ZAKI 2 - JAA TƏMARWAŊ

Kaŋ keɗe tiinə Pepeŋa gəga'i

¹ Kəsaananti, aŋ gə minti gə doo-de gud Yeesu Kristu Barkaŋ náŋ bə minti áŋ bə tukɗuŋ, aŋ paapa gə nakə-neke kir ceme dər kaŋ ba.

² Aŋ gosə gole la kəm: jəəne minti kaa tuukuŋ ne cəərəŋa ɓasi a ko bə tepe cə nəətiŋaŋ; məna hulum bə hurma, toŋ bə ganə-gene də dəməəmə pasa də seke pələk-pələka suru, də kooso bə welɗə-welɗe karmə kəəsu. Naayaw toŋ hulum bə caaca də dəməəmə də caartə-caarte suru.

³ Aŋ raawe bə humi kosoŋa cəərə hulum bə hurma bə ganə-gene pisiŋa daana aŋ wəətu minti: «Tam toŋ bəəda a isi wəra kəna a ko pisiŋa». Səma, kə hulum bə caacaŋ, hulum guudəŋa raawe bə wəətu minti: «Əsə da səram da anə gil», paapaŋa minti: «Bəəda əsə na səran na anə cin adawra na.»

⁴ Jəəne minti kumsə kel teŋ kəya yaŋ kəm bə jəəti adəwaldəŋaŋ, haa kəya aŋ koloŋ kaa kə ceme dər kaŋ bə mo? Haa kəyaŋ aŋ bə ŋaɓte kela də ɗiki bə baymele bə ku tarməyaŋ bə mo?

⁵ Aŋ kəsaanan gə minti giidən bəlaŋ, aŋ əskə la wəra pisi. Kaa gə minti gole dər kaa gə cəərə seŋkaŋa kəna də caaca ha'aŋ, Pepeŋ ŋəmnəy haa minti tó əyəy hurma də minti yə doŋ gud Yeesu Kristuŋ, daana bə əyəy kumna nuutu bə minti wə a wəətunu səmu wəra kaŋkaŋ minti tó əyu a kaa gə minti bele toŋ keɗe'i.

⁶ Səma nəətiŋ ha'aŋ, aŋ haraŋ bə kole kaa kə caacaŋa wəra gə hin pə ɗaw! Bə hamaŋ səɓaki dəŋa haa paapa kaa kə hurmaŋ teŋ bə ɗaw mo? Bə humtuŋ na warna tiinə kaa kə ceme kəətiŋ na haa paapa té bə mo?

⁷ Kaa gə minti sarte sam tó pisi bə minti Pepeŋ aynaŋ dəŋ haa paapa té pə bə mo?

⁸ Nuutu gəəzi ha'aŋ, aŋ ji haa kel pəsaŋ jəəne minti aŋ bə ji damdi *ku gili kə Pep bə deŋe kumsuŋ waataŋ wəra anaŋ. Ku gili toŋ wəra bə jeerə-jeere giidə Kefter kə Pepeŋa minti: «Tam balə kumsum la damdi kusrum ana faɗi».

⁹ Səma, jəəne minti aŋ ceme dər kaŋ, aŋ ji haa kəya baymele, kəya ku giliŋ humuŋ gud minti aŋ paapa bə ɗe guudu ba.

¹⁰ Gud maa mo, hulum jəəne nuutu bə humi kosoŋa cəərə ku gili kə Pepeŋa neŋneŋ keɗe, wə yaakaŋ kumundu ne wəra məna'iŋ, wə humuŋ kosoŋ ba haa cəərə ku giliŋa keɗe faɗi.

¹¹ Gud minti bəŋa, Pep bə minti waataŋ wəra minti: «Tam a ji piwpiw baŋ», waataŋ minti: «A awe titi baŋ» haa tó toki pa. Bədoona ta, jəəne minti tam jəŋ piwpiw ba, səma tam awaŋ titi neŋ, tam jəŋ baymele wəra sar ku giliŋa keɗe.

¹² Gud teŋa ta, kel kə waate nəətiŋ daana joŋre nəətiŋ jəə la haa damdi kə kaa gə minti Pepeŋ bə jəməy kəəti di dəmaŋ ana. Wə jəməy kəəti di haa də *Kel pəsaŋ kəmarwaŋ, ku gili tó bə minti bidi kaŋ wəraŋ.

¹³ Gud minti bəŋa, dər hi bə jeme kəətiŋa ha'aŋ, hulum bə minti ji giidu pəsaŋ sar huluma baŋ, Pepeŋ ji giidu pəsaŋ suru bə gəm. Səma, kə hulum bə minti toŋ jəəti giidu pəsaŋ sar kaŋa ha'aŋ, wə paapa kir ji walka kas jeme bə kəətiŋ pəda.

