1 कुरिंती 14 - Korwa Bible

दहिनकून पवाव बदीरे चेड

¹ दो ईंगरिकुःआ अजी बोपोहकूतिंग अपे एटाः होड़कू दुलारकू लगापे होमगोड। अरू सुद बिरुवाराः दहिनकून पवाः लगा मुरुकपे रोयोँन, बिसेक भगवानराः बड़रा कता उदुः लगा सुद बिरुवा एमेवाबूता हनानाः दहिन पवाः लगापे रोयोँन।

² अनबुझ भासीय बड़राता हाँयग होड़, होड़ सुदा मेरेय बड़राता, मनदो भनगवान सुदाय बड़राता। हनालगा हाँयराः बड़रा तोनोंगीग मेरेय बुझाव अवेनता, अरू हाँय ओकोत बुइदकून सुद बिरुवा अगुवाइतान अतेय कतायता।

³ मनदो भगवानराः बड़राय कताता हाँयग होड़, होड़कू एचेरेय कतायता। हाँयराः बड़राते हँकूराः बिसवास बड़ियाड़ जुवाःता, अरू हँकूराः जीव अहाल-बहाल अरू हड़ियाड़ जुवाःता।

⁴ अनबुझ भासीय बड़राता हाँयग होड़ अनँयगराः बिसवासे बड़ियाड़ता, मनदो भगवानराः बड़राय कताता हाँयग होड़ कलसियारिकुःआ जमा होड़कूराः बिसवासे बड़ियाड़ता।

⁵ ईंग चहाःता, अपे जमाकू अनबुझ भासीपे बड़रा, मनदो नाःआ अते बगरा अपे भगवानराः बड़रा कता होड़कूपे होयाः लगा ईंग चहाःता। अनबुझ भासी बड़रायीग होड़ हना भासीराः अरत कलसियारिकुःआ होड़कूराः बिसवास बड़ियाड़गे लगा मेरेय उदगे दो, हाँय भगवानराः बड़रा कतायीग होड़ अते हुडिंग इदानिया।

⁶ ने ईंगरिकुःआ अजी बोपोहकूतिंग, ईंग अपे एचेरे अनबुझ भासी कता घड़ीनिंग सेनेकुः दो, अपे लगा तोनोंगाः नफा होयाकुःआ जा? अरू ईंग अपे एचेरे भगवानराः उदुःतो सरवन, सहे हाँयराः कनहून, सहे भगवानराः बड़रा सहे चेडतो मेरिंग उदुःकेः दो अपे लगा तोनोंगाः नफा होयाकुःआ जा?

⁷ जीव कोवानेःआ हना बाजाकून अते मिनी इया अरो अयूमकुः दो, करा इया तोनोंगीग तंबुररा अरू बसुरीराः लाये सुदी अवेकेःआ?

⁸ मरंग सोहनाईराः अरो टहकार मेर अयूमकुः दो करा उड़ी लड़ाइ लगा सइना होड़कू उडुंग अवेकुःआ?

⁹ दो ननन इया अपे हों टहकार मेरपे बड़राकुः दो, करा उड़ी होड़कू अपेराः बड़राकू बुझाः अवेकुःआ? तोनोंगीग अपेराः बड़रा मेरकू बुझाः दो अपे अयाँड़-गोटाँड़ बुतुड़ूपे बुतुड़ुता।

¹⁰ चउंदीसरिकुःआ होड़कू एटाः एटाः भासीरेकू बड़राता अरू मेनेमेटोंग भासी हों बेगर लूर कोवानेःआ।

¹¹ हनालगा ईंग तोनोंगीगराः भासी मेरिंग बुझाः दो ईंग हाँय लगा अनबुझ होड़ इदानिंगा, अरू ईंग लगा हों हाँय अनबुझ होड़े होया जुवाःता।

¹² ने ईंगरिकुःआ अजी बोपोहकूतिंग, अपे सुद बिरुवाराः दहिनकून लगापे रोयोँन दो, अपे अते कलसियारिकुःआ जमा होड़कूराः बिसवास बड़ियाड़ जुवाः लगापे कुरनिसगोड ञवन।

