మార్కు 9 - Konda: కొండ బాసదు నెగ్గి కబ్రు1 యేసు వరిఙ్‌ ఈహు వెహ్తాన్‌, “నాను నిజం వెహ్సిన. ఇబ్బె నిహిమహి వరిలొఇ సెగొండార్‌ దేవుణు గొప్పసత్తుదాన్ వన్ని లోకురిఙ్‌ ఏలుబడిః కిజినిక సూణిదాక సాఏర్”. యేసుప్రబుఙ్‌ మూర్తి మారిసినాద్‌. 2 ఆరు రోస్కుసొహివెనుక యేసు పేతురు, యాకోబు, యోహనుఙ్‌ వన్నివెట ఉండ్రి పెరి గొరొత్‌ కూక్త ఒత్తాన్. ఆ నాల్‌ఎర్‌తప్ప అబ్బె మరి ఎయెర్‌బా సిల్లెర్‌. అబ్బె వరిఎద్రు వన్నిమూర్తి మారితాద్‌. 3 యేసు పొర్‌పాతి మహి సొక్క జిగిజిగి మెరిసిని తెల్లానిజాయ్‌ వజ ఆతాద్. యా లోకమ్‌దు నసొ తెల్లాఙ్‌ నొర్‌బానికార్‌ ఎయెర్‌ సిల్లెర్‌. 4 మోసెని, ఏలియ వరిఙ్‌ తోరె ఆతార్‌. వారు యేసువెట వర్గిజి మహార్‌. 5-6 అక్క సుడ్ఃజి సిసూర్ తియెలాతార్. అందెఙె పేతురు ఇనిక వెహ్తెఙొ నెస్‌ఏండ, “ప్రబు, మాటు ఇబ్బె మహిఙనెగెద్. అందెఙె మూండ్రి గుడుఃసెఙ్‌ తొహ్నిట్. నిఙి ఉండ్రి, మోసెఙ్‌ ఉండ్రి, ఎలియెఙ్‌ ఉండ్రి” ఇహాన్‌. 7 అయవలె ఉండ్రి మొసొప్‌ వరిఙ్‌ పిడ్ఃగితాద్‌. అయవలె అయ మొసొప్‌ లొఇహాన్, “వీండ్రు నా ఇస్టమాతి నా మరిన్. విన్నిమాట వెండ్రు”, ఇజి ఉండ్రి కంటం వాతాద్‌. 8 వెటనె వారు సురుల సుడ్ఃతిఙ్‌ వరివెట యేసు తప్ప ఎయెర్‌బా తొర్‌ఏతార్‌. 9 వారు గొరొన్‌ డిఃగ్‌జివాజి మహివలె, “లోకుమరిసియాతి నాను సాతివరిబాణిఙ్‌ మర్‌జి నిఙినిదాక మీరు సుడ్ఃతిక మహిక ఎయెఙ్‌బా వెహ్మట్”, ఇజి యేసు వరిఙ్‌ కసితం వెహ్తాన్‌. 10 యేసు వెహ్తివజ వారు ఎయెఙ్‌ వెహ్‌ఏండ వరిమన్సుదు ఇడ్ఃజి వరిలొఇ వారె వర్గితార్, “సాజి నిఙ్‌నిక ఇహిఙ అర్దం ఇనిక?”. 11 నస్తివలె వారు యేసుఙ్‌ వెన్‌బాతార్, “ఏలియ ముఙాల్‌ వాదెఙ్‌వెలె ఇజి యూదురి రూలు నెస్పిస్నికార్ ఎందానిఙ్‌ వెహ్సినార్‌? 12 యేసు ఎలియ ముఙాల్‌ వానాన్‌ ఇజి వెహ్తిక నిజమె. వాండ్రు వాజి విజు కొత్తఙ్‌ కినాన్లె. గాని లోకుమరిసియాతికాన్‌ నండొ కస్టమ్‌కు ఓరిసి మాలెఙ్‌ ఆజి లోకువన్నిఙ్‌ నెక్సిపొక్నార్లె ఇజి రాస్తి దనిఙ్‌ అర్దం మిఙి తెలినాదా? 