எபேசியரு 6 - சொர்கக்கு வழிநெடசுவுது புஸ்தகாஎத்தோருவு மக்குளுகோளுவு 1 மக்குளுகோளே, நீமு நிம்மு எத்தோரு ஏளுவுதுன கேளி நெடைரி. நீமு ஆண்டவருன சேந்தோராங்க இருவுதுனால ஈங்கே மாடுவுது செரியாங்க இத்தாத. 2 “நீமு ஒள்ளிதுன ஈசிகோம்புக்குவு, தும்ப காலக்கு ஈ பூமில பதுக்குவுக்குவு, 3 நிம்மு அவ்வெனவு அப்பன்னவு மதுச்சு நெடைரி” அம்புதுத்தா தேவரு கொட்ட கட்டளெகோளுல வாக்குனவு சேர்சி கொட்ட மொதலாவுது கட்டளெ. 4 எத்தோரே, நிம்மு மக்குளுகோளியெ நிம்மு மேல கோப்பா பருவுக்கு மாடுலாங்க அவுருகோளுன கண்டிப்புமாடி திருத்தி, புத்தி ஏளிகொட்டு ஆண்டவரியெ ஏத்த மாதர சாக்குரி. அடிமெகோளுவு மொதலாளிகோளுவு 5 அடிமெகோளே, ஈ ஒலகதுல நிமியெ மொதலாளிகோளாங்க இருவோரு ஏளுவுதுன அஞ்சிகெயோடைவு, நடுக்கதோடைவு கேளி நெடைரி. நீமு கிறிஸ்து ஏளுவுதுன கேளி நெடைவுது மாதர அவுருகோளு ஏளுவுதுன நேர்மெயாத மனசோட கேளி நெடைரி. 6 நிம்மு மொதலாளிகோளுன பிரியபடுசுவுக்காக அவுருகோளு நோடுவாங்க சென்னங்க கெலசமாடுவோரு மாதர நடுசுபேடரி. ஆதர நீமு கிறிஸ்துவோட கெலசக்காரருகோளாங்க தேவரோட விருப்பான முழு மனசோட மாடுரி. 7 ஒந்தொப்பா அவ அடிமெயாங்க இத்தானோ இல்லவோ அவ மாடுவுது ஒள்ளிது மாதரயே ஆண்டவரு அவுனியெ பலனு கொடுவுரு அந்து நிமியெ தெளிவுது. 8 அதுனால நீமு கெலசமாடுவுது மனுஷரியெ இல்லா ஆண்டவரியெத்தா அந்து நெனசி சந்தோஷவாங்க கெலசமாடுரி. 9 மொதலாளிகோளே, நீமுவு நிம்மு அடிமெகோளொத்ர சென்னங்க நெடக்கோரி. நீமு அவுருகோளுன தண்டுசுபுடுவுரி அந்து அஞ்சிகெபடுசுபேடரி. ஏக்கந்துர நீமுவு, நிம்மு அடிமெகோளுவு சொர்கதுல இருவுது ஒந்தே மொதலாளின சேந்தோரு அந்துவு, அவுரொத்ர ஏ பச்சபாதவு இல்லாந்துவு நிமியெ தெளித்தாதையே. தேவரு கொட்ட ஆயுதகோளு 10 ஆண்டவரு நிமியெ கொடுவுது அவுரோட தும்ப தொட்டு பெலதுனால நீமு உறுதியாங்க ஆகுரி. 11 ஜகளக்கு ஓவுது வீரா ஆயுதகோளுன ஆக்கிகோம்புது மாதர நீமுவு சாத்தானோட தந்தரகோளுன எதுத்து நில்லுவுக்கு பெலா இருவோராங்க இருவுக்காக தேவரு நிமியெ கொடுவுது ஆயுதகோளு எல்லாத்துனவு ஆக்கிகோரி. 12 ஏக்கந்துர நாமு ஜகள இடிவுது மனுஷரொத்ர இல்லா. ஈ ஒகலதுல மோசவாங்க இருவுது மேல அதிகாரா இருவுது கெட்ட ஆவிகோளுகூடவு, அதுகோளோட தலெவருகோளுகூடவு, பானலோகதுல இருவுது கெட்ட ஆவிகோளுகூடவு, ஈக கத்தளெயாங்க இருவுது ஈ ஒலகான ஆட்சிமாடுவோருகூடவுத்தா. 13 அதுனால தேவரு கொடுவுது ஆயுதகோளு எல்லாத்துனவு ஆக்கிகோரி. ஆகத்தா எதுராளி நிம்முன தாக்குவுது மோசவாத காலா பருவாங்க நீமு அவுன்ன எதுத்து நிந்து ஜகளயிடுது ஜெயிச்சு உறுதியாங்க நில்லுவுக்கு முடுஞ்சுவுது. 