ZUDI 1 - JAA TƏMARWAŊ

Mirkiŋ

¹ Jeere kefter toŋ kəya haa ten Zudi, seenə Zaki, ten hulum bə joŋre kə Yeesu Kristuŋ. Ten jeere kefter toŋ haa a nəənəŋ, aŋ kaa gə minti Pepeŋ mantənaŋ, Pep Abaŋ bəlaŋ, daana Yeesu Kristu bə goloŋ cəərəŋa haa tó gəm.

² Ji bə giidu pəsaŋ kə Pepeŋ, kəkaɓiŋ daana bele nuutuŋ jəə la cəərəŋa pisi jəə.

Kaa gə minti paapa bə jogte hateŋa a kuɗuŋa baŋ

³ Gədaarən gə agŋ-agŋ, ten a bə bandə-bande bə jeereŋ kefter cəərə kel kə seere bə minti áŋ keɗe, áŋ fəlnuŋ. Bə hebkənaŋ, wə koloŋ máŋ karman bə han guudən minti ten jeereŋ la bə zeŋ guudəŋ minti aŋ duurə la gud kel kə de gə minti Pepeŋ jugnuy a kaa nuutuŋ na kampa ɗaaməna faɗiŋ.

⁴ Gud maa mo sərdə kaa gə bay iski ku Pepeŋ, ɓəlwətəŋ aduubə dəŋ na dəgaaya-dəgaaya. Kel gə minti waate sam pisi kə Pepeŋ, yə kulnuy wəra dəra'i də ɗiki neeteŋ minti té jəŋ dəgləŋ ne nuutuŋ, cəərə Pepeŋ gaara yaŋ wəra. Yə koloŋ kirki a Yeesu Kristu, Barkaŋ náŋ, Bərdə náŋ ɗaaməna'iŋ. Kel gə jeerə-jeereŋ a waataŋ warda anə hãã faɗi minti kəəti kə Pepeŋ bə doy.

⁵ Kel teŋ wəra də dərəŋ pəsaŋ anə kaŋkaŋ, səma ten hare bə dogoŋ dəŋa nuutu pa minti Barkaŋ seereŋ kaanə Israyel warda giidə seŋka də Eziptəŋ da. Adoro kəya, kaa gə minti doŋ gud Pepeŋa baŋ, wə əwnəy wəra.

⁶ Aŋ golə la kəm, *kaa kə digi kə Pepeŋ gə minti məlaŋ ɗiki di cəərə abay də minti wə a əynəy diŋa təwa baŋ, yə yaakaŋ ko neete bə isiŋ wəra. Yə máŋ wəra gə əntə-ənti də gaalay dər ko bə tilməŋa bə faɗnə-faɗna bə mi hi bə jeme kəətiŋa.

⁷ Aŋ golə la kəm paŋ, kaanə Sodom də kaanə Gomor də kaa gə giidə vil gə agəjaŋ dəŋ yaakaŋ kusri bə jəəti dəgləŋa damdi kaa kə digi teŋ ana. Yə əstəŋ də gidiirə kar anə hãy neete faɗi. Gud teŋa ta yə bə se gəəliŋa dər cəwa də bay teweŋa bə ge dər kaŋ keɗe haa minti yə a ji bədoona ana ba.

⁸ Kaa té gə minti paapa bə iski ku Pepeŋa baŋ, bə ji kel neeteŋ haa bədoona ana gəm. Soone neeteŋ wəətəy saksaki haa minti yə ɗee la a jəəti baymele bə zeɓe kusriŋ, yə bayə abay kə Pepeŋ la wəra, yə sartə kaa kə hame məyan gə apəy naŋ la gəm.

⁹ Koo nuutu Mikayel, hulum bə digi bə ɗe tiinə kumsuŋa jəŋ bədoona ana ba. Də bə minti yə koloŋ awəy də Nərtitiŋ cəərə titi də Moyisiŋ, Mikayel amaŋ kusru, wə waataŋ kel kə jeme kəəti də Nərtitiŋ də sarte ada ba. Wə waatəna təwa minti: «Barkaŋ jəy daŋgay di la!»

¹⁰ Səma, kaa teŋ sarte kar gə minti guudiŋ paapa də diri baŋ. Kar gə minti də diriŋ haa gə minti də dər bege bə kəmpuruŋ gəm, kole bə bəsəy wəra haa té toki.

¹¹ Gəəliŋ neete, gud maa mo yə haŋ haa kəkəy bə minti Kayen a həənuŋ. Yə yaakaŋ kusri bə laŋte a kəkəy bə golde soloya damdi Baalam ana, yə koloŋ kuy cəərə Pepeŋa damdi Kore ana, yə bə bese wəra haa damdi tó ana gəm.

