2 कुरिंती 13 - Korwa Bible

पउलूसराः टुटीग सेताव

¹ भगवानराः कागदरे ओजाःतो इदा, “बार होड़ सहे पेय होड़राः हिदइतते तोनोंगाः कता कता-जमकाव जुवाःता।” पेय पुरती अपे एचेरेयिंग सेनतना।

² बार तुरहायिंग सेनेडा हनमेला ईंग ननानाः कतायिंग कतातेरा। नुँहू ईंग अपे सुदा कोवायिंगा। दो मड़ंगकू गारबारतेरा हँकुःआ होड़कू एचेरे अरू एटाः होड़कू एचेरे हों सेतावकू घड़ीन अरूयिंग ककतातना। ईंग मसी अगीतेयिंग ककतातना हनाराः आभापे असेतना।

³ हनालगा ईंग कुदा वेग जुवाः दो, ओनोरोयिंग अड़ाःतेडकुःआ। मसी डंडियावपे लगा अबड़ कोवाया, मनदो हाँय अनँयगराः अगम जंगरते अपे एचेरे इदानिया।

⁴ ईसू कुरूसरेय गोएगनेन मेला हाँय अबड़ावतोय ञिलुःआ। हनारे हों हाँय भगवानराः जंगरते जिनियत इदानिया। हनन इया अले हों हाँय इया अबड़ इदानलेःआ, मनदो भगवानराः जंगरते ईसू सुदा अले हों जीयतले दोहोनता, जेमहा अपे लगाले सेवागोड ञवन।

⁵ अपे बिसवासरे बड़ियाड़ इदानपेःआ जा कोवान, हना अँननपे अंदजावगुः अरूपे जासगुः। अपे मेरपे सुदीयतना जा मसी अपे जीवरे इदानिया माःआन? निही दो अपे हाँयरिकुःआ होड़कू कोवापेःआ।

⁶ ईंग असरागेतना अले सदाःआ कोवालेःआ माःआनपे सुदीया।

⁷ अपे अलोपे गारबारगे लगा भगवान एचेरेले अरजीता। अले बेगर गारबारते इदानलेःआ माःआन उदुःगे लगा कोवान, मनदो अले सदाःआले होयाकुःआ हों, अपे नपायपे एचेगोड ञवन लगाले अरजीता।

⁸ अले सताय बदलारे तोनोंगाः ओरोले एचे अवेतेरा, मनदो सनाताय लगाले एचे अवेयता।

⁹ अले अबड़ इदानले हों, अपे जबड़ जुवाः दो, अले बहाल जुवाःता। अरू अपे नाय नपायपे उडु-बुडू जुवाः लगाले अरजीता।

¹⁰ ईंग अपे एचेरेयिंग सेन मेला कड़ कड़ाइके कताय लगा अलो पराः। हनमेला अआड लगा कोवान, मनदो ईंग भगवान एमेवारिंगा हना हातपातते तुतुला लगायिंग अवेय। हनालगा ईंग अपे अते तोरे दोहोकियानखन नाःआ इयायिंग ओजाःगेतना।

टुटीग सलाम

¹¹ टुनुटीगरे ईंगरिकुःआ अजी-बोपोहकूतिंग, बनाहालतेपे दोहोन; अपेराः लूर नेवन उडु-बुडू इदीनपे; ईंगराः कतापे होमगोड; मी जीवकियानखनपे दोहोन; हेल-मेलपे दोहोन। दो अपेय दुलारता अरू सलसते एमेवापेता हाँयग भगवान अपे सुदाय दोहोनता।

¹² अपे जमा बिसवासी होड़कू, सुद ओंगोल अरू मसी दुलारतेपे सलाम होड़ेंग।

¹³ भगवानरिकुःआ जमा सुद होड़कू अपेकू सलामपेतना।

¹⁴ परबू ईसू मसी अपेय मयावा अरू भगवान अपेय दुलार अरू सुद बिरुवाराः संगइती अपे जमाकू सुदा सगर सइट होनोयागोड ञवन। आमीन!