1 तिसलूनिका 3 - Korwa Bible

पउलूस तिमुतियूसे वारतेरा

¹ अले अपे अते एटाःरे दोहोकियानखन मेरले सहाव अवेगाड। हनालगा अले एतेनस सहररे दोनोहोन लगा अँननले अले सलाहनेना।

² हनाते अले अबूरीग बिसवासी वगाबू अरू ईसू मसीराः नपाय सरवनराः परसाररे भगवानरीग सेवकिया होड़ तिमुतियूस अपेराः बिसवास एचे बड़ियाड़गे लगा अरू बिनिसवासरे सलाः लगाय कता बहालवापे लगा अपे एचेरेले वारकिरिया,

³ जेमहा अपे तोनोंगाः कटसिया मेला बिसवासरे अहापे हिटोः-डोबोःगुः। मनदो अपे सुदीयतना नाःआ इयाःआ कटसिया अबू जीवरे होनोयाःता।

⁴ मनाड़ंग अले अपे सुदा दोहोन मेला अपेले सेतावतेरा, कटसियारे अबूके सेनेन पार इदा, माःआन। अरू नुँहू अपे सुदीयतना हनन इया होयाकिया।

⁵ ईंग बोरा, अपेराः बिसवास एचे अड़ाःपे लगा कलउ लहकाव सोतेडपेःआय करे अरू अले अपे तलारेले एचेतेरा हना बुता सदाःआ होयायान करे, माःआन। नाःआ ईंग मेरिंग सहाव अवेगड। हननलगा अपेराः बिसवास बदीरे ईंग सुदीगे लगा तिमुतियूस अपे एचेरेयिंग वारतिरिया।

तिमुतियूस तिसलूनिका कलसियाय भल-भलायवातेरा

⁶ दो नुँहू तिमुतियूस अपे अगीते दरवाया अरू अपेराः बिसवास बदीरे अरू एटाः होड़कू सुदा अपेराः अलार-दुलार बदीरे हों नपाय नपाय सरवने कता उदुःतेरा। हाँय कताया, हँकुःआ होड़कू अपे बदीरे नपाय नपायकू उहियार उतराव अगूयतना अरू अपे हँकू ञेल लगापे उसाडगुःतना। हनन इया अपे अरू ञेलपे लगाकू उसाडगुःतना, माःआन।

⁷ ने अजी बोपोहकूतिंग, एटाः होड़कू अले कटसियावाडखनकू संतावलेतना। मनदो अपेराः बिसवास बदीरे अले मुरुक बहालरे इदानलेःआ।

⁸ परबू ईसू एचेरे अपेराः बिसवास बड़ियाड़ इदान अते, नुँहू अले सहेड कुदाकियाले।

⁹ अले भगवान एचेरे अरजी मेला अपे बदीरे मुरुकले बहाल जुवाःता, अरू अपे बदीरे भगवान मुरुकले जागगेयता। हनारे हों करा उड़ीले पुराव अवेय?

¹⁰ अपे एचेरे सेने अवेन लगा अरू अपेराः बिसवास, अरू एचे बड़ियाड़गे लगा रइत दिन अपे लगाले अरजीगोड ञवनता।

¹¹ अपे एचेरे सेन बदीरे अबूरीग अपांग भगवान अरू परबू ईसू अगुवाइवाले लगाले अरजीतना।

¹² अपेले अलार-दुलारतना हान इया अपे होँपे अलार-दुलार होड़ेंग लगा, अरू जमा होड़कू होँपे अलार-दुलार लगा, परबू भगवान अपेराः दुलार बगरागोड लगा होंले अरजीतना।

¹³ परबू ईसू आँयगरिकुःआ जमा सुद होड़कू सुदाय कुदा वेगता, हनमेला हाँय अबूरीग अपांग भगवानराः मड़ंगरे अपेराः जीव बेगर गारबारते अरू सुदे तुलावाडखन बड़ियाड़गे लगाले अरजीतना।