1 कुरिंती 15 - Korwa Bible

ईसू मसीराः जियाव रिमुः

¹ ने ईंगरिकुःआ अजी बोपोहकूतिंग, ईसू मसीराः नपाय सरवन अपे मड़ंगिंग कता उदुःवातेडपेःआ। अरू हनानाः सरवन अपे नुँहू उहियारगे लगायिंग चहाःतना। अपे हना सरवनपे बिसवासकेरा अरू बड़ियाड़ इदानपेःआ।

² ईंग अपे एचेरेयिंग कता उदुःतेरा हनानाः नपाय सरवनते भगवान अपेय सडावकेरा। मनदो अपे हना सरवन अपे इंदरीरे दोहोकेडखन मेरपे सलावकुः दो अपेराः बिसवास सदाःआ होया जुवाःकुःआ।

³ हनालगा ईंग चेडकिया हनानाः मनइद कता अपेयिंग चेडकेडपेःआ। भगवानराः कागदरे ओजाःतो इदा हनन इया ईसू मसी अबूराः कसूर लगाय गोएगनेना।

⁴ हनते हाँयकू तीलगोतेड अरू भगवानराः कागदरे ओजाःतो इदा हनन इया पेनेय दिनरेय जियाव रेमकिया।

⁵ अरू हाँय मड़ंग कइपा एचेरेय एचे ञेलनेना। हना तयोमरे बारहो मूक चेलाकूतेन एचेरेय एचे ञेलनेना।

⁶ हनते पाँच सव अते बगरा चेलाकूतेन एचेरे मिनी जूदाय एचे ञेलनेना। हँकू अते मुरुक होड़कू तिसिंग वरी हों जीयत इदानकुःआ। मनदो हँकू अते तोनोंग तोनोंग होड़कू गोएगयना।

⁷ हनते हाँय एकूब एचेरेय एचे ञेलनेना। अरू हना तयोमरे हाँय अनँयगरिकुःआ जमा मूक चेलाकू एचेरेय एचे ञेलनेना।

⁸ ईंग सतवास जनमावतो लँइग इयायिंग दोहोना। हनते हों टुटीगरे ईसू ईंग एचेरे होंय एचे ञेलनेना।

⁹ भगवानराः कलसियारिकुःआ होड़कूयिंग संतावतेरा। हनालगा ईंग ईसूरीग मूक चेला कतान जुकूर कोवायिंगा अरू हाँयरिकुःआ जमा मूक चेलाकू अते हुनुडिंग इदानिंगा।

¹⁰ मनदो भगवान ईंगे मयावारा। हनालगा नुँहू ईंग इदानिंगा हनानाःयिंग बड़ाँवनेना। अरू हाँय ईंगे मयावारा हना ईंग जीवरे सदाःआ मेर होयागना। हनते हों ईंग ईसूरिकुःआ एटाः मूक चेलाकू अते मुरुक बगरा मिहनइत घड़ीनिंग बुतातना। मनदो नाःआ बुता ईंग इनिंगराः जंगरते मेरिंग बुतातना। भगवान ईंगे मयावारा अरू हनानाः मया ईंग बुनुतागोड ञवन लगा संघरा एमेता।

¹¹ दो ईंग, सहे ईसूरिकुःआ एटाः मूक चेलाकू, अले जमाकू ननानाः सरवनले परसारता, अरू ननानाः सरवनपे बिसवासकेरा।

गोएगतो होड़कूराः जियाव रिमुः

¹² भगवान ईसू मसीय जियाव रेमकेरा माःआनले परसारतेरा अरू हनानाः सरवनपे बिसवासकेरा। दो अपे अते तोनोंग तोनोंग होड़कू करा इयाकू कता अवेयता, गोएगतो होड़कू मेरकू जियाव रिमुःता, माःआन?

