ZAKI 4 - JAA TƏMARWAŊ

Kaa gə minti bele kar gə cəərə seŋkaŋ

¹ Awəy daana gəbaŋ bə minti awte kaasəŋaŋ, kəsar di feke haa da ane də mo? Kəsar di feke da haa a ɗiki nəəti bə baymele bə minti saksaki bə duuri də kusuki dəŋ.

² Aŋ saane kar, səma aŋ nəkaŋ bə fələy ba, bədoona kəya tə bə moŋ, aŋ golde kaŋ bə awe faɗi. Aŋ golde kar də səɓaki ablaw, də teŋ keɗe aŋ paapa bə fələya ba. Kəya tə bə moŋ, aŋ a gəbaŋa daana awəya adəwaldəŋa haa sə teŋ. Kar gə minti aŋ də caadiŋ, aŋ paapa bə fələya ba haa gud bə minti aŋ paapa bə waate Pepeŋa ciiri baŋ.

³ Jəəne nuutu minti aŋ a wəətunu ciiri ɗaw, aŋ fələy ba, gud bə minti aŋ məntəy haa paapa gud karman pisi ba. Aŋ məntəy ha'aŋ, bə ɓəlkəy wəra boobo bə ji karman bə minti ɗiki nəəti bə baymeleŋ bəluŋ.

⁴ Aŋ kaa teŋ gə minti paapa bə isi gud Pepeŋa ɗeketi baŋ! Aŋ nuutu gə asə-ase minti tam jəəne jaa də kar gə cəərə seŋkaŋ tam wəra acukur də Pepeŋ mo? Bədoona ta, hulum bə minti bəlaŋ ne minti tó jəə la jaa də kar gə cəərə seŋkaŋ kənaŋ, wə kole kusru wəra haa acukur də Pepeŋ.

⁵ Aŋ ɗiki nəətiŋ haa minti kel kə boome mo bə minti Kefter kə Pepeŋ waate minti: «Tiirə hulum də minti Pepeŋ kəlnu du giidu minti wə jəə la caw, giidu ɗəmu cəərə ablaw.»

⁶ Səma, pisi bə minti Pepeŋ jəw sar áŋaŋ dəŋaŋ wəra hasi. Gud teŋa ta, Kefter kə Pepeŋ waate minti bəŋa: «Pepeŋ hẽŋe wəra tiinə kaa gə minti teke cəərə kusri apəyaŋ, səma wə ji giidu pəsaŋ cəərə kaa gə minti harte cəərə kusri adoro tiinuŋ.»

⁷ Gud teŋa ta, aŋ yaakə kusrəŋ la ŋəlaw a Pepeŋ. Aŋ hẽŋə la wəra tiinə Nərtitiŋa, bədoona kəya a ze yaŋ warna də tara anə tooto saraŋ na faɗi.

⁸ Bədoona ta, aŋ zee la sar Pepeŋa maŋ, wə zee yaŋ saraŋ da maŋ gəm. Aŋ kaa gə minti ɗe dəŋ bə jutə-jutiŋ! Aŋ kaa kə bayməlaŋ, aŋ pəə kaasaŋ la wəra sar baymeleŋa, aŋ pəə baymele bə ku tarməyaŋ la wəra keɗe gəm.

⁹ Aŋ laawə la gud baymele nəətiŋa, aŋ hagə la, aŋ naaktə kuŋ la ɗaw. Bə minti aŋ sə a awteŋa hin, aŋ hagə la ɗaw. Bə minti aŋ sə a waaleŋ, aŋ laawə la ɗaw.

¹⁰ Aŋ harə cəərə kusrəŋ la adoro tiinə Barkaŋ Pepeŋa, a ko toŋa kəya, wə haŋ cəərəŋ yaŋ apəya.

A waate kel kə bayməlaŋ cəərə kumsuma ba

¹¹ Kəsaananti, aŋ a waate kel kə bayməlaŋ cəərə kumsuŋa adəwaldəŋa ba. Gud maa mo, hulum bə minti waate kel kə bayməlaŋ cəərə siinuŋaŋ, kumundu ba wə koloŋ ne kumna bə jəmu kəəti duŋ, wə waate haa kel kə bayməlaŋ cəərə *ku gili kə Pepeŋa daana wə kole kumna bə jəmu kəəti du. Bə minti tam koloŋ ne kumna bə jeme kəəti bə ku giliŋ, tam koloŋ haa hulum bə minti paapa bə humi kosoŋa cuuru pəda, tam jəmu kəəti du máŋ haa jeme təwa.

¹² Anaaŋa hulum bə aye ku giliŋ haa Pepeŋ məna faɗi, jeme kəəti də kaŋ duuru haa tó məna faɗi gəm. Bə nakə-neke bə seere hulum wəra, kumundu ba bə bəsu wəra bə faɗnə-faɗnaŋ, haa tó gəm. Tam gəm taŋ, tam gole dər kusruma haa minti tam mindi mo bə minti tam koloŋ kumna bə jeme kəəti də kumsum?

Áŋ asaŋ ko bə ajew ba

¹³ Hebkəna aŋ pəŋtə kosnoŋ la wəra pisi, aŋ kaa gə minti waate minti bəŋa: «Dayna, kumundu ba dibiiniŋa, ten ɗe a gəryi giidə seŋka kəmana anəkay-anəkay, ten le ada, ten mele celeere yaŋ bə fele soloy ablaw.»

¹⁴ Aŋ kaa gə minti waate kumsə kel teŋ kəyaŋ, kel gə minti ɗe a jəŋ dər ko bə dibiiniŋaŋ də dərəŋ mo? Dədərgə dəŋ haa maa mo? Gud maa mo a haa damdi kese bə minti vaŋ warda anə tinil ana, wə isi anə sawəwa bagŋ, kəya wə vede wəra faɗi.

¹⁵ Aŋ a kir waate haa ɗaw minti: «Barkaŋ Pepeŋ bəlaŋ neŋ, are ji yaŋ zugi, are ji yaŋ anəkay-anəkay.»

¹⁶ Səma bə hebkənaŋ ha'aŋ, nəətiŋ aŋ teke cəərə kusrəŋ apəya daana aŋ hage sam kusrəŋ. Kumsə teke bə cə bə apəya toŋ kəyaŋ, paapa kel pəsaŋ ba.

¹⁷ Bədoona ana, hulum bə minti asaŋ hel də ji karman pisiŋ ne, wə juunu baŋ, wə jəŋ haa baymele.