2 कुरिंती 11 - Korwa Bible

पउलूस अरू लबरा चेडदार होड़कू

¹ ईंग बुयांग होड़ इयायिंग कतायता हना कता अयूम लगा अपेराः लुतूर अलोपे टिपी रेडगे। हाव, अपे अनायूम सहावगिंगपे।

² भगवान अपे बदीरेय ओंगलेता हनन इया ईंग अपे बदीरेयिंग ओंगलेतना। ईंग अपे मिनीटोंग मरद, मसी सुदायिंग मंगा-बरागोतेडपेःआ, जेमहा अपे सुद डिंडा धंगड़ी इया मसी एचेरेयिंग जिमा अवेपे।

³ अपे सुधिया अरू सुद जीवते मसीपे दुलारतना। दो बींग, हववा अडिगतेडखने बहकावतिरिया, हनन इया मसीराः हना दुलार अते लबरा चेडदार होड़कू अपेकू बहकावगोडता माःआनतिंग बोरतना।

⁴ तोनोंगीग अपे एचेरे सेनेकियानखन अले परसारकेरा हाँयग ईसू अते एटाः ईसूकू परसार दो, सहे अपे पवावनेना हाँयग सुद बिरुवा अते एटाः इयाःआ बिरुवापे पवाः दो, सहे अपे कबुलावकिया हना नपाय सरवन अते एटाः इयाःआ सरवनपे अयूम दो, अपे हना कताकून ओनोहोनपे मनाव जुवाःता।

⁵ ईंग मेरिंग ओंगलेतना अगम मरंग चेलाकू अते ईंग हुनुडिंग इदानिंगा, माःआन।

⁶ ईंग बुतुड़ु लगा नवड़िरहिया इदानिंगा हों, बेगर कनहूनते कोवायिंगा। अरू नाःआ कता बदीरे जमालेःआते अपे एचेरे नपायतेले उदुःबाःगोतेरा।

⁷ ईंग इनिंग हुडिंगकियानखन अपे मरंग बड़ाँवपे लगा अपे एचेरे भगवानराः नपाय सरवन कहिसाः अपे अते बेगर गोःतेयिंग परसारतेरा दो ईंग कसूरगोतेरा जा?

⁸ ईंगराः गुजर मसर सलाः लगा ईंग एटाः एटाः कलसियारिकुःआ होड़कू अते बरेलायिंग गोःकेरा, जेमहा अले अपेले सेवा अवे।

⁹ अरू ईंग अपे एचेरेयिंग दोहोन मेला ईंग लगा हुडिंग बगरा होयानेना दो, ईंग अपे लगा तोनोंगाः बोझा मेरिंग एमेगाड। मनदो मकिदुनिया राइज अतेकू वेजेडा हँकुःआ बिसवासी होड़कू ईंगराः जरुरइतकू एमे पुरावगोतेरा। अरू इनिंग अपे लगा तोनोंग इयाःआ बोझा होयाः अतेयिंग रोंकावनेना अरूयिंग रोनोंकावगोड ञवनता।

¹⁰ मसीराः सताय कता इयायिंग कतायतना। हनालगा ईंग ननन इयायिंग भल-भलायगुःता हना कता बदीरे जमा अकाया देसरिकुःआ होड़कू अते तोनोंगीग ईंगराः आह ओरोकू रिपूट अवेतेरा।

¹¹ अपे अते चिला लगा संघरा मेरिंग असेगाड? अपे मेरिंग दुलारपेता हनालगा जा? ईंग अपेयिंग दुलारता माःआन भगवान सुदीयताय।

¹² दो ईंग सेसेवातना हनन इयायिंग सेवागोड ञवनता, जेमहा ईंग सुदा अउल-तउलगुः लगा दोंगकू ञामता हँकुःआ होड़कू अलोकू बड़वार अवेन, अले हों पउलूस इयाले सेसेवातना, माःआन।

¹³ नाःआ इयाकुःआ होड़कू लबरा बराहीलकू हवे अरू मसीरिकुःआ मूक चेलाकूराः भेसरे बोबोनाव बुता होड़कू इदानकुःआ।

¹⁴ कलउ हों विड़चेड़तो सेरमो देसरिकुःआ बराहीलकूराः भेसरेय बड़ाँःता। हनालगा नँकुःआ होड़कू बदीरे अबू बयाः लगा कोवानेःआ।

¹⁵ दो कलउरिकुःआ सेवकियाकू हों भगवानरिकुःआ सेवकियाकूराः सेवा इया बोनाव सेवाकू सेवा दो अबूके बयाः लगा कोवानेःआ। हँकूराः बुनुता इया भगवान हँकूय डंडियावकूता।

पउलूस कटसिया बदीरेय भल-भलायगुःतना

¹⁶ ईंग अरूयिंग कतायतना, तोनोंगीग ईंग बुयांग अलोय ओंगोलगींग। मनदो ईंग बुयांगे ओंगलिंगता हाँयग होड़ बुनुयांग ओंगोलकिडिंगखने सहावया, जेमहा ईंग हों हुडिंगिंग बड़वारगुः।