¹³ गोएगतो होड़कू मेरकू जियाव रेमकुः दो, ईसू मसी गोएगतो होड़कू अते ओरोय जियाव रेमकुःआ।

¹⁴ अरू ईसू मसी गोएगतो होड़कू अते मेरेय जियाव रेमकुः दो, अलेराः परसार हों सदाःआ होयाकुःआ अरू अपेराः बिसवास हों सदाःआ होया जुवाःकुःआ।

¹⁵ अले परसारगेतना, ईसू मसी गोएगतो अते भगवान जियाव रेमकिरिया, माःआन। मनदो भगवान होड़कू गोएगतो अते मेरेय जियाव रेमकेकुः दो ईसू मसी हों हाँय ओरोय जियाव रेमकेया। नाःआ सताय दोहोकुः दो अले भगवान बदीरे होड़कूले अडिगकेःआ।

¹⁶ गोएगतो होड़कू ओरोकू जियाव रेमकुः दो भगवान ईसू मसी हों ओरोय जियाव रेमकेया।

¹⁷ ईसू मसी गोएगतो होड़कू अते मेरेय जियाव रेमकुः दो अपेराः बिसवास सदाःआ होया जुवाःकुःआ अरू अपे कनासूर कसूररेपे दोहो जुवाःकुःआ।

¹⁸ अरू ईसू मसी एचेरे बिसवासकेडखनकू गोएगयना हँकुःआ होड़कू होंकू लाय एंडाकुःआ।

¹⁹ अबू नाःआ चनउंदीसराः गुजर मसर सलाः लगा एकला ईसू मसी एचेरेबू असरातना दो एटाः होड़कू अते अबूराः जीव सोगावा इया इदा।

²⁰ तोनोंगाः सींगरे मड़ंग जोःओबू ञेलतान दो अबू सुदीगोडता नाःआ सींग दूबते अरू बगरा जोःओ जोःता। ननन इया भगवान, ईसू मसी हों गोएगतो अतेय जियाव रेमकिरिया। हनालगा गोएगतो होड़कू हों भगवान जियाव रेमकूता।

²¹ आदम कसूरतेरा अरू हना अते चउंदीसरिकुःआ जमा होड़कू गुजुःता, मनदो गोएगतो होड़कू अते ईसू जियाव रेमकियान अते भगवान अबू होंय जियाव रेमबूता।

²² आदमरिकुःआ नइड़-बाँस होड़कू जमाकू गोएग जुवाःता। हनन इया ईसू मसी सुदाकू मिनीयना हँकुःआ जमा होड़कू भगवान जियाव रेमकूता।

²³ मनदो अबू जमाकू पाली-पाली भगवान जियाव रेमबूता। हाँय मड़ंगरे ईसू मसीय जियाव रेमकेरा। अरू ईसू मसी कुदा वेग मेला, हाँयरिकुःआ जमा होड़कू भगवान जियाव रेमकूता।

²⁴ हना तयोमरे राइजगेताकू हँकुःआ होड़कू अरू हातपातदारकू अरू जंगरदारकू हरुवावकेडकूखन ईसू मसी अपांग भगवान एचेरे राइजे जिमागोडता। हनमेला चउंदीस टुटीग जुवाःता।

²⁵ ईसू मसीरिकुःआ मुदइकू हरुवावकेडकूखन हाँयराः काट हँकू चोटरे चोड रोपाः लगा भगवान अरीने तुलाकू वरी ईसू राइजगोड ञवनता।

²⁶ गुजुः, होड़कूराः मुदइ होड़ इया इदा अरू टुटीगरे हाँय हनानाःए लाय एंडागोडता।

²⁷ भगवानराः कागदरे ओजाःतो इदा, “भगवान जमाकून हाँय हातपातगे लगा काट पेंदारेय मंडावगोतेरा।” जमाकून हाँय हातपातगे लगा काट पेंदारेय मंडावगोतेरा, माःआन उदुःगेता दो नाःआराः मतलोब नाःआ हवे, जमा बरानाः हाँयराः आड़रेय जिमागोतेरा। मनदो भगवान जमा बरानाः हाँयराः आड़रेय जिमागोतेरा, दो भनगवान एकला हाँयराः आड़रे कोवाया।

²⁸ भगवान जमा बरानाः हाँयराः आड़रेय जिमागोतेरा दो, हाँय हों अनँयग आँयग भगवान आड़रेय जिमा जुवाःता। अरू भनगवान हमा जमाकू एचेरेय राइजगेता।

²⁹ अपे अते अदोम होड़कू गोएगतो होड़कू लगापे बतिसमानता। नाःआ अते अपेके चिला नफा होयाःता? गोएगतो होड़कू भगवान ओरोय जियाव रेमतेडकुःआ दो, अपे हँकू लगा चिला लगापे बतिसमानता?

