1 पतरस 4 - Korwa Bible

भगवानराः हिछा इयाःआ बदलावतो जीव

¹ ईसू मसी अनँयग देहरे कटसियाय सहावतेरा दो, अपे हों हनानाः ओंगोल इया कटसिया सहाव लगा सपड़ावतोपे दोहोन। तोनोंगीग होड़ भगवानराः ओंगोल इया सलाः अते कटसियाय सहाव दो हाँय कसूरगे लगाय अड़ाःगोडता।

² अरू हाँय नुँहू वरीते अनँयगराः मनबिदिया इया ओरोय जियावनेना, मनदो भगवानराः हिछा इयाय जियाःता।

³ मड़ंगरे अपे मुरुक बेला वरी बेगर बिसवासी होड़कू एचेय लगाकू मंजूरवाता, हना बेलूर बुताकूनपे एचेगोड ञवना। अपे सनहा-सनहीराः बेलूर ओंगोलते अरू लिमचोर-लमचोर बुताकूनरेपे दोहोना। अपे बुनूलतो अरू दारू बोः होड़कूपे दोहोना अरू एरांगवा इयाःआ मुरती पुजा घड़ीनपे जियाःआ।

⁴ मनदो नुँहू अपेरिकुःआ मड़ंगकुःआ सउंगताकू इया अपे तुड़ेंग-तपेग होड़कू कोवापेःआ। हना अते हँकू मुरुककू बयाव जुवाःता अरू अपे बदीरे ओपता बड़राकू बड़राता।

⁵ जीयत इदानकुःआ हँकुःआ होड़कू अरू गोएगतो होड़कू, जमाकू भगवान फड़ियावकूता। हनानाः दिन हँकू जमाकू अँनकूराः बुता बदीरे भगवान एचेरे आभा एएमे पराःता।

⁶ हनालगा ईसू गोएगतो होड़कू एचेरे हों नपाय सरवने परसारतेरा, जेमहा हँकूराः लूर नेवन इया भगवान फड़ियावतेडकुःआ, मनदो हँकूराः हनसा भगवान इया जीयत दोहो अवेन।

नपाय जिमेवारी होड़कू

⁷ चउंदीस टुटीगगुःराः बेला निचकाःतना। हनालगा अपे ओंगोल बुझाः घड़ीन सवासितीपे दोहोन, जेमहा अपे भगवान एचेरेपे अरजी अवेय।

⁸ भगवानराः कागदरे ओजाःतो इदा, “अपे एटाः होड़कूपे दुलार दो, हँकूराः मुरुक कसूरकूनतेपे कता बनसावकूता।” हनालगा अपे नाःआ मनइद कता इया अँननपे अपे इनिंदरी इंदरीते अलार-दुलार होड़ेंग ञवनपे।

⁹ बेगर कुरबुराःते एटाः होड़कूपे नेत-नेवारकू।

¹⁰ भगवान अनँयगराः अगामाः मयाते एमेवातेडपेःआ हनानाः दहिनकूनते नपाय जिमेवारी होड़कू इया अँननपे अपे सेवा होड़ेंग।

¹¹ परसारताकुःआ होड़कू भनगवानराः सरवन पपरसार लगा इदा। एटाः होड़कूकू सेवाता हँकुःआ होड़कू, भगवानराः जंगरते सेवाकू लगा इदा, जेमहा नाःआ जमाकून अते ईसू मसीते भगवानराः मान मरजइत होयाः। हनाँय मान मरजइतगे इयायीग अरू सगर सइट वरी अगम जंगरदार इदानिया। आमीन!

बिसवासीकू लगा कटसिया

¹² ने अजी बोपोहकूतिंग, अपे अंदजाव लगा, अपे जीवरे मुरुक गराह-गिराह संताव होयाः मेला, तोनोंगाः अनसिनहार कता होयाःतान इया अपे अहापे बयावगुः।

¹³ मनदो अपे जेमिन ईसू मसीराः कटसियारेपे मेसानता, हिनिनमिनपे बहालगुः, जेमहा ईसू मसी जमा होड़कू अते मान मरजइते पवाः मेला, अपे हों मुरुक बहालतेपे भबराः।

¹⁴ भगवानराः अगम मरंग बिरुवा अपे एचेरे इदा। हनालगा अपे ईसू मसी एचेरे बिसवासगेतान अते, होड़कू अपेकू एरंगवाता, दो अपेराः जीव भगवान नपायगोडता।

¹⁵ अपे अते तोनोंगीग ञेड एएंडा होड़, सहे इनिग होड़, सहे लुड़ी होड़, सहे तुड़ेंग-तपेग होड़ होयाः अते कटसिया अहापे सहवे।

¹⁶ अपे बिसवासी होड़ होयाकियान अते अपे कटसिया ससहाव पराः दो हना बदीरे अपे अलोपे गियुः, मनदो अपे ईसू एचेरेपे बिसवासकेरा हनलगा अपे भगवानपे जागगोड ञवन।

¹⁷ भगवानरिकुःआ होड़कू भगवान फड़ियावकूराः बेला सोदोरकिया। अरू फड़ियावगे लगा अँननबू अतेय बुँहड़ीगेता दो, भगवानराः नपाय सरवन मेरकू बिसवासगेता हँकुःआ होड़कूराः जीव करा इया होयाःता?

¹⁸ अरू, बेगर गारबार होड़कू मसकिलतेकू बनसाः दो, भगवानराः ओंगोल इया मेरकू सलाःता हँकुःआ होड़कू अरू कसूर होड़कूराः जीव करा इया होयाःता?

¹⁹ दो अपे भगवानराः ओंगोल इया कटसियापे सहाव दो नपाय बुतापे बुता घड़ीन बिसवासगेयीग तुलायदार एचेरे अपेराः जीव जिमागोड लगा इदा।