1 कुरिंती 7 - Korwa Bible

बियाह बदीरे चेडतो

¹ दो अपे ईंग एचेरे ओजाःकेडखनपे होंबोरतेरा हना कता बदीरेयिंग कता कुदायतना। अपे होंबोरतेरा, तोनोंगीग मरद एटाः अइमीराः तिःई साब अवेयता जा?

² बुरी, नाःआ इया कोवान। अपे सनहा-सनही बुता अते बनसाः लगा मेमेडटोंग मरदकू लगा मेनेमेटोंग एपेराकू अरू मेमेडटोंग अइमीकू लगा मेनेमेटोंग हेपेरेलकू दोहोन लगा इदा।

³ मरद अनँयग अइमीराः हिछा पुराव लगा इदा अरू हनन इया अइमी हों अनँयग मरदराः हिछा पुराव लगा इदा।

⁴ तोनोंगीग अइमीराः देह दगली अनँयग लगा कोवानेःआ, मनदो अनँयगरीग मरद लगा इदा। हनन इया तोनोंगीग मरदराः देह दगली अनँयग लगा कोवानेःआ, मनदो अनँयगरीग अइमी लगा इदा।

⁵ तोनोंग इया होयाः, अलोपे बरजाव होड़ेंग। मनदो तोनोंग बेला वरी, अरजी लगा मी रायकियानखन एटाः एटाःरेपे दोहो अवेनता। हना तयोमते अपे मिनीरेपे जुमाव जुवाः, अरू अपे संभाड़गुः घड़ीनपे दोहोन अते कलउ अपे अरोय अंदजाव अवेतेडपेःआ।

⁶ नाःआ, हुकुम इया मेरिंग कतायतना, मनदो मीटोंग सलाहिंग एमेयतना।

⁷ हनते हों ईंग चहाःतना, जमा मरदकू इनिंग इया बेगर बियाहतेकू दोहोन। मनदो जमा मरदकू भगवान अते एटाः एटाः इयाःआ दहिनकू पवावकिया, मी होड़ लगा मी बरानाः अरू एटाःयीग लगा एटाः बरानाः।

⁸ डिंडाकू अरू रंडियाहीनकू लगा ईंगराः सलाह ननानाः हवे, अपे इनिंग इया डिंडापे दोहोन दो ननपाय दोहोनता।

⁹ मनदो अपे अँननपे मेरपे संभाड़ अवेगुः दो अपे बियाह जुवाःपे। अपे लहाः लहाः लगातना अते बिनियाह जुवाः अपे लगा ननपाय इदा।

¹⁰ बियाह होयायना हँकुःआ होड़कू मिनीरे दोहोन लगा परबू अगीतेयिंग हुकुमगेतना। तोनोंगीग अइमी अनँयग मरद अते अलोय हिगारगुः।

¹¹ हाँय हिनिगार जुवाः दो हाँय अलोय सगइगुः निही दो अनँयगरीग मरद अगीय कुदा तयोम जुवाः। अरू हनन इया तोनोंगीग मरद हों अनँयगरीग अइमी अलोय अड़ाःगेय।

¹² ईंग कतायतना हनापे अयूम। नाःआ कता परबू मेरेय कतायतना मनदो ईंग इनिंग अगीते एटाः होड़कूयिंग कतावातना, तोनोंगीग बिसवासी होड़रीग अइमी ईसू एचेरे मेरेय बिसवासगेतान अरू हाँय अनँयगरीग हेरेलतो सुदा दोहोन लगा राजूरे इदानिया, दो हाँय हाँयग अइमी अलोय बइ एंडागेय।

¹³ तोनोंगीग अइमीरीग हेरेलतो ईसू एचेरे मेरेय बिसवासगेतान अरू हाँय अनँयगरीग एरात सुदा दोहोन लगा राजूरे इदानिया, दो हाँय हाँयग मरद अलोय बइ एंडागेय।

¹⁴ तोनोंगीग बिसवासी अइमीरीग हेरेलतो मेरेय बिसवासगेतान हों, हाँयग अइमी बिसवासगेतान अते हाँयगरीग हेरेलतो हों सुदे बड़ाँव जुवाःता अरू हनन इया बिसवासी मरदरीग एरात मेरेय बिसवासगेतान हों, हाँयग मरद बिसवासगेतान अते हाँयगरीग एरात हों सुदे बड़ाँव जुवाःता। निही दो अपेरिकुःआ लइंकू सुद ओरोकू दोहोकुःआ, मनदो नुँहू हँकू सुद इदानकुःआ।