³⁰ भगवान गोएगतो होड़कू मेरेय जियाव रेमकेकुः दो अले जमा बेला चिला लगा कटसियाले सहावकेःआ?

³¹ ने अजी बोपोहकूतिंग, ईंग सगर दिन गुजुःराः दूररेयिंग सेने पारता। मनदो ईंगते अपे परबू ईसू मसीरेपे बिसवासकेरा। हनालगा अपे बदीरे ईंग बहालतेयिंग बड़वारता।

³² अरू इपीसी सहररिकुःआ होड़कू ईंग मुरुककू घंटावतिरिंगा अरू पहाड़ जानरकू इया ईंग सुदाकू लड़ाइनेना। गोएगतो होड़कू मेरकू जियाव रेमकुः दो नाःआ इयाःआ घंटाव चिला लगायिंग सहावकेःआ? गोएगतो होड़कू ओरोकू जियाव रेमनेन दो, “गपामिन अबू गोनेग जुवाःता, दो मान हमा अबू जोम-ञूय अरूबू मंजागे।”

³³ अलोपे अडिगगुः। बेलूर सउंगताकू नपाय लूरकू आडगोडता।

³⁴ भगवान मेरकू सुदीयता हँकुःआ होड़कू इया अपे अते तोनोंग तोनोंग होड़कू जियाःतना। हनालगा अपे गियू जुवाः लगा नाःआ इयायिंग कतायतना, नपायपे सुरतान अरू कसूरगे लगापे अड़ाः एंडागोड।

जियाव रिमुःराः देह

³⁵ अपे अते तोनोंगीग होड़ होंबरेता, “गोएगतो होड़कू करा इयाकू जियाव रिमुःता? अरू करा इयाःआ देहरेकू वेगता?”

³⁶ हँकुःआ होड़कू ईंग कतावाकूता, ने बोको होड़कू, अपे तोनोंगाः बिहानपे वेरतान दो, हना जांग हास पेंदारे सेयाकेडखन मेर ओमोनगुःता जा?

³⁷ अरू अपे वेरता हना दूब ना लवे, मनदो हना गोहोम सहे एटाः तोनोंगाः सराराः जनंग एकला हवे।

³⁸ मनदो भगवान अनँयगराः ओंगोल इया मेमेड बरानाः बिहान लगा मेमेड बरानाः दूबे बड़ाँवता।

³⁹ जमा जिया-जउतकूराः मास मिनी बरान मेर दोहोनता। मनुवाकूराः मास मिनी बरान, अरू जानरकूराः मास मिनी बरान, अरू तितीगकूराः मास मिनी बरान, अरू हकूकूराः मास मिनी बरान इदा।

⁴⁰ कइन बरान सेरमोरे इदा अरू कइन बरान ओतरे इदा। सेरमोराः एटाः इया सुघर ञिलुःता अरू ओतराः एनेटाः इया सुघर ञिलुःता।

⁴¹ बेरराः लवकाः मी बरान इदा, अरू बांगोराः मरसल एटाः बरान इदा, इपीलकूराः टेडेग एनेटाः बरान इदा। अरू हँकू जमाकू एनेटाः एटाः इया सुघरकू ञिलुःता।

⁴² ननन इया गोएगतो होड़कूराः जियाव रिमुः होयाःता। होड़कू मुरदाकू तीलगोडता अरू हना सेया एंडा जुवाःता। मनदो भगवान गोएगतो होड़कूय जियाव रेमकू मेला हँकू लगा नँवा देहे एमेवाकूता। हना देह कहियो ओरो सेयानेना।

⁴³ मुरदाबू तीलतान मेला हना बेसुरइत अरू अबड़ दोहोनता, मनदो भगवान हना देहे जियाव रेमतान मेला हना नँवा देह सुघर अरू मुरुक जंगरते दोहोनता।

⁴⁴ चउंदीसरे दोहोन जुकूराः देहबू तीलगोडता, मनदो सेरमो देसरे दोहोन जुकूराः देह सुदा भगवान जियाव रेमबूता। चउंदीसरे दोहोन जुकूराः देह इदान दो सेरमो देसरे दोहोन जुकूराः देह हों इनिदा।

