1 कुरिंती 6 - Korwa Bible

कोट कछेरीरे सेन अते सेताव

¹ अपे अते तोनोंयग तोनोंयग होड़कू कड़ी होड़ेंग जुवाःतान दो, हना फड़ियाव लगा बेगर बिसवासी होड़कूराः कोट कछेरीरे चिला लगापे सेनता? अरू अपे भगवानरिकुःआ सुद होड़कू एचेरे चिला लगा मेरपे सेनता?

² अपे मेरपे सुदीतना जा भगवानरिकुःआ सुद होड़कू चउंदीसरिकुःआ होड़कूकू फड़ियावता? दो अपे चउंदीसरिकुःआ जमा होड़कूपे फड़ियावकू लगा इदा दो गुन लकनाः कड़ीगकून ओरोपे फड़ियाव अवेतेरा जा?

³ अपे मेरपे सुसुदीतना जा, अबू सेरमो देसरिकुःआ बराहीलकू हों फड़ियावताबू? ननन इया इदान दो, अपे सेबा सेबाःआ कताकून बदीरे अरू तुमिनपे फड़ियाव अवेयता!

⁴ अपे सेबा सेबाःआ कताकून बदीरे फड़ियावगे लगा इदान दो, कलसियारिकुःआ होड़कू मेरकू मान मरजइतकूता हँकुःआ फड़ियावदारकू एचेरेपे एचे फड़ियावगेता जा?

⁵ अपे एचे गियूपे लगा नाःआ कतायिंग कतायतना। बिसवासी होड़कूराः सेबा सेबाःआ कताकून फड़ियावगे लगा अपे अते तोनोंगीग कनहूनदार कोनोवाया जा?

⁶ मनदो अपे बिसवासी होड़कू एटाः बिसवासी होड़कू सुदापे तररा-तररीता, अरू हान हों बेगर बिसवासी होड़कू मड़ंगरे।

⁷ अपे एचेरे तररा-तररी होयाःतना दो अपे मनाड़ंगते हरावतो इदानपेःआ। अपे तोनोंगीगराः गारबार चिला लगा मेरपे सहवेता?

⁸ मनदो अपे एटाः होड़कू एचेरेपे गारबारगेतना अरूपे अडिगगोडकूता, अरू हन हों बिसवासी होड़कू एचेरे।

⁹ अपे मेरपे सुसुदीतना जा गारबार होड़कू भगवानराः राइजरे इताडदारकू ओरोकू बड़ाँवनेना? तोनोंगीग अपे अहाकू अडिग अवेपे। एटाःकू सुदा बेलूर बुताकून बुता होड़कू, अरू मुरती सेवा होड़कू, अरू बियाहगुः तयोमते सनहा-सनही एचे होड़कू, अरू बंदरा होड़कू, अरू मनारद मरदकू सुदा घोड़ा होड़ेंग होड़कू,

¹⁰ अरू इनिग होड़कू अरू लुभिया होड़कू, दारू बोः होड़कू, अरू ककाड़ी होड़कू, अरू अडिग जोम होड़कू, नाःआ नाःआ इयाकुःआ होड़कू भगवानराः राइजरे इताडदारकू कहियो ओरोकू बड़ाँवनेना।

¹¹ अपे अते अदोम होड़कू हनन इयाकुःआ होड़कू दोहोना। मनदो परबू ईसू मसी अपे सडावकेडपे अते अरू भगवानराः सुद बिरुवाराः जंगरते भगवान अपेराः कसूरे बुहाल एंडागोतेरा, अरूय सुदकेडपेःआ अरू आँयग ओंगोलरे बेगर गारबार होड़कूय बड़ाँवगोतेडपेःआ।

अँननपेराः देहते भगवानपे मान मरजइतगेय

¹² अपे अते तोनोंगीग कतायता, जमालेःआ एचेय लगा हकतियार ईंग एचेरे इदा। मनदो ईंग कतायतना, जमा दो नफा पवाः लगा कोवानेःआ। हनालगा तोनोंगाः कतारे ईंग जीव लहकाः लगा मेरिंग ओवाता।

¹³ अरू तोनोंगीग कतायता, जोम-ञूय जिनिस दोंगे लगा अरू दोंगे जोम-ञूय जिनिस लगा इदा। मनदो ईंग कतायता, भगवान बनरे लाय एंडागोडता। अरू अबूराः देह दगलीकून सनहा-सनही एचेय लगा कोवानेःआ। अबूराः देह दगलीकून परबूराः हवे। हनालगा अबूराः देह दगलीकून परबू सेवा लगा उपयोतगे लगा इदा अरू हनाँय हवे अबूरीग मालिक।

¹⁴ भगवान अनँयगराः जंगरते अबूरीग परबूय जियाव रेमकिरिया अरू हनानाः जंगरते हाँय अबू होंय जियाव रेमबूता।

¹⁵ अपे मेरपे सुसुदीतना जा, अपे मसीराः देह दगलीकून हवे? दो ईंग मसीराः देह दगलीकून गोःकेडखन सनही अइमी सुदा मिनी जुवाः लगायिंग जिमागोड जा? कहियो ओरो!

¹⁶ अपे ईंगपे अयूम! भगवानराः कागदरे नाःआ इया ओजाःतो इदा, “हँकिन बना होड़ मिनी देहकिन होया जुवाःता।” दो तोनोंगीग होड़ सनही अइमी सुदाय गेतेग दो, हाँय हाँयग सनही अइमी सुदाय मिनी जुवाःता।

¹⁷ मनदो परबू सुदाय जुटाःता हाँयग होड़राः बिरुवा, परबूराः बिरुवा सुदा मिनी जुवाःता।

¹⁸ अपे सनहा-सनही बुताकून अनाड़ाः एंडाबाःगोडपे। नाःआ कसूर अड़ाःकेडखन जमा बरानाः कसूरकून देह दगलीराः बहरी दोहोनता। मनदो तोनोंगीग सनहा-सनहीकूने एचेयतान दो हाँय कसूरकेडखन अनँयग देहे आडगोडता।

¹⁹ अपे मेरपे सुसुदीतना जा, अपेराः देह सुद बिरुवाराः डेरा हवे। अरू हाँयग बिरुवा भगवान अगीतेःआ दहिन हवे अरू हाँय अपे जीवरेय दोहोनता। दो अपे अँननपेरिकुःआ ना लवे।

²⁰ भगवान अपेराः किमइत एमेकेडखने किजाकेडपेःआ। हनालगा अपे अँननपेराः देहते भगवानपे मान मरजइत।