ZAKI 5 - JAA TƏMARWAŊ

Kaa kə hurma gə sərkəŋ

¹ Hebkəna aŋ kaa kə hurmaŋ, aŋ pəŋtə kosnoŋ la wəra pisi bə jeɓren kuna. Aŋ darə kuŋ la bə hage kas gəəli bə minti bə bi da cəərəŋ daŋ.

² Hurma nəətiŋ bə cimi yaŋ wəra, googo hamaŋ dəməəmə nəətiŋ yaŋ wəra.

³ Soloy nəətiŋ, də kooso nəətiŋ bə welɗe pisiŋ, pilki bə məltəy yaŋ wəra. Bə ɗe a ji kəmnə də kəkəy cəərəŋa minti aŋ a jəŋ da anəkay, haa tá faɗi gəm. Pilki taŋ bə kole yaŋ cəərəŋa bə kuŋ kusuki dəŋ wəra damdi cəwaŋ ana. Bə minti aŋ máŋ wəra maŋ sar hi bə minti seŋka tewe wəraŋ, aŋ ləwaŋ cəərə hurma lewe ɗaw!

⁴ Aŋ gosə gole la kəm, aŋ ayaŋ werke kə kaa gə minti jəŋ joŋreŋ giidə aka nəətiŋaŋ bə cəmaŋ kaasaw da aker daŋ ba. Aŋ jiɓriy hage neeteŋ la kəm mo! Hage neete toŋ awaŋ kosnə Barkaŋa, Pep Bərdə Duuriŋ.

⁵ Aŋ hamaŋ abay nəətiŋ wəra cəərə seŋkaŋa kəna daana aŋ jəŋ kel gə giidiŋ beleŋ wəra kəna gəm. Aŋ annaŋ kusrəŋ wəra damdi bege bə minti kaŋ ənnəy bə ɗe a ceme wəraŋ ana. Ana doloy hi bə jeme kəəti tuluŋ ne ɗaw.

⁶ Kaa ɗekeriŋ, aŋ tupnuy də kəətiŋ, aŋ əwtənəy wəra. Kaa teŋ gergeŋ dəərəŋ ba.

Aŋ əsə la dərəŋ ɗəl, aŋ toosə la

⁷ Bədoona ana ta kəsaananti, aŋ əsə la dərəŋ ɗəl bə mi hãã bə minti Barkaŋ hare daŋ. Aŋ gosə gole la kəm cəərə hulum bə keɗeŋa mo: bə minti koŋ hagaŋ ne, wə jo'e kaasaw nuutuŋ. Adoro wə isi duru anə ɗəlla bə mi tewe bə cəərə ko bə hageŋa bə ɗe a ceme kaasaw nuutuŋ.

⁸ Aŋ gəm ha'aŋ, aŋ əsə la dərəŋ ɗəl, aŋ coɓə kusrəŋ la pisi coɓə bə mi, gud maa mo, hi bə minti Barkaŋ hare duru daŋ wəra maŋ.

⁹ Kəsaananti, aŋ a kole bə ŋorme kuŋa cəərə kumsəŋa ba, kir minti Pepeŋ a ɗe a topoŋ də kel ba. Hulum bə jeme kəətiŋ máŋ wəra maŋ saraŋa ɗaw.

¹⁰ Kəsaananti, aŋ gosə gole la kəm cəərə *kaa gə minti jogtoŋ ku mini kə Pepeŋ wəra daana waataŋ kel wəra də səmuŋ. Yə əsəŋ diri ɗəl bə se gəəliŋa. Aŋ jəə la bə té ana gəm.

¹¹ Áŋ aye aŋkeŋ a kaa gə minti a əstəŋ da ŋəŋ-ŋəŋ də səɓakiŋ haa gud teŋa. Aŋ a əskəŋ kel kə dayday cəərə Jobi, minti wə əsəŋ duru ɗəl dər gəəliŋa. Aŋ bə asaŋ karman bə minti Pepeŋ haraŋ bə əyu du adoroŋ gəm. Gəəzi ha'aŋ, Barkaŋ ji giidu pəsaŋ sar kaŋa daana wə jəy pisi gəm.

¹² Daŋgeŋ ha'aŋ kəsaananti, aŋ a kalte kuŋ kas kel ba. Aŋ a kalte kuŋ də tarmə pepeŋ bə gəm, də seŋkaŋ bə gəm, də karman baalaŋ ba anə ceki faɗi gəm. Aŋ waataŋ ne minti «ãã», wə jəə la haa ãã bə gəəzə-gəəziŋ. Aŋ waataŋ ne minti «paapaŋ», wə jəə la haa paapa bə gəəzə-gəəziŋ faɗi gəm. Aŋ jəə la bədoona kir minti kəəti kə Pepeŋ a topoŋ ba.

Toose kə hulum bə minti dər Pepeŋa ɓetiŋ

¹³ Hulum kəman jəəne adəwaldəŋa bə leseŋ, wə toosə Pepeŋ la. Kumundu jəəne ada dər waaleŋ, wə gaa gudul la bə tokɗe Pepeŋ.

¹⁴ Kumundu jəəne ada də ɗemeŋ, wə mantə kaa kəmtəŋ gə tiinə kaa kə Tapiŋ la, yə bəə la a toose cuuru a kəkəy bə sətu sona tiinu də sam Barkaŋ.

¹⁵ Yə jəəne gə doo-de ku tərməyi minti Pepeŋ neke bə hare kel cəərə toose kə teŋaŋ, hulum toŋ seere wəra, wə hare wəra holoŋ-holoŋ caw. Hulum toŋ a jəŋ neŋa baymele moŋ, Pepeŋ vəəgi giidu wəra cuuru faɗi gəm.

¹⁶ Gud teŋa ta, aŋ kaa kuŋ la wəra cəərə baymele nəətiŋa tiinə kumsəŋa daana aŋ toosə la cəərə kumsəŋa kir minti aŋ seerə la wəra. Toose kə hulum bə minti dər Pepeŋa ɗekeriŋ də səɓaki ablaw.

¹⁷ Aŋ golə la kəm cəərə Eli bə daydaya mo, wə a jəŋ haa hulum bə áŋ ana toki gəm. Wə toosoŋ Pepeŋ də səɓaki ablaw minti koŋ a hage ba, gəəzi koŋ laataŋ soope də nusi bay ti duru adawra giidə seŋka nuutuŋa.

¹⁸ Adordə teŋa kəyaŋ, wə haraŋ bə toose pa minti koŋ harə la bə hage, kəya koŋ haraŋ bə hage faɗi, kaasaw haraŋ bə ji wəra a kuɗiŋa gəm.

¹⁹ Kəsaananti, jəəne minti hulum guudəŋa məna lenteŋ ne minti wə yaakaŋ kəkəy bə gəəziŋ ne wəraŋ, kumundu baalaŋ guudəŋa hərnu də ne a kəkəy kə Pepeŋ daŋ,

²⁰ aŋ asə la faɗi minti, hulum bə minti haraŋ hulum bə baymeleŋ də ne a kəkəy pisiŋ daŋ, wə siirunu wəra a dədərgə du faɗi. Baymele kə hulum tó bə baymeleŋ a jəə la nuutu ablaw ɗaw, Pepeŋ vəəgi giidu wəra cuuru gəm.