1 कुरिंती 11 - Korwa Bible

¹ दो ईंग ईसू मसी अते ञेल सिखात होड़ इदानिंगा, हनन इया अपे हों ईंग अते ञेल सिखात होड़कूपे बड़ाँः।

अरजी मेला बोः तंबू बदीरे चेड

² अपे जमालेःआ लगा ईंगपे उहियारगोड ञवनता। अरू ईंग चेडतेडपेःआ हना जमाकून अपे मनाःतना। हनालगा अपेयिंग भल-भलायवाता।

³ अपे नाःआ कतापे सुदीबाःगोड लगायिंग चहाःतना। मेमेडटोंग अइमीकूरीग मूक अँननकूरिकुःआ हेपेरेलकू हवे। अरू जमा मरदकूरीग मूक ईसू मसी हवे अरू ईसू मसीरीग मूक भगवान हवे।

⁴ तोनोंगीग मरद अनँयगराः बोःरे सोनहे तंबूकेडखने अरजी, सहे भगवानराः सरवने कता उदुःता, हाँय अनँयगरीग मूके बेग-हतावाता।

⁵ अरू तोनोंगीग अइमी बेगर बोः तंबूतेय अरजीता सहे भगवानराः सरवने उदुःता, दो हाँय अनँयगरीग मूके बेग-हतावाता। हाँय सोनहे मेरेय तंबूनतान दो, हाँयराः ऊब ईर टंगरूत इया इदानिया।

⁶ तोनोंगीग अइमी अनँयग बोः मेरेय तंबूनतान दो, हाँय अनँयग ऊबे ईर चुंडूल-मुंडूलगोड। अरू ऊब ईर टंगरूगुः सहे ईर चुंडूल-मुंडूलगुः, हाँय गियुःतान दो हाँय अनँयग बोः तंबून लगा इदा।

⁷ भगवान अनँयग इया मरदे तुलाकेरा अरू हाँयते भगवानराः मान मरजइत होयाःता। मरदराः मान मरजइत लगा भगवान अइमीय तुलाकेरा। हनालगा मरद अनँयग बोः तंबून लगा कोवानेःआ, अरू अइमी अनँयग बोः तंबून लगा इदा।

⁸ भगवान मरद अइमी अते मेरेय तुलागडीग, मनदो अइमी मरद अतेय तुलाकिरिया।

⁹ अरू मरद अइमी संघरावा लगा भगवान मेरेय तुलागडीग, मनदो अइमी मरद संघरावा लगाय तुलाकिरिया।

¹⁰ दो अइमी अनँयग बोःए तंबूनता दो हाँय अनँयगरीग मरदराः आड़रे इदानिया हना उदुःता। नाःआ सेरमो देसरिकुःआ बराहीलकू हों ञेल घड़ीनकू बहाल जुवाःता।

¹¹ हनते हों परबूराः ओंगोलरे अइमी अरू मरद मिनी इयाय ओंगोलकिनता। अरू हँकिन बना होड़ संघरा होड़ेंग लगा इदानकिना।

¹² नाःआ कता सताय हवे, मड़ंगीग अइमी, मरद अतेय बड़ाँवनेना। मनदो हना तयोमरिकुःआ जमा मरदकू अनइमीकूतेकू जनमावकिया। हनते हों भनगवान हमा जमाकूय तुलाकेडकुःआ।

¹³ अपे अँननपे ओंगले, तोनोंगीग अइमी बेगर बोः तंबूनते भगवान एचेरेय अरजी दो हना नपाय इदा जा कोवान?

¹⁴ अपे सुसुदीतना तोनोंगीग मरद अइमी इया अनँयग ऊबे हरातान दो हाँय लगा गियुः इया इदा अरू नपाय मेरेय ञिलुःता।

¹⁵ मनदो तोनोंगीग अइमी अनँयग ऊबे हरातान दो हाँय सुघरे ञिलुःता। अइमी तंबून लगा भगवान हना लंबी ऊबे ओवाडिया।

¹⁶ नाःआ कता बदीरे तोनोंगीग अड़ा-चउकी दो ईंग कतायतना, अले अरू भगवानराः कलसियारिकुःआ होड़कू एचेरे तोनोंगाः एटाः रिती-बिधी कोवानेःआ।

परबू भोज बदीरे चेड

¹⁷ अपे मिनीरे जुमाः मेला अपे लगा नपाय मेर होयाःतना, मनदो बेनेलूर होयाःतना। हनालगा ईंग नुँहू चेडपेता हना कतारे अपे बदीरे ईंग तोनोंगाः भल-भलाय मेरिंग कतायतना।

¹⁸ ईंग अपे बदीरे मड़ंगिंग अयूमकेरा, अपे मिनीरेपे जुमाःतान दो अपे तलारे हिगार हटिंग होयाःता। ईंग नाःआ कता सताय हवे माःआन हुडिंग हुडिंगिंग बिसवासगेतना।

¹⁹ अपे तलारे बेगराव हटिंग मेर होयाः दो करा इयापे सुदी अवेय, भगवानराः ओंगोलरे सताय होड़कू इये इये इदानलेःआ, माःआन?