¹⁵ भगवान अबू हेल-मेलरे दोहोन लगाय राःकेडबुःआ। हनालगा तोनोंगीग अइमी सहे मरद परबू एचेरे मेरेय बिसवासगेतान अते बियाह हटकावकियाय हना अड़ाः एंडागे लगाय चाहाःतान दो, हनन इया होनोया ओवापे। हनते हाँयग अइमी सहे मरद बियाहनेनाकिन हना अटकाररे मेरकिन दोहोनता।

¹⁶ दो ने अइमी, आम करा उड़ीम सुदी अवेयता आमरीग हेरेलमे एचे सडाव अवेता? अरू ने मरद, आम करा उड़ीम सुदी अवेयता आमरीग एराममे एचे सडाव अवेता?

जमालेःआरे संतोकरेपे दोहोन

¹⁷ नाःआते हों परबू मेमेड होड़ लगाय जिमाकेरा हना दहिन इया अरू भगवान राःकेडकुःआ हनन इया जमा होड़कू जियाः लगा इदा। जमा कलसियारिकुःआ होड़कू लगा ईंगराः हुकुम ननानाः हवे।

¹⁸ तोनोंगीग होड़ खतनानेनाय हना तयोमरे भगवान हाँये राःकेरा दो हाँय खतनाराः चिनहा अलोय चलाःगे। तोनोंगीग होड़ मेरेय खतनागान हनमेला भगवान हाँये राःकेरा दो, हाँय खतनान लगा अलोय ओंगले।

¹⁹ खतनान सहे मेरेय खतनान, बनरते तोनोंगाः मतलोब कोवानेःआ। मनदो भगवानराः हुकुम मनानाः मइद हवे।

²⁰ मेमेड होड़कू भगवान राःतेडकुःआ हनमेला कर करा उड़ीकू दोहोना, हनन इयाकू दोहोन।

²¹ भगवान आमे राःतेरा हनमेला बेगारी होड़मे दोहोना दो हना बदीरे अलोम ओंगोल कुहकाः। मनदो आम अजइतमे पवाव अवेन दो हना दाव नपायतेम उपयोतगे।

²² परबू तोनोंगीगे राःतेरा हनमेला हाँय बेगारी होड़े दोहोना हों, हाँय परबूरीग अजइततो होड़ हवे। हनन इया अजइते दोहोना हनमेला परबू राःकिरिया हाँयग होड़ मसीरीग बेगारी होड़ हवे।

²³ अरू भगवान अपेराः किमइत एमेकेडखने किजाकेडपेःआ। हनालगा अपे तोनोंगीग एटाः होड़कूरिकुःआ बेगारी होड़कू अलोपे बड़ाँः।

²⁴ ईंगरिकुःआ अजी बोपोहकूतिंग, अपे भगवान राःतेडपेःआ हनमेला कर करा उड़ीपे दोहोना, हनन इया अपे भगवान सुदापे दोहोन।

रंडियाहीनकू अरू डिंडा धंगड़ीकू बदीरे चेड

²⁵ दो डिंडा इदानकुःआ हँकू बदीरे परबू अगीते ईंग एचेरे तोनोंगाः हुकुम कोवानेःआ। मनदो ईंगराः मीटोंग सलाहिंग उदुःवापेतना। भगवान ईंगे मयावारा, हनालगा अपे ईंग एचेरेपे भरसा अवेयता।

²⁶ नाःआ बेलाराः कटसिया बदीरेयिंग ओंगलेता दो होड़कू हँकू कर करा उड़ी इदानकुःआ हनन इयाकू दोहोन हँकू लगा नपाय इदा।

²⁷ तोनोंगीग अइमी सुदा आमराः बियाह होयायान दो, हाँय अड़ाःगे लगा अलोम कुरनिसगे। अरू आमराः बियाह मेर होयागान दो अइमी अलोम ञाम अगूगेय।

²⁸ मनदो आम बिनियाहगुः दो हन कसूर ना लवे। ननन इया तोनोंगीग डिंडा धंगड़ी बियाहगुः दो हाँय मेरेय कसूरगेतना। हनते हों बियाहगुःताकू हँकुःआ होड़कू लगा नाःआ चउंदीसरे मुरुक कटसिया होयाःता। हनालगा अपे हना कटसियाते बनसाःपे लगायिंग चहाःतना।

