2 कुरिंती 2 - Korwa Bible

¹ ईंग ओंगोल दोहोबाःकातेरा, अपे एचेरेयिंग सेन दो अपे ओरोयिंग डंटाव अदरुजीतेडपेःआ, माःआन।

² दो ईंग अपेयिंग डंटाव अदरुजीगोड दो, ईंग डंटाव अदरुजीतेडकुःआ हँकुःआ होड़कू अड़ाःकेडखन इयेकू ईंगकू बहालगिंग?

³ ईंग सुनुदीबाःगोतेरा ईंग बहालगुःता हनानाः कताकूनरे अपे होँपे बहालगुःता। ईंग अपे एचेरेयिंग सेन मेला ईंग जीवपे बहालगोडता हँकुःआ होड़कू अते ईंग जीव अलो अदरुजीन। हनालगा ईंग मड़ंगाः चिठीरे नाःआ कता अपे लगायिंग ओजाःतेरा।

⁴ ईंग अपे जीव अदरुजीन लगा कोवान मनदो ईंग तुमिन अपेयिंग दुलारता हना अपे सुदीगे लगा ईंग जीव मुरुक कुहकाःआ अरू खोबराःआ अते इनियाम इयाम घड़ीन हना चिठीयिंग ओजाःतेरा।

गारबारे कबुलाःता हाँयग होड़राः कसूरपे बराव एंडा

⁵ तोनोंगीग ईंगराः जीवे अदरुजीकेड दो, हाँय ईंगराः एकला कोवान, मनदो अपे जमाकूराः जीव हों हाँय गुन लकने एचे अदरुजीकेरा।

⁶ अपे अते मुरुक होड़कू हाँयपे डंडियावतेरा अरू हनानाः डंड हाँय लगा बगरा इदा।

⁷ दो नुँहू हाँय अनँयगराः गारबारे कबुलावनेना। हनालगा अपे हाँयराः गारबार अपेराः ओंगोलतेपे बराव एंडागोड अरू हाँयराः जीवपे हड़ियाड़गोड, जेमहा हाँय मुरुक बगरा अलोय अदरुजीन।

⁸ हनालगा ईंग अपे एचेरेयिंग असेयतना, अपेराः दुलार हाँयपे एचे सुदीबाःगोडेय।

⁹ अपे जमा कताकूनपे मनाःतना जा कोवान हना अंदजाव लगा हों हना चिठीयिंग ओजाःतेरा।

¹⁰ तोनोंगीगराः गारबारपे बराव एंडा दो, ईंग हों हाँयराः गारबारिंग बराव एंडागोडता। ईंग बराव एंडागे इयाःआ गारबार इदान दो ईंग अपेके नफा होयाः लगा मसीराः मड़ंगरेयिंग बराव एंडागोडता।

¹¹ अबू कलउराः बुइदकूनबू सुसुदीतना। हनालगा अबू हाँयराः गारबारबू बराव एंडाय अते कलउ अबू एचेरे ओढोर ओरोय ञेल ञाम अवेतेरा।

ईसू मसीतेबू जितावबाः जुवाःता

¹² ईंग तोरोवास सहररे मसीराः नपाय सरवन मुरुक बगरा होड़कू एचेरे परसारगे लगा परबू ईंगे संघरावातेरा।

¹³ मनदो ईंगरीग बिसवासी बोहोयिंग तितूस सुदा हंडा मेरिंग जुमावगान। हनालगा ईंग जीव नपाय मेर लगावगान अरू ईंग हंडाकुःआ होड़कू पइड़घावतिडिंगखन मकिदुनिया देसिंग सलावयान।

¹⁴ भगवान ईसू मसीते जमा बेला अबू बहालतेय एचे जितावबूता। अरू हाँय नपाय महकता हना सुनुम इयाःआ मसीराः कनहून, अबूते होड़कूय एचे सुदीगोडकूता। हनालगा भगवानिंग धनियाबादता।

¹⁵ दो अबू परसारगेता हना नपाय सरवन सडाव जुवाःताकू हँकुःआ होड़कू लगा अरू लाय जुवाःताकू हँकुःआ होड़कू लगा भगवान ननायगुःता मसीराः नपाय मह-महाःता हना सकला इया इदा।

¹⁶ दो अबूराः सरवन लाय जुवाःता हँकुःआ होड़कू लगा गुजुः महुरा महक इया इदा अरू सडाव जुवाःता हँकुःआ होड़कू लगा नपाय मह-महाःता हना महक इयाःआ जीव एमेता। दो नाःआ इयाःआ बुता एचे जुकूर इये इदा?

¹⁷ एटाः होड़कू इया अँननकूराः नफा लगा, अले भगवानराः सरवनरे मेरले मेसायता, मनदो सताय ओंगोलते भगवान अगीते पवावतो सरवन मसीराः संघरातेले कता उदुःगेता।