1 कुरिंती 9 - Korwa Bible

ईसूरिकुःआ मूक चेलाकूराः हकतियार

¹ ईंग एएचे लगायिंग ओंगलेता हना ओरोयिंग एचे अवेतेरा जा? ईंग हों ईसूरीग मूक चेला ना लवे जा? ईंग अबूरीग परबू ईसू मेरिंग ञेलगतिरिया जा? अपे परबू ईसू बदीरेयिंग उदुःवातेडपेःआ अते हाँय एचेरे मेरपे बिसवासगेतना जा?

² अदोम होड़कू कतायतना, पउलूस ईसू मसीरीग मूक चेला ना लवे, माःआन। मनदो अपे ईंग ईसूरीग मूक चेला हवे माःआन अपे जीवरेपे ओंगोल दोहोबाःकाडिंगा। अपे ईसू एचेरेपे बिसवासकेरा हना ञेलकेडखन होड़कू सुदींगता, पउलूस ईसू मसीरीग मूक चेला हवे, माःआन।

³ अपे अते तोनोंग तोनोंग होड़कू होंबरेयिंगता, सतायरे आम ईसूरीग मूक चेला हवे जा कोवान? दो हँकूयिंग कता कुदावाता,

⁴ ईसूराः सेवा मेला ईंग अरू बरनाबास अपे एचेरे ओरोलिंग जोम ञू अवेतेरा जा?

⁵ पतरस अरू ईसूरिकुःआ एटाः मूक चेलाकू अरू ईसूरीग बोहोत, हँकू अँननकूरिकुःआ एपेराकू सुदा ईसूराः नपाय सरवनकू कता उदुःता। दो हँकू इया अलिंग हों ओरोलिंग एचे अवेतेरा जा?

⁶ ईंग अरू बरनाबास एकला जोम-ञूय लगा तितिहा इदा जा?

⁷ तोनोंगीग सइना होड़ अनँयग आँयग लगा बरेलाय तिहायता जा? तोनोंगीग किसाड़ अंगूर रोपाकेडखन हनाराः जोःओ मेरेय जोमता जा? जानरकूरीग सरवाहा अनँयगरिकुःआ जानरकूराः दूद मेरेय ञूयता जा?

⁸ नाःआ कता ईंग इनिंगराः ओंगोलते मेरिंग कतायतना अरू भगवानराः कागदरे हों ननन इया कतायता।

⁹ अरू हान मोसेसराः नियमरे नाःआ इया ओजाःतो इदा, दउरी मेला उरीगराः आह अलोपे तोल रेडे। दो भगवान उनुरीगकू एकला लगाय ओंगलेता जा?

¹⁰ अबू लगा कोवानेःआ जा? भगवानराः कागदरे नाःआ इया अबू लगा ओजाःतो इदा, हड़ सी होड़ अरू एएन होड़, बनर होड़ हुड़ू हटिंग मेला अँनकिनराः बंटाकिन पवाःता हना असरा घड़ीनकिन बुताता।

¹¹ मी होड़ किसाड़ हुड़ूय वेरता, हनन इया अलिंग अपे एचेरे नपाय सरवनलिंग परसारतेरा। दो अपे अते नफालिंग पवाःता हना नपाय कोवानेःआ जा?

¹² ईसूरिकुःआ एटाः मूक चेलाकू अपे अते नफाकू पवाव अवेन दो अलिंग अपे अते अरू बगरा नफा पवाः लगा हातपात इदा। हनते हों अलिंग मेरलिंग हातपातगाड, मनदो अलिंग जमा बरानाः कटसियालिंग सहवेता, जेमहा ईसू मसीराः नपाय सरवन अपे बिसवासगे लगा अलिंग अगीते तोनोंगाः टटी-बेड़ा अहा होयाः।

¹³ अपे मेरपे सुसुदीतना जा, भगवानराः ओड़ाःरेकू सेवाता हँकुःआ होड़कू हनानाःतेकू जोमता, अरू धामरे बलिदानकू देगता हँकुःआ होड़कू हनानाः बलीदानतेकू जोमता?