¹³ हनालगा तोनोंगीग होड़ अनबुझ भासीय बड़राता दो हाँय हना भासीराः अरत उदुः अवे लगा भगवान एचेरेय अरजी।

¹⁴ दो ईंग अनबुझ भासीरेयिंग अरजी दो ईंगराः बिरुवा अरजीता, मनदो ओंगोल चुवेरगे घड़ीन मेरिंग अरजीता।

¹⁵ दो ईंग चिलायिंग एचे? ईंग बिरुवाते होयिंग अरजीता अरू ओंगोल चुवेरगे घड़ीन होयिंग अरजीता। ईंग बिरुवाते होयिंग सेरेंगता अरू ओंगोल चुवेरगे घड़ीन होयिंग सेरेंगता।

¹⁶ अनबुझ होड़कू अपेराः बड़रा मेरकू बुझाव अवेनता। हनालगा अपे अनबुझ भासीते भगवानपे जाग दो एटाः होड़कू करा इया आमीन माःआनकू कताय?

¹⁷ ननन इया अपे नाय नपायते भगवानपे जागतान हों, अपेराः जागते एटाः होड़कू बिसवासरे मेरकू बड़ियाड़गुःता।

¹⁸ अपे जमाकू अते मुरुक अनबुझ भासीरेयिंग बड़राता। हनालागा भगवानिंग धनियाबादगेयतना।

¹⁹ मनदो ईंग कलसियारे दस हजार लबदकून अनबुझ भासीरेयिंग बड़रा अते पाँचगोटोंग फरचार लबद ओंगोल चुवेरगुः घड़ीनिंग चेडकू दो हनानाः नपाय होयाःता।

²⁰ ने ईंगरिकुःआ अजी बोपोहकूतिंग, अपे लइंकू इया अहापे ओंगले। मनदो अपे सयाँड़ होड़कू इयापे ओंगले अरू बती लइंकू इया सुझिया होड़कूपे बड़ाँः।

²¹ भगवानराः कागदरे ओजाःतो इदा, परबू कतायता, “ईंग अनबुझ भासीकू बड़राता हँकुःआ होड़कूते अरू दुरीन देसरिकुःआ होड़ते नँकुःआ होड़कू सुदायिंग बड़राता, हनते हों ईंगराः बड़रा ओरोकू मनावनेना।”

²² दो तोनोंगीग बिसवासी होड़ अनबुझ भासीय बड़रा दो हना बेगर बिसवासी होड़कू लगा भगवानराः जंगर उदुःता। अरू बिसवासी होड़कू भगवानराः बड़राकू कताय दो कलसियारिकुःआ जमा होड़कूराः बिसवास बड़ियाड़ जुवाःता।

²³ मनदो कलसियारिकुःआ होड़कू मिनीरेकू जवारगुः मेला, जमाकू मिनी जूदा अनबुझ भासीकू बड़रा अरू दरबार होड़कू सहे बेगर बिसवासी होड़कू अपे एचेरेकू वेग दो हँकू, नँकू बउड़ावयनाकू, माःआन ओरोकू कतावातेडपेःआ जा?

²⁴ मनदो जमाकू भगवानराः बड़रा कता मेला दरबार होड़कू सहे बेगर बिसवासी होड़कू अपे एचेरेकू वेग दो हँकू जमाकूकू सुदीगोडता, अले कसूर जीवले जियाःतना, माःआन। हनते अपे कतायता हना बड़रा अयूमकेडखन कसूर अते जीव कुदागे लगाकू ओंगलेता।

²⁵ भगवान हँकूराः ओकोत ओंगोलकूने एचे सुदीकूता अरू हँकू टोबोः भरसारेकू उकुड़ोमगुःता अरू भगवान जाग घड़ीनकू कतायता, सतायरे भगवान अपे तलारे इदानिया, माःआन।

