1 कुरिंती 12 - Korwa Bible

सुद बिरुवाराः दहिनकून

¹ दो ईंगरिकुःआ अजी बोपोहकूतिंग, सुद बिरुवाराः दहिनकून बदीरे अपे अनसिनहारपे दोहोन लगा मेरिंग चहाःतना।

² अपे सुसुदीतना, अपे बेगर बिसवासी होड़कूपे दोहोन मेला, मेर अयुमेता हना मुरतीकूनपे सेवा लगा अपेके आँच परावनेना अरू हनानाःपे सेवागोड ञवना।

³ हनालगा ईंग कतायतना, सुद बिरुवाराः अगुवाइतेय सलाःता हाँयग होड़, ईसू सती-सरापतो इदानिया माःआन मेरेय कतायता। सुद बिरुवा तोनोंगीग मेर अगुवाइवाय दो हाँय, ईसू, परबू हवे, माःआन ओरोय कता अवेतेरा।

⁴ दहिनकून एटाः एटाः बरानाः इदा। मनदो नाःआ जमाकून मिनीटोंग सुद बिरुवा एमेयता।

⁵ अबू एटाः एटाः दहिनते परबूबू सेवाता, मनदो अबू जमाकू मिनीटोंग परबूबू सेवाता।

⁶ ननन इया अबू एटाः एटाः बरान सेवाकूनबू सेवाता, मनदो मिनीटोंग भगवान नाःआ इयाःआ जमा सेवाकून सेवा लगा अबू संघरावाबू घड़ीने एचेयता।

⁷ जमा होड़कूके नफा होयाः लगा मेनेमेड होड़कूके सुद बिरुवा एटाः एटाः दहिनकूने एमेवाबूता।

⁸ तोनोंगीग होड़ सुद बिरुवाते कनहूनराः सरवने कतायता, अरू तोनोंगीग होड़ सुद बिरुवाते बुझाःराः सरवने कतायता। मनदो नाःआ दहिनकून मिनीटोंग सुद बिरुवा एमेयता।

⁹ तोनोंग तोनोंग होड़कू बिसवासगे लगा अरू एटाः होड़कू बेमरिया अते होड़कू नपायकू लगा सुद बिरुवा दहिन एमेवाकूता।

¹⁰ अरू एटाः होड़कू बयाव जुवाः इयाःआ बुताकून एचे लगा अरू एटाः होड़कू भगवानराः बड़रा कता होड़कू होयाः लगा सुद बिरुवा दहिन एमेवाकूता। तोनोंग तोनोंग होड़कू सुद बिरुवाराः बड़रा अरू भूतकूराः बड़रा अंदजाव लगा अरू तोनोंग तोनोंग होड़कू अनबुझ भासीकून बड़रा लगा अरू तोनोंग तोनोंग होड़कू अनबुझ भासीकूनराः अरत बुझाः लगा दहिनकू पवाःता।

¹¹ सुद बिरुवा मिनीटोंग इदा अरू नाःआ जमा दहिनकून हनाँयग सुद बिरुवा एमेवाकूता। मनदो हाँयग सुद बिरुवा तोनोंगीग एमेवा लगाय चहाःता, हनाँयग होड़ लगा दहिनकूने एनेमेगोडता।

बिसवासीकू मीटोंग देहराः दगलीकून हवे

¹² मनुवाराः मिनीटोंग देह इदा, अरू एटाः एटाः देह दगलीकून इदा। एटाः एटाः देह दगलीकूनते मी होड़राः देह बड़ाँव जुवाःता। हनन इया मसीराः देह, मतलोब कलसिया हों मिनीटोंग इदा।

¹³ अबू अते तोनोंग तोनोंग होड़कू एहूदाकू हवे अरू तोनोंग तोनोंग होड़कू बेगर एहूदाकू हवे। अबू अते तोनोंग तोनोंग होड़कू बेगारी होड़कू इदानकुःआ अरू तोनोंग तोनोंग होड़कू बेगारी होड़कू कोवाकुःआ। मनदो भगवान सुद बिरुवाते अबू जमाकू बतिसमाय एमेवाडबुःआ अरू मसीराः देहराः एटाः एटाः दगलीकूने बड़ाँवकेडबुःआ। नुँहू भगवान अबू जमाकू जीवरे हनानाः बिरुवाय एमेकेरा।

¹⁴ अबू देहरे मिनीटोंग दगली कोवानेःआ। देहरे एटाः एटाः दगलीकून इदा।

¹⁵ ओंगलेपे, काट कताय, ईंग तिःई ना लवे। हनालगा ईंग नाःआ देहराः दगली ना लवे, माःआन। दो नाःआ अते हना काट हना देहराः दगली ना लवे जा?