¹⁴ हनन इया नपाय सरवनकू परसारता हँकुःआ होड़कूराः गुजर मसर नपाय सरवन पनरसार परसारते होयाः लगा इदा। नाःआ कता पनरबू हमाय हुकुमकेरा।

¹⁵ मनदो ईंगराः गुजर मसर सलाव लगा नाःआ इयाःआ तोनोंगाः मेरिंग हकतियारगाड। अरू नुँहू वरीते अपे अते नफा पवाः लगा हों नाःआ इया मेरिंग ओजाःगेतना। ईंग इनिंग मिहनइतकेडखन ईंगराः गुजर मसरिंग सलावता हना बदीरे ईंग मेरिंग बड़वार अवेकुः दो ईंग गोनेग जुवाः नपाय इदा।

¹⁶ ईंग नपाय सरवनिंग परसारतान दो नाःआ बदीरे बड़वार लगा ईंग एचेरे तोनोंगाः दूर कोवानेःआ। पपरसार लगा इनिंगके गरज इदा। अरू ईंग मेरिंग परसारगेतान दो ईंग जीव ठीक जुवाःता।

¹⁷ ईंग इनिंगराः हिछातेयिंग परसारगेतान दो हनाराः इमानिंग पवाःता। मनदो ईंगे जिमेवारा, हनालगा ईंगके पपरसार पनाराःता।

¹⁸ दो ईंगराः इमान चिला हवे? ईंग नपाय सरवन बेगर दामतेयिंग परसारगेता अरू सरवन परसारकेडखन हनाराः इमान पवाः लगा अपे एचेरे ईंगराः हकतियार मेरिंग उपयोतगेता। अरू हनानाः ईंगराः इमान हवे।

¹⁹ ईंग तोनोंगीगरीग बेगारी होड़कू ना लवे। मनदो ईंग जमा होड़कूरीग बेगारी होड़िंग बड़ाँवकिया, जेमहा मुरुक होड़कू ईसू एचेरेकू बिसवास अवेय।

²⁰ ईंग एहूदाकू तलारे दोहोन मेला एहूदाकू इयायिंग बड़ाँवनेना, जेमहा हँकू ईसू एचेरेकू बिसवास अवेय। ईंग मोसेसराः नियमराः आड़रे कोवायिंगा। हनते हों हना नियमकू मनाःता हँकुःआ एहूदाकू तलारे ईंग दोहोन मेला, हँकुःआ होड़कू इयायिंग बड़ाँवनेना, जेमहा हँकू ईसू एचेरेकू बिसवास अवेय।

²¹ मोसेसराः नियम मेरकू पवावगना हँकुःआ होड़कू तलारे ईंग दोहोन मेला, हँकुःआ होड़कू इयायिंग बड़ाँवनेना, जेमहा हँकू ईसू एचेरेकू बिसवास अवेय। ईंग मोसेसराः नियम टड़ावीग होड़ कोवायिंगा, मनदो ईसू मसी चेडकिरिंगा हनन इया हना नियमिंग मनाःता।

²² बिसवासरे अबड़ जीव होड़कू लगा ईंग हँननकू इयायिंग बड़ाँवनेना, जेमहा हँकू बिसवारेकू बड़ियाड़ जुवाः। ईंग जमा होड़कू लगा अँननकू इयायिंग बड़ाँवनेना, जेमहा ईंग अते तोनोंग इया ईसू मसी एचेरेकू बिसवासगे लगा हँकूके आँच पराः।

²³ जमा होड़कू नपाय सरवन बिसवासगे लगा ईंग नाःआ इयायिंग एचेयतना, जेमहा हँकुःआ होड़कू इया भगवान ईंगराः जीव होंय नपायगे।

²⁴ अपे मेरपे सुसुदीतना जा, इमान पवाः लगा बतकाः होड़कू जमाकू बतकाःता, मनदो मिनी होड़ इमाने पवाःता? दो अपे जिताःराः ओंगोलरेपे बतकाः।

²⁵ एनेगताकू हँकुःआ होड़कू गोसो जुवाःता हना सकमराः खोपा इमान पवाः लगा जमालेःआ मुरुक सहाव घड़ीनकू पिरिसटिकगेता। मनदो अबू कहियो ओरो कहीनेना हना इमान पवाः लगा सहाव घड़ीन भगवानराः बुताबू एचेयतना।

²⁶ हनालगा ईंग अंटो-घंटो होड़कू इया सहे होय सुदाकू घुसाता, हँकुःआ होड़कू इया भगवानराः बुता मेरिंग बुतातना।

²⁷ ईंग होड़कू एचेरे नपाय सरवनिंग परसार तयोमरे, ईंगराः सेवा भगवान मड़ंगरे बेगर लूर होया जुवाः दो ईंग लगा चिला नफा इदा? हनालगा ईंग इनिंगराः देह दगलीकून ओंगोल समझाव घड़ीन बेगारीयिंग बड़ाँवगेता।