1 तिमुतियूस 1 - Korwa Bible

पउलूस अगीते मसी सलाम

¹ ने तिमुतियूस, अबूरीग सडावदार भगवान, अरूबू असराता हाँयग ईसू मसीराः हुकुमते ईसूरीग मूक चेलायिंग बड़ाँवनेना, ईंग पउलूस,

² बिसवास बदीरे ईंग बेटा इया इदानमेःआ आम लगा नाःआ चिठीयिंग ओजाःगेतना। अबूरीग अपांग भगवान अरू परबू ईसू मसी, अपेकिन मयावा अरूकिन सोगावा, अरू सलसतरेकिन दोहो ओवापे।

लबरा चेडदार होड़कू बदीरे सेताव

³ ने बेटा, ईंग मकिदुनिया राइज अगीयिंग सेनेन मेला, इपीसी सहररेम दोहोन लगा आमिंग असेतेरा, जेमहा तोनोंग तोनोंग होड़कू लबरा चेड अलोकू चेडकू लगा हँकूम हुकुम अवेवाकू।

⁴ तुलात कहड़ीकून अरू खुटिपहार होड़कूराः ञाव सूची बदीराः बड़राकूनरे हँकुःआ होड़कूराः ओंगोल अलो दोहोन लगाम हुकुमवाकू। ननन इयाःआ कताकून बिसवासते होयाःता हना भगवानराः चेड इया कोवानेःआ अरू हना अते होड़कू मुरुककू अड़ा-चउकीता।

⁵ बिसवासी होड़कू सुद इंदरीते, नपाय ओंगोलते अरू बेगर गारबारराः बिसवासते दुलार होड़ेंग लगाले हुकुमवाकूतना।

⁶ मनदो तोनोंग तोनोंग होड़कू सताय सरवनराः दूरकू अड़ाःगोतेडा अरू हनाते हँकू सदा बड़राकू बड़राता।

⁷ हँकुःआ होड़कू नियम चेडदार होड़कू बड़ाँः लगाकू चहाःतना अरू डीड़ घड़ीन मरंग मरंग बड़राकू बड़राता। मनदो हँकू मेनेरकू सुदीयता हँकू चिला बदीरेकू पकियागेता अरू चिलाकू बड़रातना हना।

⁸ अबू सुदीयतना भगवानराः नियम तोनोंगीग होड़ सतायतेय मनाः दो हना नियम ननपाय हवे।

⁹ अबू नाःआ हों सुदीयतनाबू, भगवानराः नियमकून बेगर गारबार होड़कू लगा मेरेय तुलागाड। मनदो गारबार अरू तुड़ेंग-तपेग होड़कू लगा, भगवान मेरकू मनाःता अरू कसूर होड़कू लगा, सुद कोवानेःआ अरू बेलूर होड़कू लगा, एंगात अपातकू ञेड एंडात होड़कू अरू ञेड एएंडा होड़कू लगा,

¹⁰ सनहा-सनही होड़कू अरू बेगर खापरे बुताकू एचेयता हँकुःआ होड़कू लगा, होड़ अकिरिंग होड़कू अरू जलिया होड़कू, लबरा हिदइतदारकू अरू सताय चेडतोकू घंटावता हँकुःआ जमा होड़कू लगा नियमकून इदा।

¹¹ अरू अगम नपाय भगवान ईंगे जिमावारा हना जागगेयाः नपाय सरवनते नाःआ नियम खाप जोमता।

ईसू मसीराः मया बदीरे भगवान लगा धनियाबाद

¹² ईंग बिसवासगेयीग होड़ ओंगोलवाडिंगखन, परबू ईसू मसी आँयगराः सेवा सेवागे लगा सुनावकिडिंगखन आँयगराः बुता बुतागे लगा जंगरे ओवाडिंगा। हनालगा हाँयिंग धनियाबादतना।

¹³ मड़ंग ईंग ईसू मसी बदीरे ओपता बड़रायिंग कताया अरू बिसवासी होड़कूयिंग संतावकुःआ अरू मरखा होड़िंग दोहोना। हनमेला ईसू एचेरे मेरिंग बिसवासगेःआ अरू अनसिनहारिंग दोहोना। हनालगा ईसू ईंग मुरुके सोगावाडिंगा।

¹⁴ परबू ईसू मसी मिनी जीवते ईंगे मयावारा, जेमहा ईंग हाँय एचेरेयिंग बिसवासगे अरू एटाः होड़कूयिंग दुलार अवे।

¹⁵ कसूर होड़कू सडावकू लगा चउंदीसरे ईसू मसी वेगनेना, अरू नाःआ कता सनाताय अरू जमाःलेःआते मनाः जुकूर इदा। अरू जमा कसूर होड़कू अते मरंगीग कसूर होड़ इनिंग इदानिंगा।

¹⁶ हनारे हों ईसू मसी ईंग मयावाडखन ईंग मुरुके सहावकिरिंगा, जेमहा ओरो टुटीगनेना हना जीव लगा हाँय एचेरेकू बिसवासगेता हँकुःआ होड़कू लगा ईंग मीटोंग चिनहा इयायिंग दोहोन।

¹⁷ जूग परिया अते राजा इदानिया अरू सगर सइट लगा जीयत इदानिया अरू तोनोंगीग ओरोकू ञेल अवेतिरिया हनाँयग मिनीटोंग भगवानराः मान मरजइत अरू जाग सगर सइट होनोयागोड ञवन, आमीन!

¹⁸ ने ईंग बेटा तिमुतियूस, आमिंग हुकुमवामतना, भगवानराः बड़रा कता होड़कूते सुद बिरुवा आम बदीरेय कतातेरा हना कता इया भगवानराः सरवन लगा,

¹⁹ बिसवास अरू सताय ओंगोलते नपायमे लड़ाइगोड ञवन। अदोम होड़कू सताय ओंगोल अड़ाःकेडखन बिसवास दूर अतेकू बहकावयना।

²⁰ बहकावतो होड़कू अते बार होड़ हुमिनियुस अरू सिकंदर हवे। दो नँकिनाः होड़किन ईंग कलउ तिःईरेयिंग जिमागोतेडकिना, जेमहा हँकिन भगवान ओपताकेडखन अहा कताय लगाकिन चिडुः।