¹⁶ अरूपे ओंगले, लुतूर कताय, ईंग मेड ना लवे। हनालगा ईंग नाःआ देहराः दगली ना लवे, माःआन। दो नाःआ अते हना लुतूर हना देहराः दगली ना लवे जा?

¹⁷ अबूराः देहरे मेनेड मेड एकला दोहोकुः दो चिलातेबू अयूमकेःआ? अबूराः देहरे लुनुतूर लुतूर एकला दोहोकुः दो चिलातेबू सुहुंगावकेःआ?

¹⁸ मनदो भगवान अनँयगराः ओंगोल इया एटाः एटाः दगलीकून नपाये संजोड़ दोहोकेरा।

¹⁹ जमा देह मिनी दगलीकून दोहोकुः दो देह करे दोहोकुःआ?

²⁰ मनदो दगलीकून मुरुक इदा अरू देह मिनीटोंग इदा।

²¹ हनालगा मेड तिःई एचेरे ओरो कता अवेतेरा, आम सुदा ईंगके तोनोंगाः बुता कोवानेःआ, माःआन। अरू बोः काट एचेरे ओरो कता अवेतेरा, आम सुदा ईंगके तोनोंगाः बुता कोवानेःआ, माःआन।

²² मनदो अबड़ जनाःता, हना देह दगलीकून हों बुनुता जुकूर इदाना।

²³ तोनोंगाः देह दगलीकून होड़कू उदुःवा जुकूर कोवानेःआ, हनानाः दगलीकून अबू सोनहेतेबू तुसिंग रेडगेता,

²⁴ अरू तोनोंगाः देह दगलीकून होड़कू उदुःवा इया इदा, हना दगलीकून अबू सोनहेते मेरबू तुसिंग रेडगेता। भगवान अबूराः देह दगलीकून नपाये संजोड़ दोहोकेरा, जेमहा गुनुनमिन बुता जुकूर जनाःता, हनानाः हों बुनुता बुता जुकूर इदा।

²⁵ नाःआते जमा देह दगलीकून नपायते मिनी जूदा बुता अवेन अरू जमा देह दगलीकून संघरा देंगवा होड़ेंग।

²⁶ मीटोंग दगली हसूरे पराव जुवाःतान दो जमा देह हसूरे दोहोनता। अरू मीटोंग दगलीराः भल-भलाय होयाःतान दो जमा देह दगलीकून अहाल-बहाल जुवाःता।

²⁷ नुँहू अपे मसीराः देह इया इदानपेःआ अरू मेमेड होड़ हाँयराः देह दगलीकून इया इदानपेःआ।

²⁸ अरू भगवान कलसियारे एटाः एटाः इयाकुःआ होड़कूय सुनाव दोहोकेडकुःआ। मड़ंगरे ईसूरिकुःआ मूक चेलाकू, अरू भगवानराः बड़रा कता होड़कू, अरू चेडदार होड़कूय सुनाव दोहोकेरा। अरू हाँय अरू एटाः होड़कूय सुनाव दोहोकेरा। हँकू बयाव जुवाः इयाःआ बुता एचे लगा, अरू बेमरियाकू नपायकू लगा, अरू संघरावाकू लगा, अरू अगुवाइवाकू लगा, अरू अनबुझ भासी बड़रा होड़कू होयाः लगाय सुनाव दोहोकेडकुःआ।

²⁹ जमाकू ईसूरिकुःआ मूक चेलाकू हवे जा? जमा होड़कू भगवानराः बड़रा कता होड़कू हवे जा? जमा होड़कू चेडदार होड़कू हवे जा? जमा होड़कू बयाव जुवाः इयाःआ बुताकूनकू एचेयता जा?

³⁰ बेमरियाकू नपायकू लगा दहिन जमाकू एचेरे इदा जा? जमा होड़कू अनबुझ भासीकू बड़राता जा? जमा होड़कू अनबुझ भासीराः अरतकू उदुः अवेयता जा?

³¹ मनदो अपे भगवानराः हिछा इया मनइद मइद दहिनकून पवाः लगापे तरसाः। अरू नुँहू ईंग अरू मनइद मरंग दूरिंग उदुःवापेता।