कलसियारे ओरे-ओर भगवानपे जाग

²⁶ ने अजी बोपोहकूतिंग, अपे मिनीरेपे जुमाः मेला नाःआ इयापे एचेय। अपे मेमेड होड़ मेमेड होड़ एचेरे सेरेंगकून सहे, चेड सरवन सहे, भगवानराः एचे उदुःतो सरवन सहे, अनबुझ भासी सहे, अनबुझ भासीराः अरत उदुः लगा इदा दो, नाःआ जमाकूनते कलसियारिकुःआ जमा बिसवासी होड़कूराः नफा होयाः लगा इदा।

²⁷ अपे अनबुझ भासीरेपे बड़रा दो बार पेय होड़ अते बगरा अलोपे बड़रा। अरू हन हों मेमेड होड़ मेमेड होड़ कताय लगा इदा, अरू हँकूराः बड़राराः अरत उदुः लगा मी होड़ दोहोन।

²⁸ अरत उदुःयीग तोनोंगीग मेरेय दोहोन दो, हँकुःआ अनबुझ भासी बड़रा होड़कू कलसियारे कलेकालकू दोहोन। अरू हँकू अँननकूराः इंदरीरे भगवान सुदाकू बुतुड़ु।

²⁹ भगवानराः बड़रा कता होड़कू अते बार पेय होड़कू बड़रा। हनमेला एटाःकू हँकूराः बड़रा नपायते ओंगोल चुवेर घड़ीनकू अयुमे।

³⁰ तोनोंगीग भगवानराः बड़राय कता उदुः मेला, हंडा दुड़ुःतो होड़कू अते तोनोंगीग एचेरे भगवान अनँयगराः सरवन कता लगाय उदुःवाडिया दो, हाँय हनानाःए कता उदुःगे। मनदो मड़ंगे ककाता हाँय कलेकाल जुवाःय।

³¹ जमा होड़कूराः जीव अहाल बहाल जुवाः लगा अरू चेडुः लगा, मेमेड होड़ मेमेड होड़ भगवानराः बड़रा ककता लगा इदा।

³² भगवानराः बड़रा कता होड़कू अँननकूराः अलंगकू रोंकाव अवेयता। नाःआ अते हँकू ओरे-ओरकू कता उदुः अवेयता।

³³ भगवान कहिसाः रन-भन मेरेय एचेयता, मनदो हाँय जमालेःआ नपायतेय एचेयता। भगवानरिकुःआ सुद होड़कूराः जमा कलसियारेकू एचेयता हनन इया,

³⁴ अपेराः कलसियारे तोनोंगीग सरवने कता मेला अपेरिकुःआ अइमीकू हों बुतुड़ु लगा कोवानेःआ। हँकू कलेकाल दोहोन लगा इदा। भगवानराः नियम इया हँकू कता मनाः घड़ीन दोहोन इदा।

³⁵ कलसियारे अइमीकू बुतुड़ु दो हान गियुः इया इदा। हनालगा हँकू तोनोंगाः चिडुः लगाकू चहाः दो अँननकूरिकुःआ हेपेरेलकू एचेरे ओड़ाःरेकू होंबरे।

³⁶ दो अपे चेले माःआनपे ओंगलेता? भगवानराः सरवन अँननपे अगीते बुँहड़ीकिया जा? अरू अँननपे एचेरे एकलाकू परसारतेरा जा?

³⁷ तोनोंगीग होड़ ओंगलुः, ईंग भगवानराः बड़रा कतायीग होड़ हवे, माःआन सहे हाँय ओंगलुः, ईंग सुद बिरुवाराः अगुवाइतेयिंग सलाःता, माःआन। दो, हाँय ईंग ओओजाःतना हना कता भगवानराः हुकुम हवे माःआने सुनुदीबाःका।

³⁸ नाःआ कता अपे अयूम पार एंडागोड दो अपे हों रेहडाव उडुंग एंडा जुवाःता।

³⁹ हनालगा ईंगरिकुःआ अजी बोपोहकूतिंग, अपे हों भगवानराः बड़रा कता होड़कू होयाः लगापे रोयोँन, अरू अनबुझ भासी बड़रा होड़कू अलोपे रोंकावकू।

⁴⁰ मनदो अपे जमालेःआ ओरे-ओर अरू नपायते एचेय लगा इदा।