2 कुरिंती 1 - Korwa Bible

पउलूस अगीते सलाम

¹ ने अजी बोपोहकूतिंग, भगवानराः हिछा इया ईसू मसीरीग मूक चेला इदानिंगा ईंग पउलूस, अबूरीग बिसवासी बोहोबू तिमुतियूस सुदा, अपे कुरिंती सहररे इदानकुःआ, भगवानराः कलसियारिकुःआ होड़कू लगा, अरू अकाया देसरे इदानकुःआ भगवानरिकुःआ एटाः सुद होड़कू लगा हों नाःआ चिठी ईंग ओओजाःतना।

² अबूरीग अपांग भगवान अरू परबू ईसू मसी अपेकिन मयावा, अरू सलसतरेकिन दोहो ओवापे।

भगवान लगा धनियाबाद

³ सोगादार अपांग इदानिया अरू जमालेःआते अबूराः जीवे हड़ियाड़गोडता अबूरीग परबू ईसू मसीरीग अपांग भगवानराः जाग होयाः।

⁴ अबूराः जमा सकालाः कटसियारे भगवान अबूराः जीवे हड़ियाड़गोडता, जेमहा कटसियारे इदानकुःआ हँकुःआ होड़कूराः जीव अबू हों हड़ियाड़ अवेयबू।

⁵ ईसू मसी कटसियाय सहावतेरा हनन इया अलिंग हों कटसियालिंग सहावतना, अरू हिनिनमिन बगरा ईसू मसी अलिंगराः जीवे हड़ियाड़गोडता।

⁶ अलिंग कटसियारेलिंग पराःतान दो, हान अपेराः जीव हड़ियाड़ जुवाः अरू सडाव जुवाः लगा होयाःता। अरू अलिंगराः जीव हड़ियाड़ जुवाःतान दो अपेराः जीव हड़ियाड़गुः लगा होयाःता। ननानाः अते अलिंग सहवेता हनन इया कटसिया अपे हों डीड़केडखनपे सहाव अवेयता।

⁷ अपे अलिंग इया कटसियापे ससहावतना, हनन इया अपेराः जीव हों भगवान हड़ियाड़गेतना। हनालगा अपे बदीरे अलिंगराः असरा पनाकिया इदा।

⁸ दो ईंगरिकुःआ अजी बोपोहकूतिंग, अलिंग आसिया राइजरेलिंग सहावतेरा हना कटसिया बदीरे अपे अनसिनहार अलोपे दोहोन लगालिंग चहाःतना। अलिंग मेरलिंग सहाव अवेय हना इया कटसियाते अलिंग जीव मुरुक ओंगोल कुहकाःआ, अरू गोनेग जुवाःता माःआनलिंग ओंगलेःआ।

⁹ अलिंग ओंगोलबाःकातेरा, अलंग ओनोरोलंग बनसावनेना, माःआन। अलिंग अँननलिंग एचेरे कोवान, मनदो गोएगतो होड़कूय जियाव रेमकूता हाँयग भगवान एचेरेलिंग भरसा ञवन लगा नाःआ इया अलिंग जीवरे होनोयायना।

¹⁰ हाँय गुजुः इयाःआ कटसियातेय बनसावकेडलिंगा अरूय बनसावलिंगता। अपे मिनी जीवते अलिंग लगा अरजीकेडखनपे संघरावालिंगता।

¹¹ हना अते भगवान अलिंगे बनसावगोड ञवनता माःआनलिंग अनसराबाःगोड ञवनतना। दो मुरुक बगरा होड़कूराः अरजीतेलिंग पवावकिया हना दहिनते, अलिंग बदीरे मुरुक होड़कू भगवानकू धनियाबादगेयता।

पउलूस अनँयग सेन दूर बदीरे बदलावतो ओंगोले कताकेरा

¹² अलिंग नपाय इंदरीते बहालगुः घड़ीनलिंग कतायतना, चउंदीसरे, बिसेक अपे सुदा अलिंगराः लूर-नेवन भगवान जुकूर, सुद अरू सताय इदा। अरू अलिंग अँननलिंगराः कनहूनते कोवान, मनदो भगवान मयावाडलिंगा हनानाः अतेलिंग जियाःतना।

¹³ अपे बछाव अवेनता सहेपे अयूम ठुड़ावगेता हनानाः एकला अपे लगालिंग ओओजाःतना। नुँहू अपे गुन लकनपे सुसुदीतना,

¹⁴ मनदो ईंगके असरा इदा अपे हना जमालेःआपे बुझावगोड ञवनता। अरू हनाते परबू ईसू कुदा वेगता हना दिन अपे बदीरेलिंग बहाल जुवाःता हनन इया, अपे हों अलिंग बदीरेपे बहाल जुवाःता।

¹⁵ नाःआ असराते ईंग अपे एचेरे मड़ंगिंग सेन लगायिंग ओंगोल दोहोतेरा, जेमहा अपे ईंग सुदा बार तुरहा जुमाः लगा दावपे पवाः।

¹⁶ ईंग अपे एचेरे बोलो पारकियानखन मकिदुनिया देसिंग सेन अरू हनाते अपे एचेरे अरूयिंग कुदा वेग लगायिंग ओंगोल दोहोतेरा, जेमहा ईंग एहूदिया छतर सेन मेला अपे ईंगपे पइड़घाव अवेकेःआ।

¹⁷ ईंग बार जीवकियानखन नाःआ इयायिंग ओंगोल दोहोतेरा जा? ईंग सेन लगा बुइदिंग तुलायता दो अपे चेले माःआनपे ओंगोलिंगतना, चउंदीसरिकुःआ होड़कू इया, होड़कू ननायकू लगा मिनी आहते हाव अरू ओरो माःआनिंग कताय?

¹⁸ भनगवान बिसवासगेयीग इदानिया। हनन इया अलिंगराः सरवन हों सनाताय इदा।

¹⁹ दो ईंग अरू सिलवानूस अरू तिमुतियूस अपे एचेरेले परसारतेरा हाँयग भगवानरीग बेटात ईसू मसी बार जीवकियानखन हाव अरू ओरो मेरेय कतायता, मनदो हाँय जमा बेला हनाव हावे कतायता।

²⁰ दो भगवान जबानकेरा हना जमालेःआ ईसू मसी हनाव हावगोडताय। अरू हना कता बदीरे अमीनबू कतायता, जेमहा अबूते भगवानराः मान मरजइत होयाः।

²¹ हनाँयग भगवान हमा अपे अरू अले ईसू मसीरे बिसवासरेय बड़ियाड़गोडबूता अरू अनँयग लगाय एटाःकेडबुःआ।

²² हाँय अबू अनँयगरिकुःआ हवे माःआन मीटोंग चिनहा इया अनँयगराः मोहोर लगावकेडखन अबूराः इंदरीरे सुद बिरुवा बयान इयाय एमेवाडबुःआ।

²³ भगवान ईंगरीग हिदइतदार बड़ाँवकिडिगखनिंग कतायतना, कुरिंती सहररे अपे एचेरे नुँहू वरीयिंग सेनेकुः दो अपेयिंग डंटाव अदरुजीगोडकेपेःआ।

²⁴ अपे बिसवासरे बड़ियाड़ इदानपेःआ। हनालगा अपेराः बिसवास बदीरे अपे एचेरे हातपातगे लगा मेरले चहाःतना। मनदो अपे बहालगुःता हनारे संघरावापे लगाले चहाःतना।