¹² Yə kolte hame nəəti bə adəwaldəŋ wəra paapa *cetceti ba haa té. Yə hame kəɗwəy ha'aŋ, kese paapa bə jiya anə weseki ba, yə ɗiki haa cəərə giidi təwa. Yə haa damdi kamra gə minti kaŋkaw zugtuy guudi boobo, yə hage baŋ ana. Yə haa damdi kəbaŋ gə minti paapa bə we də ko bə minti kəbaŋ we duruŋ baŋ ana. Kəbaŋ teŋ, yə pəŋ kəsar diŋ wəra, yə doge meŋ kampa ɓasi .

¹³ Yə haa damdi kan kəmtəŋ gə dabte də səɓakiŋ ana, səəpə di də minti malte warnaŋ gole jeeɗem damdi kel kə kes-kese gə minti yə bə jiyaŋ ana. Yə haa damdi seska də minti kəkəy lenteŋ wəra dərəŋ ana. Pepeŋ ɗəmpənəy ko neete bə minti yə ɗe a isi ada bə faɗnə-faɗnaŋ dər ko bə tilmə nilik-nilikiŋa.

¹⁴ Enoki, gidiirə Adam a moomo də seeɗaŋaŋ, a jogoŋ ku miniŋ warda ciiri da dayday minti: «Aŋ golə la, Barkaŋ yaŋ bə bi da də kaa kə digi cetceti nuutuŋ guudu da anə guɓ-guɓi ablaw

¹⁵ bə bi a jeme kəəti də kaŋ keɗeŋ. Kaa gə minti paapa bə ɗe haa də ku Pepeŋ baŋ, wə bə jəy daŋgay di gud baymele neete bə wələk-wələkiŋa bə minti kulnuy wəra paapa cetceti ba daana gud kuy bə minti yə wəətu bə ɗəmuŋ.»

¹⁶ Yə ŋorme kuy saksaki, giidi bə ɗəməya cəərə kumsi, kel kə bayməlaŋ gə minti giidi bələy, ɗe diiri haa té. Yə waate haa kel gə hage sam kusriŋ saksaki, yə tokɗe kaŋ haa bə jəy tiniini di təwa.

Ge bə kosoŋ a kaa kə doo-deŋ

¹⁷ Gədaarən gə agŋ-agŋ, nəətiŋ ha'aŋ, aŋ harə la bə ɗiki cəərə kel gə minti *kaa kə vaa-ve kə Barkaŋ náŋ Yeesu Kristu a waatənaŋ dəŋ warda ajew daŋ minti:

¹⁸ «A tewe bə koŋaŋ, kaa kə dafɗaŋ ji yaŋ. Kel kə bayməlaŋ gə minti giidi bələy, ɗe diiri haa té.»

¹⁹ Kaa teŋ kaate awəy də ceme dər kaŋ, giidi haa ɗiki bə cəərə seŋkaŋ saksaki, Tiirə Pepeŋ paapa giidiya ba.

²⁰ Səma aŋ, aŋ gədaarən, ɗe dəŋ jəə la saksaki bə əsə-isi cəərə de dəŋ *cetcetiŋa. Aŋ toosə la haa də səɓaki kə Tiiru Cetcetaŋ.

²¹ Aŋ əsə la ŋəŋ dər bele kə Pepeŋa. Aŋ malə ɗiki dəŋ la bə mi cəərə ji bə giidu pəsaŋ kə Barkaŋ náŋ Yeesu Kristuŋa minti wə ayaŋ dədərgə də bay teweŋ yaŋ.

²² Kaa gə minti də awəy kuya cəərə deŋaŋ, aŋ jəə giidiŋ pəsaŋ la siri.

²³ Aŋ topə sirdiŋ da warda ku cəwaŋ da bə bi a siiriy wəra. Aŋ jəə giidəŋ pəsaŋ la sar sirdi kaayaŋa, səma aŋ jəə la gə naa-ne giidiŋa ada gəm. Koo dəməəmə neeteŋ aŋ a ɗoota ba, gud bə minti a wəra də zodə-zode gud ɗiki bə baymele neeteŋa.

Kel gə tokɗeŋ

²⁴ -

²⁵ Pep ɗaaməna'iŋ, hulum bə seere áŋ, wə bə nakə-neke bə goloŋ cəərəŋ minti aŋ a laŋte bə ji baymeleŋa ba. Wə bə nakə-neke bə ɗe dəərəŋ warna tiinu na a ko bə məyan nuutuŋ na. Aŋ tuli ada na haa anə fənay-fənay bay baymele sarəŋa. Gud Barkaŋ náŋa Yeesu Kristuŋ, tokɗeŋ, məyan, səɓakiŋ daana abay, jəə la kə Pepeŋ ajew də mele bə gud koŋ daŋ, hebkəna, daana bə faɗnə-faɗna gəm. *Amen.