1 पतरस 1 - Korwa Bible

पतरस अगीते मसी सलाम

¹ ईंग पतरस, ईसू मसीरीग मूक चेला, पुंतूस राइजरे, अरू गलातिया राइजरे, अरू कपादूकिया राइजरे, अरू आसिया राइजरे, अरू बितुनिया राइजरे, दुरीन देसरिकुःआ होड़कू इया सितिर-बितिरकियानखनपे दोहोनता भगवानरिकुःआ सुनावतो होड़कू, अपे लगा नाःआ चिठीयिंग ओजाःगेतना।

² ईसू मसीराः कता मनाः लगा, अरू हाँयराः बलंगीते सुद होयाः लगा, अपांग भगवान ओंगोल दोहोकेडपेखने सुनावकेडपेःआ अरू आँयगराः सुद बिरुवाते अपेय सुदकेडपेःआ। दो भगवान जमालेःआते अपेराः जीव मयावा लगा अरू सलसतगे लगायिंग अरजीतना।

ओरो टुटीगनेना हना असरा

³ अबूरीग परबू ईसू मसीरीग अपांग भगवानिंग जागगेयता। हाँय अबू मुरुके मयावाडबुःआ अरू ईसू मसी गोएगतो होड़कू अतेय जियाव रेमकिडिगखन अबू लगा नँवा जीवे एमेकेरा, जेमहा अबू एचेरे, ओरो टुटीगनेना हना असरा दोहोन।

⁴ अरू भगवान अनँयगरिकुःआ होड़कू लगा सेरमो देसरेय दोहोकेरा कहियो ओरो सेयानेना सहे ओरो बेलूरनेना सहे ओरो बदलावनेना हना इताड पवाः लगाबू असरागोड ञवनतना।

⁵ भगवान अपे जमालेःआतेय सडावपेता हना कता, टुटीगगुःता हना दिनरेय एचे सुदीगोडपेता। अरू हना दिन वरी अपेराः बिसवासते हाँय अनँयग जंगरतेय बनसाव दोहोगोडपेता।

⁶ हुडिंग बेला वरी नुँहू अपेके जमा बरानाः कटसिया ससहाव पराः दो, अपे बहालतेपे दोहोन।

⁷ तोनोंग दिनरे लाय जुवाःता हना सोना हों नपाय होयाः लगा सेंगेलरेकू गरावगेता। अपेराः बिसवास सोना अते मुरुक नपाय इदा, अरू हना बिसवास सताय हवे माःआन जासबाःका लगा, नाःआ कटसिया अपेराः जीवरे होयाःता। अरू ईसू मसी अनँयग आँयग होड़कू एचेरेय एचे ञिलुः मेला, अपेराः सताय बिसवास बदीरे भगवान अपे मरंगे ओंगोलपेता अरू अपे बदीरे भल-भलायकियानखने मान मरजइतपेता।

⁸ अपे नुँहू वरी ईसू मसी मेरपे ञेलगडिया। हनते हों अपे हाँयपे दुलारतना। अपे नुँहू हों हाँय मेरपे ञेलेयतना, हनते हों अपे हाँय एचेरेपे बिसवासगोड ञवनतना, अरू ओरोपे उदुः चबा अवेतेरा हना मुरुक बगरा बहालते इदानपेःआ।

⁹ अपे हाँय एचेरेपे बिसवासकेड अते अपेराः जीव सडावयना। हनालगा अपेराः जीवरे नाःआ बहाल इदा।

¹⁰ भगवान अपेय मयावाता हना बदीरे हाँयराः बड़रा कता होड़कू मड़ंगरेकू कता उदुःतेरा। अरू भगवान होड़कूय सडावता ननानाः कता बदीरे, मुरुक नपायतेकू जासबाःगोतेरा।

¹¹ मसीराः सुद बिरुवाते हँकुःआ होड़कू, मसी करा उड़ी कटसियाय सहावता अरू हना तयोमरे भगवान हाँय करा उड़ीय मान मरजइतगेयता, हना बदीरे मड़ंगरेकू कता उदुःतेरा। हनालगा भगवानराः बड़रा कता होड़कू, नाःआ जमाकून करा इया होयाःता अरू तुमिस होयाःता, हना सुदीगे लगा मुरुककू कुरनिस सोतेडा।