¹⁴ Kəsaananti, jəəne minti hulum waate də ku waate təwa minti bəŋa: «Ten bə doo-de gud Pepeŋa», səma wə paapa bə nakə-neke bə veɗe de nuutu toŋa wəra a joŋre nuutuŋa baŋ, wə bə kəyu haa a maa toŋa mo? De toŋ kəya neke yaŋ nuutu bə siiru wəra mo?

¹⁵ Aŋ gosə gole la kəm, seenə áŋ kəman mo, nawrə áŋ kəman mo yaŋ, dəməəmə neete də tere paapa gəm, kar gə minti yə həməy gə kerpə-kerpe gəm.

¹⁶ Jəəne minti kumsə kaa teŋ kəya bəŋ sar kumundu guudəŋa məna'i, kəya wə isi bə wəətiya minti: «Aŋ ɗee la kəm nəəti kəkaɓi ta, kusruŋ ɗee la a ciki saraŋa, hameŋ ɗee la a doŋ kuŋ pisi gəm», səma wə əynəy karman bə kəyəy bə ji zugiŋ baŋ, pəsaŋ də kel teŋ haa kəya ane ta'i mo?

¹⁷ Deŋ haa bədoona gəm. Jəəne minti wə paapa bə tapə-tepe də joŋreŋ guudu ada baŋ, wə wəra bə mee-me.

¹⁸ Səma, kumundu ba hulum yaŋ bə waate minti bəŋa: «Tam ha'aŋ, tam bə doo-de gud Pepeŋa, kə naayaw toŋ, nuutuŋ haa joŋreŋ.» Ten waate hulum toŋ yaŋ minti: «Bay joŋreŋ guudu anə cekiŋ, gan dərən la kəm cəərə de nəmti toŋa mo? Ten toŋ ha'aŋ, ten gam gud de nin yaŋ wəra də joŋre bə minti ten bə jəwaŋ.»

¹⁹ Ana tam nuutu bə doo-de haa minti Pepeŋ ha'aŋ, wə ɗaaməna faɗi səm mo? Tam doŋ haa ne minti wə ɗaamənaŋ, toŋ akasi. Kəwal gə doo-de haa bədoona gəm, səma yə bə miiri kas walka du.

²⁰ Hulum bə bay zuuri kel! Deŋ bay joŋreŋ adaŋ, wə haa damdi karman bə gedə-gede ana. Tam bele haa minti ten gam dərəm la kəm ada ge pə mo?

²¹ Aŋ ɗəkə la kəm mo: Pepeŋ aŋkaŋ moomo də áŋ *Abraham hulum ɗekeri haa naanaanə mo? Wə əŋkunu hulum ɗekeri haa a kəkəy bə minti wə bəŋ a ge kurmuyu *Izakiŋ wəra cəərə kəkəw gə keere Pepeŋa bə keere wəra duuruŋ.

²² Tam asaŋ ne, deŋ daana joŋre nuutuŋ ɗeŋ haa gud kumsi məna'i. Gud joŋre nuutu toŋa ta, de nuutuŋ koloŋ wəra bə doo-de ku kaŋkaŋ faɗi.

²³ Bədoona ana ta, kel gə minti gə jeerə-jeere giidə Kefter kə Pepeŋaŋ doŋ kuy wəra minti bəŋa: «Abraham doŋ gud Pepeŋa, gud teŋa ta Pepeŋ ənkunu hulum ɗekeri.» Kəya Pepeŋ məntunu minti wə daarə tó.

²⁴ Bədoona ta, aŋ asaŋ ne, Pepeŋ kole hulum ɗekeri duru haa paapa gud de nuutuŋa bay cuuru təwa ba, səma gud joŋre bə minti wə bə jəwaŋ gəm.

²⁵ Aŋ ɗəkə la cəərə Rahabi, maswaŋ də dayday. Pepeŋ kolna wəra həlgə ɗekera duru haa gud joŋre naataŋa. Bə minti kaa gə minti kaanə Ziwifiŋ a vəənəy daŋ tuluŋ gerdaŋ, a kəynəy bə ŋeŋle na warna a kəkəy baalaŋ na. Pepeŋ aŋkəna ɓeti haa gud bə minti a jəŋ bədoonaŋ.

²⁶ Aŋ asə la wəra minti kusuki də hulum bay maahe giidu wəra haa titi. Bədoona ana, deŋ bay joŋreŋ guudu wə wəra bə mee-me gəm.