14 அதுனால நீமு தேவரு வெளிபடுசித நெஜவாத மாத்துன நிம்மு நெடுவுல கச்செ மாதர கட்டிகோரி. தேவரோட நேர்மென எதுராளிகூட ஜகள இடுது வீரா அவுனோட நெஞ்சுன காப்பாத்திகோம்புக்கு ஆக்குவுது ஆயுதா மாதர ஆக்கிகோரி. 15 வீரா காலுகோளுல கெறான ஆக்கிகோண்டு ஜகள இடிவுக்கு தயாராங்க இருவுது மாதர தேவரு கொடுவுது நிம்மதின பத்தித ஒள்ளிமாத்துன ஜனகோளியெ ஏளுவுக்கு தயாராங்க இருரி. 16 ஈ ஆயுதகோளுகூட, நீமு எதுராளிகோளு பீசுவுது உருக்கோண்டு இருவுது அம்புகோளுன தடுத்து கெடுசுவுக்கு வீரா அவுனு கையில இடுக்கோம்புது ஆயுதா மாதர தேவரு மேல நீமு மடகியிருவுது நம்பிக்கென இடுக்கோண்டு நில்லுரி. ஆக சாத்தானு உருக்கோண்டு இருவுது அம்புகோளு மாதர கெளுசுவுதுன நிம்முனால தடுத்து நிலுசுவுக்கு முடுஞ்சுவுது. 17 வீரா அவுனோட தலென காப்பாத்திகோம்புக்கு ஆக்குவுது ஆயுதா மாதர நீமு தேவரு நிம்முன காப்பாத்திதுன எத்திகோரி. எதுராளின பெட்டுவுக்கு வீரா மடகியிருவுது பாளுகத்தி மாதர நீமு தும்ப சுத்தவாத ஆவியாதவரோட பாளுகத்தியாத தேவரோட மாத்துன எத்திகோரி. 18 தேவரு நிமியெ ஒதவி மாடுவுக்காக ஏவாங்குவு நீமு எல்லா காரியகோளியாக தும்ப சுத்தவாத ஆவியாதவரு நெடசுவுது மாதர தேவரொத்ர வேண்டிகோரி. சோந்தோகுலாங்க தும்ப கவனவாங்க தேவரொத்ர வேண்டிகோரி. தேவரோட ஜனகோளு எல்லாரியாகவு ஆங்கே தேவரொத்ர வேண்டிகோரி. 19 அவுரோட ஒள்ளிமாத்துன ஏளிகொடுவுதுனால ஈக கைதியாங்க இருவுது நன்னுன தேவரு அவுரியாக மாத்தாடுவுக்காக தூதாளாங்க கெளுசி இத்தார. அதுனால நானு ஏ அஞ்சிகெயுவு இல்லாங்க ஏளிகொடுவுக்குவு, 20 அவுருன பத்தித ஒள்ளிமாத்துன ஏளிகொடுவாங்கெல்லா அவுரு நானு ஏளுபேக்கு அம்புது மாத்துன நனியெ கொடுவுக்குவு நீமு நனியாகவு அவுரொத்ர வேண்டிகோரி. வாழ்த்துகோளு 21-22 நனியெ ஏனு நெடைத்தாத அந்து நிமியெ ஏளுவுக்காக நனியெ பிரியவாங்க இருவுது தீகிக்குன நிம்மொத்ர கெளுசியவனி. நன்னுகூட உட்டிதோனு மாதரயிருவுது அவ ஆண்டவரியாக தும்ப உண்மெயாங்க கெலசமாடுவோனு. அவ நிம்மொத்ர பந்து இல்லி நாமு ஏங்கே இத்தவரி அந்து நம்முன பத்தி எல்லாத்துனவு ஏளி நிம்முன உற்சாகமாடுவா. 23 அப்பாவாத தேவருவு, ஆண்டவராத யேசு கிறிஸ்துவு நிமியெ நிம்மதின கொடாட்டு. கூடவுட்டிதோரு மாதரயிருவுது நீமு எல்லாருவு தேவரு மேல மடகியிருவுது நம்பிக்கெல உறுதியாங்காவுக்குவு, ஒந்தொப்புரு மேல ஒந்தொப்புரு இன்னுவு அன்பாங்க இருவுக்குவு தேவரொத்ர வேண்டுத்தினி. 24 நம்மு ஆண்டவராத யேசு கிறிஸ்து மேல அன்பு மடகியிருவுதுன புட்டுபுடுலாங்க ஏவாங்குவு அவுரு மேல அன்பாங்க இருவோரியெ தேவரு அவுரோட கருணென தோர்சுவுக்குவு அவுரொத்ர வேண்டுத்தினி. ஆமென். |
@New Life Computer Institute