1 पतरस 2 - Korwa Bible

जीयत दिरि अरू सुद जइत होड़कू

¹ हनालगा ईंगरिकुःआ अजी बोपोहकूतिंग, अपे जमा बरानाः टेनसाहा अरू बेलूर कताकून, लबरा बड़रा, पचघुचिया, इरा अरू जमा बरानाः ओपता बड़रा, अपे जीव अतेपे चलाः एंडागोड।

² बती लइंकू इया अपे हों सुद दूद इया इदा हना भगवानराः सरवन लगापे रोयोँन, जेमहा हना सरवनतेपे बड़ियाड़ इदीन अरू जमालेःआतेपे सडाव जुवाः।

³ भगवानराः कागदरे नाःआ इया ओजाःतो इदा, “परबू तुमिन नपाय इदानिया, हना अँननपे सुनुदीबाःकेरा।”

⁴ नाःआ चउंदीसरिकुःआ होड़कू आड-बेकारवातिरिया, मनदो भगवान सुनावकिरिया हाँयग मुरुक किमइतराः जीयत दिरि ईसू एचेरेपे वेग।

⁵ दो जीयत दिरिकून इया सुद बिरुवा अपे भगवानराः सताय ओड़ाःरे एटाः होड़कू सुदा जोड़ावकेडपेखन सुद पुजउरीकू तुलापेतना, जेमहा भगवान ननायगुःता हना सुद बलिदानकून, अपे ईसू मसीतेपे देग अवेयता।

⁶ भगवानराः कागदरे नाःआ इया ओजाःतो इदा, “ईंगपे अयूम, ईंग सीयोनरे ओड़ाः तलाराः बड़ियाड़ दिरियिंग मंडावतना, अरू ईंग सुनावकेरा हना दिरि ननपाय अरू मुरुक किमइतराः हवे। हाँय एचेरेकू बिसवासगेता, हँकुःआ होड़कू कहियो ओरोकू गियूनेना।”

⁷ अपे हाँय एचेरेपे बिसवासकेरा, हनालगा हाँय अपे लगा मुरुक किमइतीग हवे। मनदो हाँय एचेरे मेरकू बिसवासगेता, हँकुःआ होड़कू लगा हाँय नाःआ इया इदानिया; ओड़ाः तुला मिसतिरीकू ओरो बड़ाँवनेना, माःआनतेकू चलाः एंडातेरा, हनानाः दिरि जमा दिरिकून अते ननपाय दिरि होयानेना।

⁸ अरू भगवानराः कागदरे एटाःरे नाःआ इया ओजाःतो इदा; “नाःआ दिरि होड़कू एचे तोहोडकूता अरू हान होड़कू एचे तामगोडकूता।” हँकुःआ होड़कू सरवन मेरकू बिसवासगाड। हनालगा भगवान हँकूय दोहो ओवाडकुःआ हनन इया हँकुःआ होड़कू तोहोडयनाकू।

⁹ मनदो अपे सुनावतो होड़कू, राजारिकुःआ पुजउरीकू, मीटोंग सुद जइत अरू भगवानरिकुःआ निकता होड़कू हवे, जेमहा अपे अंदरा अते राःकेडपेखन अनँयगराः मुरुक नपाय मरसलरेय अगुकेडपेःआ हाँयग भगवानराः, मुरुक नपाय बुताकून एटाः होड़कू एचेरेपे कता उदुः अवे।

¹⁰ “मड़ंगरे अपे हाँयरिकुःआ होड़कू मेरपे दोहोगान, मनदो नुँहू अपे हाँयरिकुःआ निकता होड़कूपे बड़ाँवयना; मड़ंगरे भगवान अपे मेरेय मयावागाडपे, मनदो नुँहू हाँय अपेय मयावारा।”

भगवान लगापे जियाः

¹¹ ने ईंगरिकुःआ सउंगताकू, अपे नाःआ चउंदीसरे दुरीन देसरिकुःआ होड़कू इयापे दोहोनतना। हनालगा अपे एचे कसूरगे लगा लहरावपेता हना बेलूर ललची ओंगोलकून अड़ाः एंडाय लगा गोड़न-पइयनकेडपेखनिंग असेयतना।