¹⁷ ईंगराः नाःआ भल-भलायगुः परबूराः हुकुम इया कोवानेःआ, मनदो ईंग मी होड़ बुयांग होड़ इयायिंग कतायतना।

¹⁸ चउंदीसरिकुःआ होड़कू इया मुरुक होड़कू बड़वारता दो, ईंग हों हँकू इयायिंग बड़वारता।

¹⁹ अले मुरुक कनहूनदार इदानलेःआ, माःआनपे उंगलुःता। हनालगा अपे बुयांग होड़कूपे सहावगोडता।

²⁰ हँकू अपे बेगारी होड़कूकू बड़ाँवगोडपेता, अरूकू अडिग एंडागोडपेता, अरू अपे अते नफाकू उडुंगता, अरू अपे मड़ंगरे हँकू अँननकू मरंगकू बड़ाँःता, अरू अपेकू चपड़ता हों अपे हँकूपे सहावयाता।

²¹ मनदो अले नाःआ इया मेरले एचेगरा। दो अले मुरुक अबड़ले दोहोना माःआनपे ओंगोललेतना जा? मनदो तोनोंगीग तोनोंगाः कता बदीरे भल-भलायगुः लगाय डीड़ जुवाः दो ईंग हों डीड़ अवेनता। नाःआ ईंग बुयांग इयायिंग कतायतना।

²² हँकू इबरानी होड़कू हवे दो, ईंग हों हवे। हँकू इसराएल होड़कू हवे दो, ईंग हों हवे। हँकू इबराहीमरिकुःआ नइड़-बाँस होड़कू हवे दो, ईंग हों हवे।

²³ हँकू मसीरिकुःआ सेवकियाकू हवे दो, ईंग हँकू अते बइड़के इदानिंगा। नाःआ ईंग बउड़ाहा होड़ इयायिंग कतायता। ईंग मुरुकिंग मिहनइतकेरा, घड़ी घड़ी जेहेलरेकू सींगतिरिंगा, कइन तुरहा गुरुंदतेकू ञेडतिरिंगा अरू कइन तुरहा गुजुःतेयिंग बनसावकिया।

²⁴ एहूदाकू पाँच तुरहा उनचालीस उनचालीस गुरुंदकू ञेडतिरिंगा,

²⁵ मी तुरहा दिरिकूनतेकू तेकेतिरिंगा, पेय तुरहा हापकूनते होड़कू ञेडतिरिंगा। पेय तुरहा ईंग देगनेना हना दाः जहाजकून टोटाःयान, अरू मी दिन अरू मी रइत ईंग समुंदररेयिंग हलकोयग हड़ाःआ।

²⁶ कइन तुरहा सेन वेगरे ईंग लगा नईकूनराः सिकिसता, इनिग होड़कू अते सिकिसता, ईंगरिकुःआ जइत सगा होड़कू अते सिकिसता, बेगर एहूदाकू अते सिकिसता, सहररे सिकिसता, टयंगाब ततेररे सिकिसता, समुंदररे सिकिसता अरू लबरा बिसवासी होड़कू अते सिकिसता होयानेना।

²⁷ ईंग मुरुकिंग मिहनइतगेःआ अरू कटसियायिंग परावनेना अरू रइत रइत मेरिंग अपीगा। रंगेगतो अरू ततंगतोयिंग दोहोना अरू घड़ी घड़ी बेगर जोमतेयिंग दोहोना। ईंग ररंगिंगा अरू डेंडलेयिंग दोहोना।

²⁸ नाःआ अड़ाःकेडखन जमा कलसियारिकुःआ होड़कूराः बिसवास बदीरे सगर दिन ईंग जीव ओंगोल कुहकाःआ।

²⁹ तोनोंगीग होड़ बिसवासरेय अबड़ाःतान दो, ईंगराः जीव मेर हुडिंगुःता जा? तोनोंगीग कसूररेय बझाःतान दो ईंगराः जीव मेर अदरुजीनता जा?

³⁰ ईंग भल-भलायगुः दो ईंग ईंगराः अबड़ावतो कताकून बदीरेयिंग भल-भलायगुःता।

³¹ होड़कू सगर सइटकू जागगोड ञवनता अबूरीग परबू ईसूरीग अपांग भगवान सुसुदीतना ईंग मेरिंग लबरातना।

³² दिमसकूस सहररे अरितास राजारीग मरंग हातपात होड़ आँयगरिकुःआ सइनाकू ईंग साब लगा हना सहरे एचे अगुरातेडकुःआ।

³³ मनदो ईंगरिकुःआ सउंगताकू मीटोंग दउड़ाते सहरराः हताराः किरकी दुवारतेकू टुवांग पारतिरिंगा, अरू हाँयराः तिःईतेयिंग बनसाव उडुंगनेना।