1 तिसलूनिका 5 - Korwa Bible

ईसूराः कुदा वेग लगा सपड़ावतोबू दोहोन

¹ ने अजी बोपोहकूतिंग, अपे नपायतेपे सुदीयतना, तोनोंगीग इनिग होड़ रइतरे वेगता हना इया होड़कू बेगर ओंगोलतेकू दोहोनतान मेला परबू ईसू चउंदीसरेय कुदा वेगता।

² हनालगा हान तुमिस होयाःता हना बदीरे ईंगके अपे लगा ओओजाः कोवानेःआ।

³ होड़कू कतायता, नुँहू अले लगा तोनोंगाः सिकिसता कोवानेःआ अरू सलसतरे इदानलेःआ, माःआन। दो हननमेला उड़सी अइमीराः हसू सुदुरुःता हनन इया हँकुःआ होड़कू एचेरे असाकारे सिकिसता सुदुरुःता अरू हँकू तोनोंग इया ओरोकू बनसाव अवेनेना।

⁴ मनदो ईंग अजी बोपोहकूतिंग, अपे अंदरा अरू रइतरिकुःआ होड़कू कोवापेःआ। हनालगा इनिग होड़ वेगतान मेला होड़कू बयाव जुवाःता हना इया परबू ईसू कुदा वेग मेला अपे ओरोपे बयावनेना।

⁵ अबू अंदरारेकू सलाःता हँकुःआ रइतरिकुःआ होड़कू कोवाबुःआ, मनदो अबू जमाकू मरसलरेकू सलाःता हँकुःआ दिनरिकुःआ लइंकू इदानबुःआ।

⁶ हनालगा अबू बेगर बिसवासी होड़कू इया ईसू कुदा वेगता हना बदीरे अनसिनहार अहाबू दोहोन। मनदो अबू सवासिती अरू नपाय ओंगोल घड़ीन दोहोन लगा इदा।

⁷ अपीगता हँकुःआ होड़कू रइतरेकू अपीगता, अरू बूल जुवाःता हँकुःआ होड़कू रइतरे हमा बुनुलतोकू दोहोनता।

⁸ अबू दिनरिकुःआ होड़कू इदानबुःआ। हनालगा अबू ईसू मसी एचेरे अबूराः बिसवास अरू एटाः होड़कू सुदा इदा हना दुलार झिलम इया तुसिंगकेडखन अरू ईसू मसी अबूय सडावता हना असरा सइनाकूराः टुपी इया हरूबकेडखन अँननबू ओंगोल समझाव हड़ाः इदा।

⁹ भगवान अबू डंडियावबू लगा मेरेय सुनावगडबुःआ, मनदो अबू लगाय गोएगनेना अबूरीग परबू ईसू मसीते अबू सडावबू लगा भगवान सुनावकेडबुःआ,

¹⁰ जेमहा अबू गोएग जुवाः सहे जीयतबू दोहोन, अबू सगर सइट हाँय सुदाबू दोनोहोन।

¹¹ हनालगा अपे नुँहू वरीपे एचेयतना, हनन इया अपे कता बहाल होड़ेंगगोड ञवनपे, अरू संघरा होड़ेंगगोड ञवनपे।

टुटीग चेड अरू सलाम

¹² ने अजी बोपोहकूतिंग, अले मीटोंग बड़राले असेगेतना। अपे तलारेकू सेसेवातना अरू अपेकू अगुवाइवापेतना अरू परबू ईसू लगा नपाय जीव जियाः लागाकू सेतावपेता, हँकुःआ होड़कू मान मरजइतकूपे।

¹³ हँकुःआ होड़कू अपे लगा मुरुककू मिहनइतगेता। हनालगा हँकुःआ होड़कूपे दुलारकू अरू मुरुक मान मरजइतकूपे। अपे सलसततेपे दोहो ञवन।

¹⁴ ने अजी बोपोहकूतिंग, अले अपे एचेरेले असेयतना कुड़ही होड़कूपे सेताव, पोंकाहा होड़कूराः जीवपे बड़ियाड़गोड, सतवास होड़कूपे संघरावा अरू कटराहा होड़कू इया अहापे होयाः।

¹⁵ तोनोंगीग अपे सुदा बेलूरे एचेय दो, हान इया अपे बदला अहापे कुदागे। मनदो अपे जमा बेला बिसवासी होड़कू लगा अरू एटाः होड़कू नपाय एचेगोड ञवन लगा ओसताजपे दोहोन।

¹⁶ जमा बेला बनाहालतेपे दोहोन।

¹⁷ जमा बेला अरजीगोड ञवनपे।

¹⁸ अपे जमालेःआ हाल-चालरे भगवानपे धनियाबादगोड ञवन। परबू ईसूते अपे लगा भगवानराः हिछा ननानाः इदा।

¹⁹ अपे तलारे सुद बिरुवाराः बुता अहापे रोंकावगे।

²⁰ भगवानराः सुद बिरुवा तोनोंगीग होड़ते आँयगराः बड़राय कता उदुःगेता दो हना बड़रा हुडिंग अहापे ओंगले।

²¹ मनदो होड़कू कतायतना हना जमा बड़रापे जास अरू ननपाय इदा हनापे मनाः।

²² जमा बरानाः कसूर अते तोरेपे दोहोन।

²³ जमा होड़कू लगा सलसते एमेयता हाँयग भगवान जमा बरानाःते अपेराः जीव सुदे दोहोगे अरू परबू ईसू मसी कुदा वेगता हना दिन वरी अपेराः देह, जीव अरू हनसा बेगर कसूरते दोहोगे लगा होयिंग अरजीतना।

²⁴ अपेय राःकेरा हाँयग भगवान बिसवासगेयीग इदानिया अरू हाँय हनन इयाय एचेयता।

²⁵ ने अजी बोपोहकूतिंग, अले लगा होँपे अरजीगोड ञवन।

²⁶ अपे जमा बिसवासी होड़कू सुद ओंगोल अरू मसी दुलारतेपे सलामकू।

²⁷ नाःआ चिठी जमा अजी बोपोहकू बछाव उदुःवाकू लगा ईंग परबू ईसू मसीराः ञावतेयिंग हुकुमगेतना।

²⁸ परबू ईसू मसी अपेय मयावा।