13 గాని నాను మిఙి వెహ్సిన, ఏలియ వాతాన్. వన్ని వందిఙ్‌ రాస్తి లెకెండ్‌ వరిఙ్‌ ఇస్టం ఆతి వజ వారు వన్నిఙ్‌ కితార్. ఇజి వెహ్తాన్‌. దెయం అస్తికొడొఃదిఙ్‌ యేసు నెగెండ్‌ కిజినాన్‌ 14 యేసుని, సిసూర్, మహి సిసూర్ మహిబాన్‌ వాతిఙ్‌ సిసూర్ సురుల నండొ లోకుర్‌ కూడ్‌తి మహిక సుడుఃతార్. యూదురి రూలు నెస్పిస్నికార్ సిసూర్‌వెట వాదిసి మహార్‌. 15 అబ్బె మహి లోకుర్‌ విజెరె యేసుఙ్‌ సుడ్ఃతారె నండొ బమ్మ ఆజి వెటనె వన్నిబాన్‌ ఉహ్‌క్సివాజి వన్నిఙ్‌ మాడిఃస్తార్. 16 నస్తివలె యేసు, “మీరు ఇనిదన్నిఙ్‌ సిసూర్‌వెట వాదిసి మహిదెర్‌? ఇజి వెన్‌బాతాన్. 17 ఆ జనమ్‌లొఇ ఒరెన్ ఈహు వెహ్తాన్‌, “మేస్టర్‌, నా మరిసిఙ్‌ నీ డగ్రు తత్త. వన్నిఙ్‌ ఉండ్రి దెయం అస్తాదె వన్నిఙ్‌ వర్గిఏండ కితాద్. 18 ఆ దెయం నా మరిన్‌అస్ని వేడఃదు అబ్బెనె వన్నిఙ్‌ అర్‌ప్సినాద్. నస్తివలె వాండ్రు వెయుదాన్‌ పెంపులు కక్సి పల్కు కొహ్‌సినాన్. వాండ్రు డుడ్డువజ డఙ్‌న ఆజినాన్. ఆ దెయమ్‌దిఙ్‌ ఉల్‌ప్తు ఇజి నీ సిసూర్ వెట నాను వెహ్త గాని సిసూర్ అట్‌ఎతార్. 19 యేసు వెహ్తాన్‌, “నమకం సిల్లి యా తరమ్‌దికిదెరా, నాను ఎస్సొకాలం మీవెట మంజిన? మీరు కిజినికెఙ్‌ ఎస్తొ ఓరిస్తెఙ్‌? వన్నిఙ్‌ నా డగ్రు తగ్‌అ”. 20 నస్తివలె వారు ఆ కొడొఃదిఙ్‌ యేసుడగ్రు తత్తార్. ఆ దెయం యేసుఙ్‌ సుడ్ఃతిఙ్‌సరి వన్నిఒడొఃల్‌ విజు వణకిసి బూమిద్‌ అర్‌ప్తాద్. అర్‌ప్తాదె వాండ్రు నుడ్ఃబాజి పొఙు కక్తాన్. 21 నస్తివలె యేసు, “విన్నిఙ్‌ దెయం అసి ఎస్సొ కాలం ఆతాద్?”, ఇజి అపొసిఙ్‌ వెన్‌బాతాన్. “ఇజ్రి వెలెహనె”, ఇజి అప్పొసి వెహ్తాన్‌. 22 “ఆ దెయం కొడొఃదిఙ్‌ సప్తెఙ్‌ ఇజి నండొసుట్కు సిసూద్, సిల్లిఙ ఏరుదు అర్‌ప్సి మహాద్‌. నీను ఇనికబా కిదెఙ్ అట్ని ఇహిఙ మా ముస్కు కనికారం ఆజి మఙి సాయం కిఅ”, ఇజి అప్పొసి యేసుఙ్‌ వెహ్తాన్‌. 23 యేసు వెహ్తాన్‌, “నీను ఇనికబా కిదెఙ్ అట్తిఙ ఇజి మీరు నఙి వెహ్నిదెరా? ఎయెన్‌బా దేవుణు ముస్కు నమకం ఇడ్తిఙ వన్నిఙ్‌ దేవుణు ఇనికబా కిదెఙ్ అట్నాన్”. 24 వెటనె ఆ ఇజ్రి వన్ని అప్పొసి, “నాను నమిజిన. అనుమానం సిల్లెండ నమినివజ నాను నిఙి నమ్మిదెఙ్‌ సాయం కిఅ”, ఇజి డటం వెహ్తాన్‌. 