1 कुरिंती 16 - Korwa Bible

बिसवासी होड़कू संघरावा लगा बिहिरी

¹ नुँहू ईंग भगवानरिकुःआ सुद होड़कू अपेराः पुंजी पसर अते संघरावाकूपे लगायिंग ओजाःगेतना। नाःआ बदीरे गलातिया देसराः कलसियाकूनरिकुःआ होड़कू एचेरेयिंग कतातेरा, हनन इया अपे होँपे एचेय।

² जमा हपताराः मड़ंग दिन एतवार दिन अपेराः आन-धान अते हुडिंग हुडिंगपे बनसाव दोहोगे। दो ईंग अपे एचेरेयिंग सेन, हनमेला ईंगके बिहिरी उउतराव ओरो परावनेना।

³ ईंग कुरिंती सहररेयिंग सुदरुः दो अपे एचेरे मीटोंग चिठीयिंग एमेता। हनते अपे अते तोनोंग तोनोंग होड़कू हना चिठी अरू ढिबुवाकून गोःकेडखन एरुसलेम सहररे सेन लगा इदा। हना चिठी ञेलकेडखन एरुसलेमरिकुःआ बिसवासी होड़कू हँकुःआ होड़कूकू सिनहागोडता।

⁴ ईंगके हों सेन लगा दोहोन दो, हँकू ईंग सुदाकू सेने अवेनता।

पउलूस अनँयग सेन दूर बदीरेय कतायतना

⁵ ईंगके मकिदुनिया देस पार सेन लगा इदा। हना तयोमरे अपे सुदायिंग जुमाःता।

⁶ अपे सुदायिंग जुमाः दो तोनोंग बेला वरी अपे एचेरेयिंग दोहोनता। होया अवेन दो ईंग अपे सुदा ररंग बेला वरीयिंग दोहोनता। हना तयोमरे ईंग तोनोंग अगींग सेन मेला, ईंग संघरावाडिंगखनपे पइड़घावगोडिंग।

⁷ ईंग नुँहू अपे सुदा जुमाव पारगुः लगा मेरिंग चहाःतना। मनदो परबूराः ओंगोल इदान दो अपे सुदा बगरा दिन गुदरावगे लगायिंग चहाःतना।

⁸ ईंग पिंतिकूसतराः दिन वरी इपीसी सहररेयिंग दोहोनता।

⁹ नंडाकुःआ होड़कू मुरुककू घंटावगिंगतना। हनते हों नंडा परबूराः सेवा लगा ईंगके मुरुक दाव इदा।

¹⁰ अपे सुसुदीतना, तिमुतियूस ईंग इया परबूय सेवातना। हाँय अपे एचेरेय सेन दो बेगर बोरतेय दोहोन लगापे संघरावाय।

¹¹ हाँय हुडिंग अहापे ओंगलेय। अपे सुदा दोहोकियानखन हाँय ईंग एचेरेय कुदा वेगता। हनलगा अपे हाँय अहाल बहालतेपे पइड़घावगोडेय। तिमुतियूस एटाः बिसवासी होड़कू सुदा ईंग एचेरेय कुदा वेगता। हनालगा ईंग हाँयिंग टोहातना।

¹² एटाः बिसवासी होड़कू सुदा, अपे एचेरेय सेन लगा अपोलोस मुरुकिंग मंदरावतिरिया। मनदो हाँय सेन लगा मेरेय चहाःआ। हाँय एचेरे दाव दोहोन दो, हाँय अपे एचेरेय सेनेनता।

¹³ सवासितीपे दोहोन। बिसवासरे अलोपे टास मासगुः, मनदो डीड़गार अरू बनड़ियाड़पे दोहोन।

¹⁴ एटाः होड़कू दुलार घड़ीन जमालेःआपे एचे।

¹⁵ ने ईंगरिकुःआ अजी बोपोहकूतिंग, अपे सुसुदीतना अकाया देसरे इसतपनूसराः ओड़ाःरिकुःआ होड़कू मड़ंग ईसू एचेरेकू बिसवासतेरा। हँकू भगवानरिकुःआ सुद होड़कू संघरावा लगा मुरुक सपड़ावतोकू दोहोनता।

¹⁶ नाःआ इयाकुःआ होड़कूराः कतापे मनाः। अरू ननन इया मिहनइत घड़ीन ईसूराः सेवाकू सेवातना हँकुःआ होड़कूराः कता होँपे मनाः।

¹⁷ अपे जमाकू ईंग एचेरे मेरपे वेग अवेगना। मनदो अपे लगा इसतपनूस अरू पुरतुनातूस अरू अकइकूस ईंग एचेरे संघरावायिंग लगाकू वेगकिया। हनालगा ईंग जीव अहाल-बहालयना।

¹⁸ हँकुःआ होड़कू अपेराः जीवकू हड़ियाड़केरा हनन इया ईंगराः जीव होंकू हड़ियाड़गोतेरा। नाःआ इयाकुःआ होड़कूपे मान मरजइत।

टुटीग सलाम

¹⁹ आसिया राइजराः कलसियाकूनरिकुःआ होड़कू अपेकू सलामतना। अपे परबू एचेरेपे बिसवासगेतना। हनालगा अकवीला अरू हाँयरीग अइमी पिरिसकीराः ओड़ाःरेकू दुड़ुःता हँकुःआ बिसवासी होड़कू सुदा अपे हिया घड़ीनकू सलामपेतना।

²⁰ जमा कलसियारिकुःआ होड़कू अपेकू सलामपेतना। अपे जमा बिसवासी होड़कू सुद ओंगोल अरू मसी दुलारतेपे सलाम होड़ेंग।

²¹ ईंग पउलूस नाःआ सलाम इनिंग तिःईते अपे लगायिंग ओजाःगेतना।

²² तोनोंगीग परबू मेरेय अलार-दुलारगेय दो, हाँय सती-सरापतो इदानिया। ने अलेरीग परबू, वेनेगबाःकनमे।

²³ परबू ईसू अपेय मयावा।

²⁴ अपे जमाकू ईसू मसी एचेरेपे बिसवासगेतना। हनालगा ईंग अपेयिंग अलार-दुलारतना। आमीन!