2 कुरिंती 10 - Korwa Bible

पउलूस अनँयगराः सेवाय पकियातना

¹ अदोम होड़कू कतायता, पउलूस दुरहियाते चिठीय ओजाःतान मेला मुरुके डीड़गार जुवाःता मनदो अबू मड़ंगरे पोंकाहा इदानिया, माःआन। दो ईंग इनिंग पउलूस मसी इया सुधा अरू हुडिंग ओंगलुः घड़ीन अपे एचेरेयिंग गोड़न-पइयनतना।

² तोनोंग तोनोंग होड़कू ओंगोलकूता, पउलूस अरू हाँयरिकुःआ सउंगताकू चउंदीसरिकुःआ होड़कू इयाकू सलाःतना, माःआन। दो ईंग अपे एचेरेयिंग असेयतना, हँकुःआ होड़कू नाःआ इया अलोकू ओंगोलले लगापे कतावाकू, जेमहा ईंग अपे एचेरेयिंग सेन मेला हँकू सुदा डीड़गार अलोयिंग होयाः।

³ अले चउंदीसरेले दोहोनतान हों चउंदीसरिकुःआ होड़कू इया मेरले कड़ीगता।

⁴ अले चउंदीसरिकुःआ होड़कूराः ओंगोलकून अरू बेलूर कता होड़ेंग लाय एंडाय लगा भगवान अगीते जंगरले पवाःता। हनालगा अले नाःआ चउंदीसराः अवजारकून लड़ाइ लगा मेरले उपयोतगेता।

⁵ अरू अले होड़कू भगवानकू सुदी अते रोंकावकूता हना जमा ओंगोलकून अरू बड़वार कताकून हँकूराः दूर अते चलाः एंडाकेडखन होड़कूराः जमा ओंगोलकून मसीराः आड़रेले एचे कबीगगोडता।

⁶ अपे मसीराः कता जमालेःआपे मनाव पुरावगोड। अरू हना तयोमते हाँयराः कता मेरकू मनाःता हँकुःआ होड़कू डंडियावकू लगा सनपड़ावतो इदानलेःआ।

⁷ अपे सताय कतापे सुदीवा। तोनोंगीग ओंगोलबाःका, ईंग मसीरीग हवे। दो हाँय अले बदीरेय बुझाबाःकान, ईंग इया हँकू हों मसीरिकुःआ हवे, माःआन।

⁸ अपे ओंगोल अवेयता, परबू हँकूय एमेवारा हना हातपात बदीरे मुरुककू बड़वारतना, माःआन। मनदो अलेराः हातपात अपे आडपे लगा कोवान, मनदो अपे बड़ाँवपे लगा इदा। हनालगा ईंग ईंगराः हातपात उपयोतगे लगा मेरिंग गियुःता।

⁹ अपे ईंग बदीरे अलोपे ओंगले, हाँय चिठी ओजाःकेडखन होड़कूय एचे बोरोयीग होड़ हवे, माःआन।

¹⁰ अपे अते अदोम होड़कू ईंग बदीरेकू कतायता, पउलूसराः चिठीराः कताकून कड़ाइ अरू निठास दोहनता। मनदो हाँय अबू एचेरेय वेगतान दो अबड़ावतो इदानिया अरू हाँयराः बड़राकून लुर-लूर दोहोनता, माःआन।

¹¹ नाःआ इयाकू कतायता हँकुःआ होड़कू नाःआकू सुदीबाःका, अपे अते तोरे दोहोकियानखन चिठीतेले ओजाःगेता, हनन इया अपे एचेरेले सेन मेला होंले एचेयता।

¹² अँननकू भल-भलायगुःता हँकुःआ होड़कू सुदा अले एचे गँड़ाः लगा सहे एचे अउल-तउलगुः लगा मेरले चहाःता। हँकुःआ होड़कू अँननकू अँकू अउल-तउल होड़ेंगतान अते हँकू बुयांगकू बड़ाँव जुवाःता।

¹³ अले भगवान ओवाडलेःआ हना अते बगरा अले ओरोले भल-भलायनेना। मनदो भगवान अलेय जिमावारा हनानाः सेवा बदीरेले भल-भलायगुःता अरू हना सेवारे अपे होँपे मेसायना।

¹⁴ भगवान नाःआ हातपाते ओवाडलेःआ अते, अपे एचेरे नपाय सरवन परसार लगा मड़ंगले सेनेडा। मनदो अले अपे एचेरे मेरले सेनेकुः दो, अलेराः भल-भलाय सदाःआ होयाकुःआ।

¹⁵ भगवान अलेय जिमावारा हनानाः सेवा अड़ाःकेडखन एटाः होड़कूराः सेवा बदीरे अलेराः सेवा हवे माःआन, मेरले भल-भलायगुःता। मनदो अले असरातना, अपे बिसवासरेपे बड़ियाड़ जुवाःता, अरू अपे तलारे अलेराः सेवा हों अरू बगरा होयागोड ञवनता,

¹⁶ जेमहा अले अपेराः सिमान अते एटाः अगी सेनेकियानखन नपाय सरवन अरू बगराले परसार अवेय। हनालगा अले तोनोंगीग होड़राः सेवा बदीरे बड़वार लगा मेरले चहाःतना।

¹⁷ मनदो, भल-भलायगुःताय हाँयग होड़ परबू बदीरेय भल-भलायगुः।

¹⁸ मी होड़ अनँयग बदीरेय भल-भलायगुः दो भगवान हाँय ओरोय मनेवातिरिया, मनदो परबू भल-भलायगुःता हनाँयग होड़ भगवान मनेवायता।