²⁹ ने ईंगरिकुःआ अजी बोपोहकूतिंग, ईंग कतायतना, अबू लगा बगरा बेला कोवानेःआ। हनालगा नुँहू वरीते अइमी इदानिया हाँयग होड़ आँयगरीग अइमी दुलाररे अलोय केड़ेकुः।

³⁰ अरू इयामताकू हँकुःआ होड़कू मेरकू इयामगान हना इयाकू दोहोन, अरू बहालगुःताकू हँकुःआ होड़कू मेरकू बहालगान हना इयाकू दोहोन, अरू किजायताकू हँकुःआ होड़कू कहिसाः कोवानेःआ हना इयाकू दोहोन।

³¹ अरू चउंदीसराः जिनिसकूनकू एमे होड़ेंगता हँकुःआ होड़कू चनउंदीसराः जिनिसकून लगा टक-टक अलोकू दोहोन। नाःआ चउंदीस नुँहुःआ बेला वरीते अनाड इदीनतना।

³² अपे चउंदीसराः कताकून बदीरे अलोपे ओंगोल कुहकाः लगायिंग चहाःतना। डिंडा होड़कू परबू ननायगेय लगाकू ओंगोल कुहकावगोड ञवनता।

³³ मनदो बियाहतो मरदकू चउंदीसराः कताकून बदीरे ओंगोल कुहकाःरेकू दोहोनता। हँकू अँनकूरिकुःआ अइमीकू ननायकू लगाकू ओंगोल कुहकावगोड ञवनता।

³⁴ हनालगा हँकू जीव बार बंटा दोहोनता। हनन इया डिंडा धंगड़ीकू अरू मेरकू बियाहगना हँकुःआ अइमीकू, परबूराः कताकून बदीरेकू ओंगोल कुहकावगोड ञवनता। हँकू अँननकूराः देह अरू इंदरी भगवान लगा जिमा घड़ीन सुद जीवकू जियाःता। मनदो बियाहतो अइमीकू चउंदीसराः कताकून बदीरे ओंगोल कुहकाःरेकू दोहोनता। हँकू अँनकूरिकुःआ मरदकू ननायकू लगाकू ओंगोल कुहकावगोड ञवनता।

³⁵ अपेराः नफा लगा नाःआ कतायिंग कतायतना। अपे रोंकावपे लगा मेरिंग कतायतना, मनदो अपेराः नपाय हलाइत अरू बगरान लगा अरू मिनी जीवकियानखन परबूपे सेनेवागोड ञवन लगायिंग कतावापेतना।

³⁶ तोनोंगीग होड़ ओंगलेतना, ईंग लगा मंगा-बराकिडिगखन बियाहगेय लगाकू ओंगोल दोहोतिरिया हाँयग डिंडा अइमीराः उमइर सलाःतना अरू हाँय मेरिंग बियाहगेतान अते हाँय सुदा नपाय मेरिंग एचेतना, माःआन। दो हाँय बिनियाहगेये अरू हना कसूर ना लवे।

³⁷ मनदो हाँय तोनोंगीग रेनहागेयता हना अते कोवान मनदो अनँयग जीवरे ओंगोलबाःगुःताय, ईंग ओरोयिंग बियाहनेना, माःआन दो हाँय हों नपाये एचेयतना।

³⁸ दो बियाहगुःताय हाँयग होड़ नपायगेताय, मनदो मेरेय बियाहगुःता हाँयग होड़ अनारूय नपायगेता।

³⁹ हेरेलतो जीयत दोहोन वरी एंगातुकू हेरेलतो सुदा हटकावतो दोहोन इदा। हेरेलतो गोएग जुवाः दो हाँय अनँयग हिछा इयाय सगइ अवेनता। मनदो हाँय बिनिसवासी होड़ सुदा एकला सगइगुः लगा इदा।

⁴⁰ मनदो ईंगराः ओंगोलरे हाँयग रंडियाहीन रनंडियाहीने दोहोन दो हाँय बहालतेय दोहोनता। अरू ईंग ओंगलेतना भगवानराः बिरुवा ईंग एचेरे हों इदा।