1 तिमुतियूस 3 - Korwa Bible

कलसियारीग मूक होड़राः जीव

¹ तोनोंगीग होड़ कलसियारीग मूक होड़ बड़ाँः लगाय चहाःता दो, हाँय नपाय बुता एचेगे लगाय चहाःतना। अरू नाःआ कता सताय हवे।

² दो कलसियारीग मूक होड़ बेगर गारबार होड़ अरू मिनीटोंग अइमी अअसूल इदा। हाँय ओंगोल समझाः होड़ अरू मान मरजइतगेयीग, नेत-नेवारगेयीग अरू नपाय चेडदारे दोहोन।

³ हाँय बुनूलतो होड़ सहे कड़ीग होड़ अलोय दोहोन। हाँय सलसतिया अरू सुधा होड़ दोहोन लगा इदा, अरू ढिबुवाराः ललचीरे अलोय दोहोन।

⁴ हाँय अनँयग ओड़ाःरिकुःआ होड़कू नपायते पला दरीकू लगा इदा। आँयग लइंकूतेन हों हाँयकू मान मरजइतकेडखन हाँयराः कता मनाः लगा इदा।

⁵ तोनोंगीग होड़ आँयग ओड़ाःरिकुःआ होड़कू पला दरीकू लगा मेरेय अवे दो, हाँय भगवानराः कलसियारिकुःआ होड़कू करा इयाय पला दरी अवेकू?

⁶ हाँय नँवा बिसवासी होड़ अलोय दोहोन, जेमहा हाँय बड़वारकियानखन कलउ पवावकिया हना इया डंड भगवान अगीते अलोय पवाः।

⁷ बेगर बिसवासी होड़कू हों नपायकू मान मरजइतगेयता, हनाँयग होड़ कलसियारीग मूक होड़ होयाः इदा। हनाते कलउ हाँयग होड़ कसूररे दाःगेय लगा ओरोय अवेतिडिया अरू हाँय ओरोय गियूनेना।

कलसियारिकुःआ सेवकियाकूराः जीव

⁸ ननन इया कलसियारिकुःआ सेवकिया होड़कू, मान मरजइतगेयीगकू दोहोन अरू बार जीव ओंगोल होड़कू अहाकू दोहोन। हँकू बुनूलतो होड़कू अलोकू होयाः अरू तोनोंग इयाराः ढिबुवा ललचीरे अहाकू दोहोन।

⁹ भगवान अबूय उदुःवातेरा हना बिसवास बदीराः सताय चेडतो हँकुःआ होड़कू नपाय इंदरीतेकू बिसवास हड़ाःगे लगा इदा।

¹⁰ मड़ंग हँकुःआ होड़कू नपायतेपे जासकू। अरू हँकू एचेरे तोनोंगाः गारबार मेर दोहोन दो कलसियाराः सेवकिया बुता लगा हँकुःआ होड़कूपे सुनावगोड।

¹¹ कलसियारिकुःआ सेवकियायीनकू हों ननन इया मान मरजइतगेयीगकू, जमालेःआ भरसागेयीगकू अरू ओंगोल समझाः अइमीकू दोहोन इदा। हँकू बझउड़ी अइमीकू अलोकू दोहोन।

¹² कलसियारीग सेवकिया होड़ मिनीटोंग अइमी अअसूल लगा इदा अरू आँयग लइंकू अरू ओड़ाःरिकुःआ जमा होड़कू नपायते पला दरीकू लगा इदा।

¹³ नपायते सेवकिया बुताय बुताता हाँयग होड़, एटाः होड़कू मान मरजइतगेयता। अरू हाँय ईसू मसी एचेरे इदा हना बिसवास बदीरे एटाः होड़कू एचेरे डीड़केडखने कता उदुः अवेयता।

मुरुक गहीर सताय

¹⁴ आम एचेरे ओहेन सेन लगायिंग असरातना। हनते हों ईंग नाःआ जमाकूनिंग ओजाःगेतना,

¹⁵ जेमहा ईंग सेनरे कुबेर जुवाः दो आम सुदी अवेयता, बिसवासी होड़कू करा इया भगवानराः ओड़ाःरे नपाय लूर नेवनते जियाः लगा इदा, हना। भगवानराः ओड़ाः सताय सरवनराः खुंटा अरू पया इया दोहोनता हना जिनियत भगवानराः कलसिया हवे।

¹⁶ अरूबू कबुलाःता हना बिसवास मुरुक गहीर सताय इदा। होड़कूराः सुरइत मुरइतरेय जनमावनेना, बेगर गारबारते इदानिया माःआन सुद बिरुवा कता उदुःतेरा सेरमो देसरिकुःआ बराहीलकू हाँयकू ञेलतेरा, होड़कू हाँय बदीरे जमा जइत होड़कू एचेरेकू परसार उदुःतेरा, चउंदीसरिकुःआ होड़कू हाँय एचेरेकू बिसवासतेरा, अरू मान मरजइत सुदा सेरमो देस अगी भगवान रेम गोःयडिया।