1 कुरिंती 10 - Korwa Bible

इसराएल होड़कूराः कहड़ी अते सेताव बड़रा

¹ ने अजी बोपोहकूतिंग, अबूरिकुःआ खुटिपरिया होड़कूराः जीवरे करा इया होयानेना हना बदीरेपे उहियारगे। हँकू टयंगाब ततेरतेकू सेने पार मेला, मीटोंग बदरीराः उंबूल उंबूलकू सेना अरू हँकू समुंदर तलारेकू सेने पारयान।

² दो हँकू अउल-तउल इया बदरी अरू समुंदरते बतिसमाकू गोःतेरा अरू मोसेसरिकुःआ चेलाकूकू बड़ाँवनेना।

³ भगवान हँकू जमाकू जोम लगा सेरमो देसराः मिनी इयाःआ जोम जिनिसे एमेवातेडकुःआ,

⁴ अरू हँकू टयंगाब ततेरतेकू सेन मेला हँकू तयोम तयोम ओतोंग सेनेडा हना मीटोंग मरंग चटइन अते सेरमो देसराः दाः ञूय लगाय एमेवातेडकुःआ। अरू हना चटइन ईसू मसी दोहोना।

⁵ हनते हों हँकू अते मुरुक बगरा होड़कू सुदा भगवान मेरेय ननायगान। अरू हँकू टयंगाब ततेरतेकू सेने पार मेला गोएग कुधायानकू।

⁶ नाःआ जमा कता अबू लगा सेताव इया इदा, जेमहा अबू हँनकुःआ होड़कूराः बेलूर ललची ओंगोलरे अलोबू सेन।

⁷ भगवानराः कागदरे ओजाःतो इदा, “होड़कू जोम-ञूय लगाकू दुड़ुःनेना अरू मुरुककू सून-सेरेंगा।” हनालगा अपे हँकुःआ अदोम होड़कू इया मुरती सेवा होड़कू अहापे बड़ाँः।

⁸ अपे हँकू इया अलोपे सनहा-सनही। हँकू अते अदोम होड़कू सनहा-सनहीनेना अरू मिनी दिन हँकू अते तईस हजार होड़कू गोएगनेना।

⁹ अदोम इसराएल होड़कू परबूकू अंदजावतेरा अरू बींगकू हँकूकू हाब गोएगतेरा। हनालगा अपे भगवान अलोपे अंदजावगेय।

¹⁰ हँकू अते अदोम होड़कू भगवान बदीरेकू कुरबुरावनेना अरू लाय एंडादार बराहील हँकूय लाय एंडातेरा। हनालगा अपे हों भगवान बदीरे अलोपे कुरबुराः।

¹¹ अबू इसराएल होड़कू इया अलोबू होयाः लगा नाःआ जमाकून हँकू जीवरे होयानेना। अबू टुटीगगुः अते मड़ंग बेलारे इदानबुःआ। नाःआ जमाकून अबू लगा ओजाःतो इदा, जेमहा अबू सवासितीबू दोहोन।

¹² हनालगा अपे, बिसवासरे बड़ियाड़ इदानलेःआ माःआनपे बड़वारता हँकू, बिसवासरे अनउरपे बड़ियाड़गुः। निही दो अपे हों हनानाः कसूररेपे पराव जुवाःता।

¹³ जमा होड़कू अंदजावरेकू पराःता, अरू हनन इया अपे लगा हों अंदजाव होयाःता। भगवान भरसागे इयायीग हवे। अपे सहाव अवेयता, हना अते बगरा अंदजावरे ओरोय पराव ओवातेडपेःआ। मनदो अपे जीवरे अंदजाव होयाः मेला, अपे ससहाव लगा हों भगवान अपे दूरे उदुःवापेता, जेमहा अपे अलोपे कसूरगे।

देबी देवताकूराः सेवा बदीरे सेताव

¹⁴ हनालगा ने ईंगरिकुःआ अजी बोपोहकूतिंग, अपे देबी देवताकूराः सेवा अते तोनोरेपे दोहोन।

¹⁵ अपे कनहूनदारकू इदानपेःआ। हनालगा ईंग अपे एचेरेयिंग कतायता अरू हना सताय हवे जा कोवान हनापे जासवा।

¹⁶ अबू परबू भोज धनियाबाद घड़ीनबू जोम-ञूयता। अबू हना अंगूर रसबू ञूयतान दो ईसू अनँयगराः बलंगीय तूतेरा अते नफाबू पवावकिया अरू हना नफाराः इताडदारबू बड़ाँःता। अरू अबू हना रुटी डुंडीग घड़ीनबू जोमतान दो ईसू अनँयग देहरे कटसियाय सहावतेरा अते नफाबू पवावकिया अरू हना नफाराः इताडदारबू बड़ाँःता।

