ZAKI 3 - JAA TƏMARWAŊ

Kəsəlɗə hulum

¹ Kəsaananti, aŋ a golde minti aŋ jəə la ablaw aduubə dəŋa bə hate giidə kuli kə kaa kə Tapiŋa ba. Gud maa mo, aŋ asaŋ ne, jəəne minti áŋ kaa kə hate kaŋ bə jəəti baymeleŋ, kəəti bə cəərə áŋ ɗe a deŋe kə kaa kaayaŋ.

² Áŋ keɗe, áŋ kunti kuurə kel ablaw a kəkəy bə wəətiya. Səma, jəəne minti hulum kəman yaŋ, toŋ paapa bə kunti kuurə kel kə waate nuutuŋa ba anə cekiŋ, wə haa hulum bə minti sarte paapa suru anə weseka ba, wə bə nakə-neke kirka ame kusru wəra keɗe gəm.

³ Áŋ gosə gole la kəm, áŋ feke harjam ku anə gədaamoŋa haa minti yə doo ku áŋ la. A ko toŋa kəya áŋ neke bə kay tiini, bə ɗe diiri a ko bə minti giidə áŋ beleŋ.

⁴ Aŋ gosə ɗəkə la kəm cəərə kətartawa gə minti ɗe dər kan kəmtəŋa mo: yə jəəne neete kəmtəŋ bə maa ana moŋ, daana minti kaŋkaw jəəne nuutu bə həlyəya ablaw ɗawmay, yə huɗuy haa də karmə paara anə pempereŋ-pempereŋ. Turtiŋ ɗe a mele haa a ko bə minti giidə hulum bə hoɗaŋ a bəlnuŋ.

⁵ Bədoona gəm, kəsəlɗə hulum haa karman weseki dər kusuki du, səma yə gə nakə-neke kirka ji kel kəmtəŋ. Aŋ golə la kəm, kuɓursi bə cəwa anə ɓere'a neke bə ki ful warna lamnaŋ tó keɗe'i.

⁶ Kəsəlɗə hulum gə nakə-neke bə ɓalke kel damdi cəwaŋ ki koŋ ana gəm. Yə haa ko bə minti gidiirə baymele bə cəərə seŋkaŋ bə gaa-ge cuuru wəra adaŋ. Yə yaŋ sar áŋa ada bə kar də áŋ kaayaŋ teŋ ana gəm. Də baymele neete toŋ, yə ɓalkam warda a we dəm da hãã a me dəm na warna. Ɓalke də kel gə kəsəlɗəm bəŋ haa sar Nərtitiŋ da də kusrə faɗi.

⁷ Hulum bə nakə-neke bə gede ku kar wəra keɗe'i: bege bə waraŋ, kaskoŋ, kar gə minti ɗe cəərə giidiŋ, anə askaŋ, keɗe gilaŋ hulum gədnəy kuy wəra.

⁸ Səma, hulum anə məna nəkaŋ bə ame kusulɗu ba. Yə haa karman bə baymele bə minti bə halye anə kəla'i daana yə wəra gə ɗosə-ɗose də məyawna bə awe kaŋ.

⁹ Kəsəlɗə áŋ teŋ ha'aŋ, áŋ ji suuse a Bar áŋ Barkaŋ haa diiri, ana áŋ hare bə ke guɗbusi bə baymeleŋa diiri a kaa gə minti Pepeŋ jiiniy damdi kusru ana'iŋ toki faɗi pa.

¹⁰ Kel gə tokɗe Pepeŋ daana guɗbusi bə baymele bə minti áŋ kaw cəərə kaŋaŋ ha'aŋ, yə kalte warda haa ku áŋ tó bə mənaŋ da. Kəsaananti, doŋ kir minti kel teŋ a ji bədoona ba.

¹¹ Naanə mo, giidə karta gə mənaŋa ha'aŋ, kan gə dəhəŋ də kan gə bəyhəŋ lewe yaŋ a kəsar gə məna da mo?

¹² Kəsaananti, gum we akuɗiŋ yaŋ nuutu mo? Kumundu ba atələələmaŋ we gum yaŋ mo? Kartaŋ jəŋ ne alumlumaŋ, kan gə dəhəŋ lewe ada pəda.

Ase kə hulum də ase bə minti bəŋ ku Pepeŋ daŋ

¹³ Hulum jəəne bə ɗiki adəwaldəŋa minti tó toŋ asaŋ zuuri bə kel daana tó iski guudi bay gəəliŋ, wə vəɗu guudu la wəra də ɗe du pisiŋ. Haa minti bəŋa wə ji joŋre nuutu sããya bay he cəərə kusru apəya. A ko toŋa ta, kaŋ ase yaŋ wəra minti wə haa hulum bə zuuri kel gəəzi.

¹⁴ Jəəne minti giidiŋ bə hatəŋa kas sərkəŋ daana aŋ bə ɗiki haa cəərə kusrəŋa təwa, a ko toŋa kəya aŋ ŋete kel sar gəəziŋa haa ŋete a kəkəy bə minti aŋ teke cəərə kusrəŋ apəya də zuuri bə kel nəəti toŋ.

¹⁵ Kumsə ase bə zuuri bə kel teŋ kəya bəŋ paapa sar Pepeŋ da ba. Wə bəŋ haa gud ɗiki bə cəərə seŋkaŋa kəna, gud ɗiki kə kaa gə baymeleŋa, daana sar Nərtitiŋ da.

¹⁶ Gud maa mo, a ko bə minti giidə kaŋ bə hətəya cəərə kumsi daana mindi mindi mo ɗiki haa cəərə kusru təwa'iŋ, hãy-hãy daana gidiirə baymeleŋ keɗe'i kele ada faɗi gəm.

¹⁷ Səma ase bə zuuri kel bə minti bəŋ sar Pepeŋ daŋ, wə paapa bədoona ba. Hulum bə minti də ase tóŋ, ajew faɗi, wə hulum *cetceti, wə hulum bə arse ku kel, wə hulum sããyi daana paapa də tete ba. Wə ji giidu pəsaŋ sar kaa ablaw daana wə ji haa kel pəsaŋ saksaki. Wə ceme dər kaa ba, wə waate kel paapa ku kəna təwa bə gəm.

¹⁸ Kaa gə minti keye kaŋ minti adəwaldi jəə la kəkaɓiŋ, yə gə ŋarə-ŋere bə kaa kə kéɗéŋ ana. Karman bə minti yə ju'uŋ ha'aŋ, isi kəkaɓiŋ. Karman bə minti yə cəmu ha'aŋ gəm, ɗe ɗekeriŋ dər Pepeŋaŋ.