुना कता-जमकावतो अते मुरुक मनारंग इदा। हनालगा जुना कता-जमकावतो अउल-तउलगे दो नुँहू मरंग कोवानेःआ।

¹¹ जुना कता-जमकावतो मान मरजइतगे इयाःआ दोहोना, मनदो नुँहू हान कोवानेःआ। अरू नँवा कता-जमकावतो सगर सइट लगा इदान दो, जुना कता-जमकावतो अते मुरुक मान मरजइतगे इयाःआ चिला लगा मेर दोहोकुःआ?

¹² दो अले एचेरे नाःआ इयाःआ नाय नपाय असरा इदान अते डीड़कियानखनले कतायता।

¹³ अले मोसेस इया कोवालेःआ। हाँयराः सुरइत लवकाःआ अरू हाँय अनँयगराः हुमू आहे पता रेडतेरा, जेमहा इसराएल होड़कू ओहराव उतराःआ हना लवकाः हँकू अहाकू ञेल अवेगे।

¹⁴ हँकूराः जीव केटेगयना अरू हँकू जुना कता-जमकावतोकू बछाःतान मेला हँकूराः इंदरी हों पनाता रेडतो इया दोहो जुवाःता। मनदो इनीसू मसी सुदाबू मिनी जुवाः दो, पता रेडतो इदा हना, भगवान चलाः एंडागोडताय।

¹⁵ अरू तिसिंग वरी तोनोंगीग मोसेसराः नियमकूने बछाःता, हाँयराः इंदरी पनाता रेडतो इया इदा।

¹⁶ मनदो हाँय तोनोंग बेला परबू अगी जीवे कुदा दो पनाता रेडतो इया इदा हना भगवान चलाः एंडागोडताय।

¹⁷ परबू दो सुद बिरुवा हवे अरू सुद बिरुवा दोहोनता हंडा होड़कू अजइत जुवाःता।

¹⁸ मनदो बिसवासगेता अबू जमाकू हुमू आह बेगर पता रेडतो अते परबूराः अगम जबड़ जंगरबू अटकारगेता। परबू सुद बिरुवा हवे अरू हाँय अते हना जंगर अरू बगरा बगरा अटकार घड़ीनबू बदलाव इदीनता, जेमहा अबू परबू बरोबइरबू होया जुवाः।