¹² अपे बेगर बिसवासी होड़कू तलारेपे दोनोहोन मेला, हँकू अपे ओपता घड़ीनकू बड़रातान हों, अपेराः लूर-नेवन नपाय दोहोन लगा इदा। दो भगवान होड़कूय फड़ियावता हना दिन, हँकुःआ होड़कू अपेराः नपाय बुता ञेलकेडखन भगवानकू जागता।

¹³ ईंगरिकुःआ सउंगताकू, अपे परबू लगा जमा हातपात होड़कूराः आड़रेपे दोहोन। मरंग राजा जमा होड़कू एचेरेय हातपातगेता। हनालगा अपे हाँयराः हुकुमपे मनाः।

¹⁴ बेलूर बुता होड़कू डंडियावकू लगा अरू नपाय बुता होड़कू मान मरजइतकू लगा मरंग राजा, मरंग हातपात होड़कूय वारकेरा। हनालगा अपे हँकुःआ हातपात होड़कूराः हुकुमपे मनाः।

¹⁵ भगवान चहाःतना, अपे नपाय बुतापे एचेगोड ञवन दो, बेगर लूरतेकू बड़राता हँकुःआ बोको होड़कूराः आह रिपूट जुवाःता।

¹⁶ अपे अजइतयनापे। हनते हों अपे भगवानरिकुःआ सेवकिया होड़कू हवे। हनालगा अपे अजइतयनाले, माःआन ओंगोलकेडखन कसूर जीव जियाः लगा बुइद अहापे तुलाय।

¹⁷ जमा होड़कूपे मान मरजइत, अरू बिसवासी होड़कू सुदा अलार-दुलारतेपे दोहोन, भगवानराः अकूस मनाः घड़ीनपे दोहोन अरू मरंग राजा होँपे मान मरजइतगेय।

ईसू मसीराः कटसिया सहाव

¹⁸ ने बेगारी होड़कू, अपेरिकुःआ मालिककू जमालेःआतेपे मान मरजइतकू अरू हँकूराः आड़रेपे दोहोन। अपे सुधा इदानकुःआ हँकुःआ मालिकूतापे एकला अलोपे मान मरजइतकू, मनदो कटराहा मालिकूतापे होँपे मान मरजइतकू लगा इदा।

¹⁹ भगवानराः ओंगोलपे सुदीकेड अते, अपे अनभनिया कटसियापे सहाव दो अपेराः जीव भगवान लगा भल-भलाय इदा।

²⁰ अपे बेलूर बुता बुताकेडखन कटसियापे सहाव दो, अपे लगा चिला नफा होयाःता? मनदो अपे नपाय बुता बुताकेडखन कटसियापे सहाव दो, अपेराः जीव भगवान भल-भलायगेता।

²¹ अपे नपाय बुता बुताकेडखन कटसियापे सहाव लगा भगवान अपेय राःकेडपेःआ। ईसू मसी अपे लगा कटसियाय सहावतेरा अरू हाँय अपे लगा मीटोंग चिनहा इया इदानिया, जेमहा अपे हों हाँय इयापे सहाव अवेय।

²² “हाँय तोनोंगाः मेरेय कसूरगाड, अरू हाँय एचेरे तोनोंगाः अडिग ओंगोल मेर दोहोगान।”

²³ हँकुःआ होड़कू हाँयकू बेग-हतावातिरिया दो, हाँय हनन इया बदला मेरेय कुदागाड। अरू कटसियाय सहावा, दो तोनोंगीग मेरेय हुड़कावगाड। मनदो हाँय नपायतेय फड़ियावगेता हाँयग भगवान एचेरेय भरसातेरा।

²⁴ हाँय अनँयग देहरे अबूराः कसूरे लदाव गोःतेडखन कुरूसरेय गोएगनेना, जेमहा कसूर बदीरे गोएगतोबू दोहोन, अरू भगवानराः ओंगोल इया नपाय जीवबू जियाव अवेन। हाँयराः घाँवकूनते अबूराः जमा बरानाः बेमरियाकून नपाययना।

²⁵ मड़ंग अपे भेड़ाकू इया बेगर सरवाहातेपे दँड़ा हड़ाःआ, मनदो नुँहू अपे अपेरीग सरवाहा अरू तिहादार एचेरेपे कुदा वेगकिया।