⁴⁵ भगवानराः कागदरे ओजाःतो इदा, “भगवान मड़ंगीग मनुवा आदम एचेरे साँसे ओंगगोतेड अरू हाँय जीयत होड़े बड़ाँवनेना,” मनदो टुटीग आदम ईसू हवे अरू हाँय जीवे एमे कुदावाबूता।

⁴⁶ सेरमो देसरे दोहोन जुकूराः देह मड़ंगरे मेरबू पवावगान, मनदो चउंदीसरे दोहोन जुकूराः देह मड़ंगरेबू पवावकिया।

⁴⁷ भगवान मड़ंगीग मनुवा आदम हासतेय तुलातिडिया, मनदो एटाःयीग मनुवा, ईसू सेरमो देसरीग भगवान अगीतेय वेगनेना।

⁴⁸ भगवान मड़ंगीग मनुवा हासतेय तुलातिरिया अरू हनन इया चउंदीसरिकुःआ एटाः होड़कू हों हनासरिकुःआ हवे। अरू हनन इया सेरमो देसरिकुःआ होड़कू भगवान अगीतेय वेगनेना हनाँयग इया इदानकुःआ।

⁴⁹ नुँहू अबू हासते तुलात मनुवा इया इदानबुःआ। तयोमरे अबू सेरमो देसरीग भगवान अगीतेय वेगनेना हनाँय इयाबू होया जुवाःता।

⁵⁰ ने ईंगरिकुःआ अजी बोपोहकूतिंग, अपे ईंगपे अयूम। अबू चउंदीसरे दोहोन लगा भगवान एमेकेरा हना देह सेया जुवाःता। मनदो सेरमो देसरे दोहोन लगा भगवान एमेयता हना देह ओरो सेयानेना। हनालगा अबू चउंदीसरे दोहोन लगा भगवान एमेकेरा हना देह सुदा सेरमो देस ओरोबू सेने अवेनेना।

⁵¹ अपे ईंगपे अयूम! ईंग मीटोंग बड़रायिंग कतायता। हना नुँहू वरी तोनोंगीग मेरकू सुसुदीतना। अबू अते तोनोंग तोनोंग होड़कू ओरोबू गोएग जुवाःता, मनदो अबू जमाकूराः देह बदलाव जुवाःता।

⁵² मेडकू निपकावता हिनिन बितिक, ओहेन टुटीगरे मरंग सोहनाईकू ओंगता हनमेला, अबू जमाकूराः देह बनदलावबाः जुवाःता। मरंग सोहनाईकू ओंगता हनमेला, गोएगतो होड़कू जमाकू भगवान जियाव रेमकूता, अरू अबू जमाकूराः देह बनदलावबाः जुवाःता।

⁵³ नुँहू अबूराः देह सेयाकेडखन लाय एंडा जुवाःता। दो अबूराः नाःआ देह बदलाव जुवाःता अरू हना नँवा देह कहियो ओरो सेया लायनेना।

⁵⁴ तयोमरे अबूराः नाःआ देह बदलाव जुवाःता अरू हना नँवा देह कहियो ओरो सेया लाय एंडानेना। नाःआ इया होयाः दो भगवानराः कागदरे ओजाःतो इदा हना सरवन पुराव जुवाःता। “भगवान जितावयना, दो नुँहू वरीते गुजुः रोंकावबाःयना।”

⁵⁵ “गुजुः अबू एचेरे जीताव जुवाःता जा? गुजुः अबूके तोनोंगाः हनी अवेतेडबुःआ जा?”

⁵⁶ नियम अते अबू सुदी अवेयता, अबू करा इयाबू कसूरगेता अरू कसूरगेतान अते गुजुःराः हनी अबूके होया जुवाःता, माःआन।

⁵⁷ मनदो अबूरीग परबू ईसू मसीते अबूय एचे जितावबाःगोडबूता हाँयग भगवानिंग धनियाबादता।

⁵⁸ दो ईंगरिकुःआ अजी बोपोहकूतिंग, अपे ईसू एचेरेपे बिसवासगोड ञवन, अरू अलोपे टास-मासगुः। अनंगेर अंगेरते परबू लगापे बुतागोड ञवन। अपे सुदीबाःका, परबू लगापे मिहनइतगेतना हान, सदाःआ ओनोरो होयानेना।