1 कुरिंती 5 - Korwa Bible

सनहा-सनही बदीरे फड़ियाव

¹ अपे तलारे तोनोंग तोनोंग होड़कू सनहा-सनहीकू एचेयतना माःआन सनातायतेयिंग अअयूमतना। अरू नाःआ इयाःआ बुता बेगर बिसवासी होड़कू हों मेरकू एचेयता। मी होड़ अनँयग हुडिंगीग एंगात सुदाय गेतेगतना।

² अरू नाःआ बदीरे अपे बड़वारतनापे। मनदो अपे नाःआ बदीरे अपे हदराः दोहोकुः दो, हाँयग होड़ अपे तलाते हिगार एंडागोडकेःआपे।

³ ईंग देनेह देहरे अपे सुदा मेरिंग दोहोन हों, जिनीव जीवरे ईंग अपे सुदा इदानिंगा। ईंग अपे तलारे इदानिंगा हना इया हाँयग होड़ हिगार एंडाय लगायिंग फड़ियावगोतेरा।

⁴ अपे ईसू मसीराः ञावते मिनीरेपे जुमाःतान मेला, अरू ईंग जिनीव जीवरे अपे सुदा परबू ईसूराः जंगरतेयिंग दोहोन मेला,

⁵ हाँयग होड़ कलउ एचेरेपे जिमागोडेय, जेमहा हाँय अनँयगराः बेलूर नेवन अते जीवे कुदा अवे अरू ईसू मसी कुदा वेगता हना दिन हाँयराः बिरुवा बनसाव जुवाः।

⁶ अपे हाँयग सनहा होड़ बदीरे चिला लगापे बड़वारतना? अपे मेरपे सुसुदीता जा, गुनमिनाः सेबेल सोड़ा जमा गोहोम गुंडा एचे पुड़सूड़गोडता, माःआन?

⁷ अबूरीग ईसू मसी पसहा परोबराः भेड़ा होन इया अबू लगाय बलिदानयना। अरू अपे बेगर सेबेल सोड़ा सोलोंगतो गोहोम गुंडा इया इदानपेःआ। दो हना गोहोम गुंडा नपाय दोहोन लगा, हना जुना सेबेल सोड़ा रेमगे एंडागोडपे।

⁸ दो नुँहू दो अबू परोब नपायतेबू मनाः। जमा बरानाः बेलूर ओंगोल इयाःआ जुना सेबेल सोड़ाते कोवान, मनदो सताय अरू नपाय ओंगोल इयाःआ बेगर सेबेल सोड़ातेःआ रुटीते परोबबू मनाः।

⁹ मड़ंग अपे लगायिंग ओजाःतेरा हना चिठीरेयिंग कतातेरा, अपे सनहा-सनहीकू एचेयता हँकुःआ होड़कू सुदा अलोपे मेसान।

¹⁰ अपे सनहा-सनहीकू एचेयता हँकुःआ होड़कू, सहे लुभिया होड़कू, सहे अडिग होड़कू, सहे मुरती सेवा होड़कू सुदा अहापे मेसान माःआन मी मुरुखिया मेरिंग कतायतना। नाःआ इया होयाः दो, अपेके नाःआ चउंदीस अड़ाः एएंडा पराःता।

¹¹ मनदो ईंग अपे एचेरेयिंग कतायतना, बिसवासी होड़कू अते तोनोंगीग होड़ सनहा-सनही, सहे लुभिया होड़, सहे ककाड़ी होड़, सहे दारू बोः होड़, सहे अडिग होड़ इदानीग दो, हाँय सुदा अलोपे मेसान अरू अलोपे जोम-ञूया।

¹² कलसियारे मेरकू वेगता हँकुःआ होड़कू फड़ियाव लगा ईंगराः बुता ना लवे। कलसियारिकुःआ होड़कू हमा अँननकू फड़ियाव होड़ेंगता।

¹³ भनगवान हमा बेगर बिसवासी होड़कूय फड़ियावता। हनालगा भगवानराः कागदरे ओजाःतो इदा हन इया, “हाँयग बेनेलूर बुता होड़ अपे तलातेपे उडुंग एंडागोडेय।”