1 कुरिंती 3 - Korwa Bible

बिसवासीकूराः बेगराव हटिंग बदीरे

¹ ने ईंगरिकुःआ अजी बोपोहकूतिंग, ईंग अपे सुदायिंग दोहोन मेला, सुद बिरुवा अगुवाइवाकूता हँकुःआ होड़कू सुदायिंग बुतुड़ुता इया अपे सुदा मेरिंग बुतुड़ु अवेगान। मनदो ईसू मसी एचेरे बिसवास बदीरे बती लइंकू इया अँननकूराः मनबिदियारेकू सलाःता हँकुःआ होड़कू एचेरेकू बुतुड़ुतान इया, अपे एचेरेयिंग बुतुड़ुःआ।

² अपे केटेग जिनिसकून इयाःआ चेडतो ओरोपे पसाव अवेकेःआ। हनालगा ईंग दूद इयाःआ रिता चेडतोयिंग चेडतेडपेःआ। अरू अपे नुँहू वरी केटेग जिनिसकून इयाःआ चेडतो पसाव जुकूर अरीनपेःआ।

³ नुँहू वरी अपे अँननपेराः मनबिदियारेपे सलाव ञवनतना। हनालगा अपे जीवरे इरा अरू कड़ीग इदा। दो अपे एचेरे कसूरराः लूर नेवन कोवानेःआ जा? अरू चउंदीसरिकुःआ होड़कूराः ओंगोल इया मेरपे सलाःतना जा?

⁴ अपे अते अदोमकू कतायतना, ईंग पउलूसरीग चेला हवे अरू एटाः होड़कू कतायता, ईंग अपोलोसरीग चेला हवे। दो अपेराः लूर-नेवन हों बेगर बिसवासी होड़कू इया मेर होयाःतना जा?

⁵ दो अपोलोस इये हवे? अरू पउलूस इये हवे? अलिंग दो हाँयरिकिनाः सेवकियाकिन एकला हवे अरू अपे अलिंगते परबू एचेरेपे बिसवासकेरा। मेमेड होड़ लगा भगवान जिमावाडलेःआ, हनानाः बुता एकलाले बुता ञवनतना।

⁶ ईंग रोपाकेरा, अरू अपोलोस दहावतेरा, मनदो भनगवान हमा हराकेरा।

⁷ हनालगा रोपाकेराय हाँय, सहे दहावकेराय हाँय, हँकिन बना होड़ कही कोवाकिना, मनदो भनगवान हमा जमाकूय हराबूतना।

⁸ रोपायता हाँयग होड़ अरू दहवेता हाँयग होड़, हँकिन बना होड़राः ओंगोल मिनी दोहोनता, अरू जमाकू अँननकूराः बुता इया बनीकू पवाःता।

⁹ दो मनइद कता ननानाः हवे, अलिंग भगवानरिकिनाः सेवा देंगवा होड़किन हवे, अरू अपे भगवानराः दोहोड़ इया इदानपेःआ। अरू अपे भगवानराः ओड़ाः इया हों इदानपेःआ।

¹⁰ भगवान ईंगे मयावारा। हना अते ईंग मी होड़ ओड़ाः तुला मिसतिरी इया हना ओड़ाःराः नेविंग गडातेरा। अरू हना नेव सेरमो एटाः होड़कू भीटकू रेमतना। अरू बुतातनाकू हँकुःआ होड़कू ञेल थिताव घड़ीन तुलाय लगा इदा।

¹¹ दो नाःआ ओड़ाःराः नेव इनीसू मसी एकला इदानिया। हनालगा हाँय अते एटाः तोनोंगाः नेव तोनोंगीग ओरोय गडा अवेतेरा।

¹² तोनोंगीग हना नेव सेरमो सोना, सहे चाँदी, सहे मुरुक किमइतराः दिरि, सहे टुटकू, सहे बुसुः, सहे पुदुलूसीगते ओड़ाःय तुलाय,

¹³ दो अंदजावराः दिनरे भगवान जमा होड़कूराः बुता नपाय इदा जा कोवान, हना सेंगेलतेय अंदजावगेता। अरू हनन इया मेमेड होड़राः बुता जमा होड़कू तलारे सेंगेलते भगवान एचे उदुःगेता।

¹⁴ तोनोंगीग होड़ बिसवासी होड़कूराः बिसवासे बड़ियाड़गेडतान दो फड़ियावराः दिनरे भगवान अगीते हाँय इमाने पनावाःता।

¹⁵ मनदो तोनोंगीग नाःआ इया मेरेय एचेतान दो, फड़ियावराः दिनरे हाँय इमान ओरोय पवावनेना। हनारे हों हाँय भगवानराः डंडियावतेय बनसाव जुवाःता अरू हाँयराः जीव लो बनसावतो ओड़ाः इया दोहोनता।

¹⁶ अपे मेरपे सुसुदीतना जा, अपे भगवानराः ओड़ाः हवे अरू हाँयराः बिरुवा अपे जीवरे दोहोनता?

¹⁷ अपे जमाकू भगवानराः सुद ओड़ाः इदानपेःआ अरू तोनोंगीग हाँयराः ओड़ाःय आड, दो भगवान हाँये लाय एंडागेयता।

¹⁸ अपे अँननपे अहापे अडिग जोम। अपे अते तोनोंगीग नाःआ चउंदीसराः ओंगोल इया कनहूनदारे ओंगलुःतान दो, हाँय मड़ंग अनँयग बेगर कनहूनदारे ओंगलुः, हनेःएना कनहूनदारे बड़ाँव अवेनता।

¹⁹ नाःआ चउंदीसरिकुःआ होड़कूराः कनहून भगवान मड़ंगरे बुयांगतो इया इदा। अरू हनानाः बदीरे भगवानराः कागदरे ओजाःतो इदा, “अँननकू कनहूनदारकू ओंगलुःता, हँकुःआ होड़कू अँननकूराः बुइदकूनते भगवान दाःकूता।”

²⁰ भगवानराः कागदरे नाःआ हों ओजाःतो इदा, “अँननकू कनहूनदारकू ओंगलुःता हँकुःआ होड़कूराः ओंगोल सदाःआ इदा माःआन परबू सुसुदीतना।”

²¹ होड़कूराः बदीरे अहापे बड़वार। जनामा अँननपेराः हवे,

²² पउलूस, सहे अपोलोस, सहे कइपा, सहे चउंदीस, सहे जियाः, सहे गुजुः, सहे नुँहू होयाःतना हना, सहे दरवाःआ हना, जमा बरानाः अँननपेराः नफा लगा इदा।

²³ अरू अपे ईसू मसीरिकुःआ हवे अरू ईसू मसी भगवानरीग हवे।