25 అబ్బె లోకుకూడ్ఃజి ఉహ్‌క్సి వానిక యేసు సుడ్ఃజి ఆ దెయమ్‌దిఙ్‌ “ఓ గుల్లబొయ్‌ర దెయం, యా కొడొఃదిఙ్‌ డిఃసి వెల్లి సొన్‌అ ఇజి నాను ఆడ్ర సీజిన. ఎసెఙ్‌బా మర్‌జి వన్ని లొఇ రమ”, ఇజి డటిసి వెహ్తాన్‌. 26 నస్తివలె ఆ దెయం గగొలాజి వన్నిఙ్‌ గొప్ప వణకిసి డిఃస్త సొహాద్. ఆ కొడొఃదిఙ్‌ సుడ్ఃతిఙ సాతివన్నివజ మహాన్‌. అక్క సుడ్ఃజి నండొండార్‌ “యా కొడొః సాత సొహాన్‌” ఇహార్‌. 27 గాని యేసు వన్ని కీదు అసి నిక్తిఙ్‌ వాండ్రు నిహాన్. 28 యేసు ఉండ్రి ఇండ్రొ సొహివెనుక, యేసు అఙ మహిఙ్‌ వన్నిసిసూర్, “మాపు ఎందానిఙ్‌ఆ దెయమ్‌దిఙ్‌ ఉల్‌ప్తెఙ్‌ అట్‌ఏతాప్‌? ఇజి వెన్‌బాతార్. 29 అందెఙె యేసు, “యా రకం దెయమ్‌కు పార్దనం వెలెనె గాని మరి ఇనిదనివెలెబా సొన్‌ఉ”, ఇజి వెహ్తాన్‌. యేసు వన్ని సావువందిఙ్‌ మరి వెహ్సినాన్‌ 30 వారు అబెణిఙ్‌ సొన్సి గలీలయదాన్‌ సొన్సి మహార్‌. వారు ఎంబె మంజినారొ ఇజి ఎయెఙ్‌బా తెలిదెఙ్‌ యేసుఙ్‌ఇస్టం సిల్లెతాద్. 31 ఎందానిఙ్‌ ఇహిఙ, యేసు వన్ని సిసూర్‌ఙ నెస్‌పిసి మహాన్‌. ఇనిక ఇహిఙ, “లోకుమరిసియాతి నఙి లోకాఙ్‌ ఒపజెప్నార్‌లె. వారు నఙి సప్నార్‌. మూండ్రి రోస్కాఙ్‌ నాను బత్కిజి నిఙ్‌నాలె. 32 గాని యేసు వెహ్తిమాట సిసూర్ అర్దం కిఏతార్. ఆ మాటెఙ వందిఙ్‌ వన్నిఙ్‌ వెన్‌బాదెఙ్‌ వారు తియెలాతార్. విజేరిఙ్‌ ముస్కు పెరికాన్‌ ఎయెన్‌? 33 వారు కపెర్నహము ఇని పట్నమ్‌దు వాతార్. వారు ఇండ్రొ వాతిఙ్‌ యేసు మీరు సర్దు ఒరెన్‌వెట ఒరెన్ ఇనిదని వందిఙ్‌ వాదిసి మహిదెర్‌. ఇజి వెన్‌బాతాన్. 34 గాని వారు ఇనిక వర్గిఏండ అలెతార్. ఎందానిఙ్‌ ఇహిఙ వానివలె సర్దు ‘మా లొఇఎయెన్‌ పెరికాన్‌’ ఇజి ఒరెన్‌వన్నివెట మరిఒరెన్‌ వాదిసి మహార్‌. 35 నస్తివలె యేసు బస్తాండ్రె పన్నెండు మణిసిర్‌ సిసూరిఙ్‌ కూక్సి ఈహు వెహ్తాన్‌, ఎయెన్‌ మహి వరిముస్కు పెరికాన్‌ ఆనాండ్రొ, వాండ్రు విజెరి ఇంక అగిజి మండ్రెఙ్. వాండ్రు విజేరిఙ్‌ సేవ కిదెఙ్. 