¹² हँकू अँननकूराः नफा लगा कोवान, मनदो नपाय सरवनकू अयुमेता हँकुःआ होड़कू लगाकू सेवाःआ, माःआन भगवान हँकूय एचे सुदीवातेडकुःआ। अरू नाःआ बेलारे, भगवान सेरमो देस अतेय वारकेरा हाँयग सुद बिरुवाराः जंगरते पपरसार होड़कू अपे एचेरे, सेरमो देसरिकुःआ बराहीलकू हों बुझाः लगाकू तरसाःतना, हना नपाय सरवनकू परसारकेरा।

सुद जीव जियाः बदीरे

¹³ हनालगा ईंगरिकुःआ अजी बोपोहकूतिंग, अपे नपाय एचेय लगा सपड़ावतोपे दोहोन अरू ओंगोल समझाव घड़ीनपे दोहोन। अरू ईसू मसी अनँयग आँयग एचे ञिलुः मेला भगवान अपेय मयावा लगापे असरागोड ञवन।

¹⁴ अपे भगवानराः कता मनावतो लइंकू इदानपेःआ। हनालगा अनसिनहारपे दोनोहोन मेलाराः बेलूर ओंगोलकून अपेराः जीवरे अहापे मेसा ओवा।

¹⁵ मनदो अपेय राःकेडपेःआ हाँयग सुद भगवानराः लूर-नेवन इया अपे हों जमा बरानाः सुद होनोयाः इदा।

¹⁶ भगवानराः कागदरे नाःआ इया ओजाःतो इदा, “ईंग सुद इदानिंगा, हनालगा अपे हों सुदपे बड़ाँः।”

¹⁷ अपे अरजी मेला अपांग माःआन कताकेडखनपे रगेयता हाँयग भगवान, जमाकू अँननकूराः बुता इया बेगर पाचपटीतेय फड़ियावकूता। हनालगा अपे नाःआ चउंदीसरे दुरीन देसरिकुःआ होड़कू इया भगवानराः अकूस मनाः घड़ीनपे जियाः।

¹⁸ अपे नपायतेपे सुदीयतना, अपेरिकुःआ खुटिपरिया होड़कू सलाव वेगा हना बेगर मतलोबाः लूर-नेवन अते, लाय एंडा जुवाःता हना चाँदी सहे सोनाते भगवान अपे मेरेय सडावगाडपेःआ,

¹⁹ मनदो बेगर गारबार अरू बेगर कसूरते इदानिया हाँयग भेड़ा होन ईसू मसीराः मुरुक किमइताः बलंगीते भगवान अपेय सडावकेडपेःआ।

²⁰ भगवान चउंदीस तुला अते मड़ंग, ईसू मसीय सुनाव दोहोतिरिया, मनदो चउंदीस टुटीगगुःता हना अते मड़ंग दिनरे, अपे लगा भगवान हाँये उदुःवातेडपेःआ।

²¹ भगवान ईसू मसी गोएगतो होड़कू अते जियाव रेमकेडखने मान मरजइतकिडिया, जेमहा अपेराः बिसवास अरू असरा, भगवान एचेरे टक-टकावतो दोहोन।

²² अपे सताय कता मनावकेडखन अपेराः जीवपे सुदकेरा, जेमहा अपे अँननपे सतायते अपेराः इनिंदरी इंदरीते अरूपे अलार-दुलार होड़ेंग।

²³ अपेराः नँवा जनम तोनोंगाः लाय जुवाःता हना जिनिसते मेर होयागना, मनदो जीव एमेयता अरू कहियो ओरो टगावनेना हना भगवानराः सरवनते होयाकिया।

²⁴ भगवानराः कागदरे नाःआ इया ओजाःतो इदा; जमा होड़कू बीर इया इदानकुःआ, अरू हँकू पहाड़ बहाकून इया सुघर इदानकुःआ; बीरकून गोसो जुवाःता अरू बहाकून कसड़ जुवाःता,

²⁵ मनदो भगवानराः सरवन कहियो ओरो टगावनेना। अरू ननानाः सरवन अपे एचेरे पपरसार होड़कू परसार उदुःतेरा।