¹⁷ अबू मुरुक बगरा होड़कू इदानबुःआ। मनदो रुटी मिनीटोंग इदा। नाःआ रुटी डुंडीग हटिंगकियानखन अबू जमाकूबू जोमता। हना नाःआ उदुःता, अबू जमाकू मिनी देह इया इदानबुःआ।

¹⁸ अपे इसराएल होड़कू बदीरेपे ओंगले। भगवान लगा धामरे बलिदानकू देगता हँकुःआ होड़कू हना बलिदानतो मासकू जोमतान दो हँकू भगवान जागरेकू मेसा जुवाःता।

¹⁹ दो मुरती मड़ंगरे देगतो बलिदानरे तोनोंगाः जंगर इदा अरू मुरतीरे हों जंगर इदा माःआन ईंग मेरिंग कतायतना।

²⁰ मुरती मड़ंगरे बलिदानकू देगता हँकुःआ होड़कू भगवान लगा कोवान, मनदो भूतकू लगाकू बलिदानगेता। अरू ईंग मेरिंग चहाःतना अपे भूतकू सुदापे मेसान।

²¹ अपे ईसू मसीराः गुजुः उहियार लगापे जोम-ञूय दो भूतकू लगा बलिदानतो हों अपे ओरोपे जोम-ञू अवेतेरा।

²² चेले माःआनपे ओंगलेतना? अबू नाःआ इया परबू भगवानबू अंदजावगेयतना दो हाँय अबू सुदाय रीस जुवाःता। अरू अबू नाःआ हों सुदीतनाबू, हाँय अबू अते मुरुक जंगरदार इदानिया।

जमालेःआते भगवानराः मान मरजइत

²³ अपे अते तोनोंगीग कतायता, जमालेःआ एचेय लगा हकतियार ईंग एचेरे इदा, माःआन। मनदो ईंग हना कतारे रायरे कोवायिंगा। जमा दो नफा पवाः लगा अरू संघरावाकू इया कोवानेःआ।

²⁴ तोनोंगीग अनँयगराः नफा लगा अलोय ओंगले, मनदो एटाः होड़कूराः नफा होयाः लगाय ओंगले।

²⁵ बजाररेकू अकिरिंगगेता हना तोनोंगाः मासपे किजा जोम। नाःआ मास तोनोंगाः मुरतीराः देगतो मास हवे जा कोवान, माःआन अहापे ओंगले सहे तोनोंगीग एचेरे अलोपे होंबरे।

²⁶ भगवानराः कागदरे नाःआ इया ओजाःतो इदा, “चउंदीस अरू नंडा जे हों सकालाः इदा हना पनरबूराः हवे।” हनालगा अबू हना मासबू जोम अवेयता।

²⁷ तोनोंगीग बेगर बिसवास होड़ अनँयग ओड़ाःरे गुतियाय राःपे अरू अपे सेन लगापे चहाः दो, सलाव जुवाःपे। अरू जोम लगा अपे मड़ंगरेय मंडावगे दो अपे बेगर होंबोरतेपे जोम।

²⁸ मनदो तोनोंगीग अपे एचेरेय कताय, नाःआ मुरतीराः देगतो मास हवे, माःआन। दो अपे एचेरेय कता उदुःकेरा हाँयग होड़ अते अरू हाँयराः ओंगोल अते अलोपे जोम।

²⁹ नाःआ कता बदीरे अपेराः ओंगोल अते हनाँयग होड़राः ओंगोल अपे लगा मइद इदा। मनदो अपे अते तोनोंगीग ढांग बड़ाँवकेडखने होंबरिंगता, एटाः होड़राः जीव अदरुजीनते ईंगराः हिछा चिला लगायिंग रोंकावगे?

³⁰ ईंग तोनोंगाः जिनिस जोम अते मड़ंग भगवानिंग धनियाबादता। दो ईंग धनियाबादगेयता हना जिनिस बदीरे चिला लगा ईंगराः बदी होयाःता?

³¹ मनदो ईंग कतायतना, अपे जोम सहे ञूय सहे तोनोंगाःपे एचे, हना जनामाते भगवानराः मान मरजइत होयाः लगापे एचेय।

³² अरू अपे एहूदाकू, सहे बेगर एहूदाकू, सहे कलसियारिकुःआ बिसवासी होड़कू एचे कसूरकू लगा अलोपे बड़ाँः।

³³ ईंग इनिंग ननायगुः अते एटाः होड़कू ननाय जुवाः लगा जमा बेलायिंग कुरनिसगेता। ईंग इनिंगराः नफा मेरिंग ओंगलेता, मनदो एटाः होड़कू सडाव जुवाः लगा हँकूराः नफायिंग ओंगोलता।