36-37 వెనుక యేసు ఒరెన్ ఇజ్రి కొడొఃదిఙ్‌ తసి వరినడిఃమి నిల్‌ప్తాన్. మరి ఆ కొడొఃదిఙ్‌ఎతాండ్రె ఈహు వెహ్తాన్‌, “ఒరెన్ ఇజ్రి కొడొఃదిఙ్‌ ఎయేర్‌ నా పేరు అసి వరిఇండ్రొ డగ్రు కినారొ వారు నఙి డగ్రు కినార్. ఎయెర్‌ నఙి డగ్రుకినారొ నఙి ఆఎండ నఙి పోక్తివన్నిఙ్‌ డగ్రు కినార్. మా ముస్కు పగసిల్లికాన్‌ మా పడఃకాదు మన్నికాండ్రె 38 యోహాను వెహ్తాన్‌, “మేస్టర్‌, ఒరెన్ నీ పేరు అసి దెయమ్‌కాఙ్‌ ఉల్‌ప్తిక మాప్‌సుడ్ఃతాప్. వాండ్రు మాలొఇ మనికాన్‌ ఆఏన్. అందెఙె మాపు వన్నిఙ్‌ అడ్డు కిత్తాప్. 39 యేసు వెహ్తాన్‌, “వన్నిఙ్‌ మీరు అడ్డు కిమాట్. నా పేరు అసి యేలు బమ్మాతి పణికినికాన్‌ వెటనె నా వందిఙ్‌ సెఇక వెహ్‌ఏన్. 40 మా ముస్కు పగ సిల్లికాన్‌ మా పడఃకాదు మనికాండ్రె. 41 నాను నిజం వెహ్సిన, ఎయెర్‌బా మీరు క్రీస్తు వారుఇజి వెహ్సి, నా పేరు అసి గినాడు ఏరుఉండెఙ్‌ మిఙి సితిఙ దేవుణు వరిఙ్‌నిజం ఇనాయం సీనాన్. తప్పకిబిసినివన్నిఙ్‌ నండొ సిక్సి వానాద్‌ 42 నాముస్కు నమ్మకం ఇడ్తి యా ఇజిరి కొడొఃనన్ని వరిలొఇ ఒరెన్‌వన్నిఙ్‌ ఎయెర్‌బా తప్పకిదెఙ్‌, సరి తోరిస్తిఙ వాండ్రు మెడఃదు పెరి జతపణుకు తొహె ఆజి సమ్‌దరమ్‌దు అడ్ఃగి ముడిఃగి సొనొక వన్నిఙ్‌ నెగెద్. ఎందానిఙ్‌ ఇహిఙ తప్పకిబిస్నివన్నిఙ్‌ ఒద్దె సిక్సి వాన్‌ద్‌. 43 నీ కియు నిఙి తప్ప కిబిస్తిఙ దనిఙ్‌ కత్సి విసీర్‌అ. 44 రుండి కికు మంజి ఎలాకాలం సిసు మంజినిబాన్ సొన్‌ఏండ ఉండ్రె కియు మంజి ఎలాకాలం బత్కిదెఙ్‌ దేవుణుబాన్‌ సొనిక నెగెద్. 45-46 నీ కాలు తప్పకిబిస్తిఙ దన్నిఙ్‌ కత్సి విసీర్‌అ. రుండి కాల్కు మంజి ఎలాకాలం సిసు మంజినిబాన్ దేవుణు నిఙి అర్‌ప్‌ఏండ, సొట వాండ్రు ఆజి ఎల్ల కాలం బత్కిదెఙ్‌ దేవుణు బాన్‌ సొనిక నెగెద్. 47 నీ కణుక తప్పకిబిస్తిఙ దన్నిఙ్‌ లాగ్జి విసీర్‌అ. రుండి కణుకు మంజి దేవుణు నిఙి నరకమ్‌దు అర్‌పెఎండ ఉండ్రె కణక మంజి దేవుణు ఏలుబడిఃదు మంజినిక నెగెద్. 48 బానె వరి పిడుఃకు సాఉ. సిసు నమ్‌ఏద్”. 49 సోరుదాన్‌ ఇడ్నివజ దేవుణుదిఙ్‌ నమ్మిని వన్నిఙ్‌ సిసు నని కస్టందాన్‌ ఇడ్నాన్. 50 సోరు, నెగ్గికాదె గాని దన్నిఙ్‌మని రుసి సొహిఙ ఎలాగ మరి దన్నిఙ్‌ రుసి తపిస్తెఙ్‌ ఆనాద్‌? మీరుబా సొరు రుసి సీనివజ ఒరెన్‌వెట ఒరెన్ సమనం కల్గిజి మండ్రెఙ్”. |
© 2006, Konda Tribal Development Foundation (KTDF)
Wycliffe Bible Translators, Inc.