²⁰ दो अपे मिनीरेपे जुमाःतान मेला, अपे परबू भोज नपायते मेरपे मनाःता।

²¹ अपे परबू भोज जोम मेला, अदोम होड़कू मेरपे तंगीकूता अरू मनाड़ंग सेनेकियानखनपे जोम-ञू बी ञेड जुवाःता। हनालगा अदोम होड़कू रंगेगतोकू दोहो जुवाःता।

²² अपेके जोम-ञूय लगा ओड़ाः कोवानेःआ जा? अपे भगवानराः कलसिया मेरपे बेग-हतावातना जा? अरू तोनोंगाः कोवाना हँकुःआ होड़कू मेरपे एचे गियूकूतना जा? ओहरे! अपे एचेरे चेले माःआनिंग कताय? अपे ईंग भल-भलायपे जा? अहाँ! कहियो ओरोयिंग भल-भलायतेडपेःआ।

²³ परबू ईंगे चेडतेरा हनानाः कता अपेयिंग चेडतना। परबू ईसूकू एचे साबा हनानाः रइत हाँय रुटी तिःईरेय साबतेरा,

²⁴ अरू भगवान धनियाबादकेडखन रुटीय डुंडीगतेरा अरूय कतातेरा, “नाःआ ईंगराः देह हवे। नाःआ अपे लगायिंग एमेयतना। ईंग उहियार लगा ननन इया रुटीपे जोम।”

²⁵ हनन इया बियाड़ी तयोमरे ईसू अंगूर रसराः डुभाय सेपेंगतेरा अरूय कताया, “ईंगराः बलंगी होड़कू लगा भगवानराः नँवा कता-जमकावतो इदा। अपे तोनोंग मेलापे ञूय दो ईंग उहियार लगा ननन इयापे एचेय।”

²⁶ तोनोंग मेला अपे नाःआ रुटीपे जोम अरू नाःआ अंगूर रसपे ञूय, दो परबू अरीने कुदा वेग वरी हाँयराः गुजुः बदीरेपे उदुःगेता।

²⁷ हनालगा तोनोंगीग परबूराः रुटी अरू अंगूर रस नपाय इंदरीते मेरेय जोम-ञूय, दो हाँय परबूराः देह अरू बलंगी बदीरेय कसूरगेता।

²⁸ परबू भोज जोम-ञूय अते मड़ंग अबू अँननबूराः इंदरी जासगुः लगा इदा।

²⁹ तोनोंगीग, ईंग परबूराः देह मतलोब कलसियारीग मी होड़ होड़ इदानिंगा, माःआन मेरेय ओंगोल चुवेरगुःता, हाँय जोम-ञूय अते भगवानराः डंडे पवाःता।

³⁰ ननानाः अते मुरुक होड़कू अबड़ावयना अरू हसूरे इदानकुःआ अरू एटाः मुरुक होड़कू गोएगयनाकू।

³¹ मनदो अबू अँननबू ओंगोल चुवेर घड़ीनबू जासगुः दो अबू डंड ओरोबू पवावनेना।

³² मनदो परबू अबू सोझावबू लगाय डंडियावबूता, जेमहा चउंदीसरिकुःआ एटाः होड़कू सुदा अहाय डंडियावबू।

³³ हनालगा ईंगरिकुःआ अजी बोपोहकूतिंग, अपे परबू भोज जोजोम लगा मिनीरेपे दुड़ुः दो, अपे जमाकू अरीनकू जुमाः वरी तंगी होड़ेंगपे।

³⁴ अपे रंगेगतेपे पड़ूकुः दो, ओनोड़ाःतेपे जोम वेग। नाःआ इयापे एचेय दो, भगवान ओरोय डंडियावतेडपेःआ। बनसावतो इदा हना कताकून अपे एचेरे सोदोरकियानखनिंग कता उदुःवापेता।