2 கொரிந்தியரு 2 - சொர்கக்கு வழிநெடசுவுது புஸ்தகா

¹ அதுனால நானு திருசிவு நிம்மொத்ர பந்து நிமியெ மனகஷ்டான கொடுகூடாது அந்து நானே முடுவுமாடிகோண்டே.

² நானு நிமியெ மனகஷ்டான கொட்டுரெ அப்பறா யாரு நனியெ சந்தோஷான கொடுவுரு? நன்னுனால மனகஷ்டான அனுபவுசித நிம்முன தவர நன்னுன சந்தோஷபடுசுவுக்கு பேற யாருவு இல்லவே.

³ நானு பருவாங்க நனியெ சந்தோஷான கொடுபேக்காத நீமே நனியெ மனகஷ்டான கொடுகூடாது அம்புதுனாலத்தா நானு ஆங்கே எழுதிதே. நானு சந்தோஷவாங்க இத்துரெ நீமுவு சந்தோஷவாங்க இருவுரி. இதுத்தா நானு நிம்மு மேல மடகியிருவுது உறுதியாத நம்பிக்கெ.

⁴ நானு தும்ப மனகஷ்டதோடைவு, மனவேதனெயோடைவு, கண்ணீரோடைவு ஆ கடுதாசின எழுதிதே. நீமு கஷ்டபடுபேக்கு அம்புக்கு இல்லா. நானு நிம்மு மேல ஏசு அன்பாங்க இத்தவனி அந்து நீமு தெளுகோம்புக்குத்தா ஆங்கே எழுதிதே.

⁵ நனியெ மனகஷ்டான கொட்டோனு நனியெ மட்டுவில்லாங்க ஒந்தளவியெ நிமியெ எல்லாரியெவு மனகஷ்டான கொட்டுயித்தா. நிம்மு எல்லாரு மேலைவு அதுன அதிகவாங்க ஆக்குலாங்க இருவுக்குத்தா இதுன ஏளுத்தினி.

⁶ நிம்முல தும்ப ஆளுகோளு அவுனியெ கொட்ட தண்டனெயே சாக்கு.

⁷ அதுனால ஈக நீமு அவுன்ன மன்னுசி அவுன்ன ஆறுதலுபடுசுபேக்கு. இல்லாந்துர அவ தும்ப மனகஷ்டதுலயே மூழ்கியோய்புடுவா.

⁸ நெஜவாங்கவே நீமு அவுனு மேல அன்பாங்க இத்தாரி அந்து அவ தெளுகோம்புக்கு மாடுரி அந்து நிம்மொத்ர கெஞ்சிகேளுத்தினி.

⁹ நீமு ஏவாங்குவு நானு ஏளுவுதுன கேளி நெடைத்தாரியா அந்து நோடுவுக்குத்தா முந்தால எழுதித கடுதாசில ஆங்கே எழுதிதே.

¹⁰ நீமு ஒந்தொப்புன்ன மன்னுசிரெ, நானுவு அவுன்ன மன்னுசுத்தினி. நானு மன்னுசுபேக்கு அம்புது ஏதாசி இத்துரெ அதுன நிம்மு ஒள்ளிதுக்காக மன்னுசுத்தினி. இதுக்கு கிறிஸ்துவே சாச்சி.

¹¹ சாத்தானு அவுனோட தந்தரதுனால நம்முன ஜெயிச்சுலாங்க இருவுக்காக நானு ஆங்கே மன்னுசிதே. ஏக்கந்துர அவுனோட தந்தரகோளு நமியெ தெளிவுதுத்தான.

¹² இன்னுவு நானு கிறிஸ்துன பத்தித ஒள்ளிமாத்துன ஏளிகொடுவுக்காக துரோவா அம்புது ஊரியெ ஓயி இருவாங்க, ஆங்கே மாடுவுக்கு ஆண்டவரு நனியெ ஒள்ளி வாய்ப்புன கொட்டுரு.

¹³ ஆதிரிவு அல்லி நம்மு கூடவுட்டிதோனு மாதரயிருவுது தீத்துன நானு நோடுனார்துனால நன்னு மனசு அமெதி இல்லாங்க கஷ்டபட்டுத்து. அதுனால அல்லி இத்த ஜனகோளொத்ர ஓய்கோட்டு பத்தினி அந்து ஏளிகோட்டு அல்லி இத்து மக்கெதோனியா அம்புது ஜில்லாவியெ பொறபட்டு ஓதே.

ஒச ஒப்பந்ததோட கெலசகோளு

¹⁴ நாமு கிறிஸ்துகூட ஐக்கியவாங்க இருவுதுனால ஏவாங்குவு நாமு ஜெயிச்சுவுக்கு தேவரு ஒதவி மாடுத்தார. கமலவாத வாசனெ எல்லா எடகோளுலைவு பரவுவுது மாதர எல்லா எடகோளுல இருவோருவு நம்மு மூலியவாங்க யேசு கிறிஸ்துன தெளுகோம்புக்கு ஒதவி மாடுவுது தேவரியெ நாமு நன்றி ஏளுத்திரி.

¹⁵ தேவரு காப்பாத்துவோரியெவு, தேவரு காப்பாத்துலாங்க அழுஞ்சோவோரியெவு நாமு கிறிஸ்து தேவரியாக தோர்சுவுது தூபா மாதர கமலவாத வாசனெயாங்க இத்தவரி.

¹⁶ அழுஞ்சோவோரியெ நாமு அவுருகோளுன சாய்வுக்கு மாடுவுது எணதோட வாசனெ மாதர இத்தவரி. ஆதர தேவரு காப்பாத்துவோரியெ அவுருகோளுன பதுக்குவுக்கு மாடுவுது கமலவாத வாசனெயாங்க இத்தவரி. ஈ மாதர கெலசமாடுவுக்கு யாரியெ தகுதியித்தாத?

¹⁷ தும்ப ஆளுகோளு பேப்பாரமாடுவோரு மாதர தேவரோட மாத்துன பெலெ மாத்தாடுத்தார. ஆதர நாமு கவுடுசூது இல்லாங்க தேவரோட மாத்துன ஏளிகொடுத்திரி. கிறிஸ்துகூட ஐக்கியவாங்க இருவுது நம்முன அவுரோட கெலசக்காரருகோளாங்க கெளுசித தேவருத்தா நாமு கவுடுசூது இல்லாங்க ஏளுத்திரி அம்புக்கு சாச்சியாங்க இத்தார.