ZAKI 1 - JAA TƏMARWAŊ

Mirkiŋ

¹ Jeere kefter toŋ haa ten Zaki, hulum bə joŋre kə Pepeŋ daana kə Barkaŋ Yeesu Kristuŋ. Ten jeere kefter toŋ a kaasaw də kaanə Ziwifi hor ciiri ɓasiŋ gə minti wəra gə meerə-meere giidə koŋaŋ. Ten bə mirkiŋa.

Aŋ əsə la wəra gə naa-ne dər gəəliŋa

² Kəsaananti, bə minti gidiirə gəəliŋ tuukuŋ ne cəərəŋa ablaw, aŋ jəə la wəra də waale giidiŋa feh-fehi.

³ Gud minti bəŋa, aŋ wəra gə asə-ase minti dər gəəli toŋa kəyaŋ, jəəne minti de nəəti bə gud Pepeŋ daɓyaŋ baŋ, aŋ ze guuduŋ də səɓaki haa ze faɗi.

⁴ Səma, səɓaki dəŋ a humi ku gəəliŋa ba kir minti aŋ jəə la wəra gə naa-ne kaŋkaŋ, sarte a ji saraŋa a ko anə weseka ba, daana ɗiki pisiŋ a yaake wəra saraŋa bə gəm.

⁵ Jəəne minti hulum kəman yaŋ adəwaldəŋa minti hel də zuuri kel kirpunuŋ, wə mantəta la kasi Pep bə minti aya wəra anə hóy a kaŋ keɗe bay gəbaŋ adaŋ.

⁶ Səma hulum tó bə minti manta ha'aŋ, wə a ce awəy ku tərmuyu ba, wə ɗəkə la haa minti tó falna ne wəra. Gud maa mo, hulum bə minti ce awəy ku tərmuyu ha'aŋ, wə haa damdi kan gə minti kaŋkaw bə ləytəya tiini kəna gəm, kəna gəm ana.

⁷ Kumsə hulum toŋ kəyaŋ, wə a ɗiki minti tó bə fele karman yaŋ kasi Barkaŋ Pepeŋa ba,

⁸ gud maa mo, a kel nuutuŋa keɗeŋ, ɗiki du paapa wəra soki məna ba, daana wə paapa wəra bə əsə-isi dəɓal-dəɓal bə gəm.

⁹ Bədoona ana, hulum bə caaca bə minti bə doo-de gud Kristuŋ, wə jəə la də waale gud bə minti Pepeŋ həənu cuuru wəra apəya.

¹⁰ Kə hulum bə hurma bə minti bə doo-de gud Kristuŋ ha'aŋ, wə jəə la də waale gud bə minti Pepeŋ hərnu cuuru adoroŋ, gud maa mo wə isi haa anə sawəwa damdi huufi də kaɗəkaw ana gəm.

¹¹ Aŋ golə la kəm, cəwaŋ daage warda haa də ɗeme naataŋ anə paŋ faɗi, kəya a saawe kaɗəkaw wəra, huufi diŋ suuri wəra, kəya pisi neeteŋ tewe wəra faɗi gəm. Bədoona ana gəm, hulum bə hurmaŋ ɗe a fele meŋ wəra dəmaŋ ha'aŋ, wə kəm ku joŋre bə golde hurma nuutuŋa.

¹² Waaleŋ kə hulum bə minti bə əsə-isi ŋəŋ dər gəəliŋaŋ. Gud maa mo, gəəli bə gulu kuɗuŋ təwaŋ ne wəraŋ, wə fele dədərgə də bay teweŋ yaŋ. Haa werke bə gud bulum bə minti Pepeŋ a wəətunu səmu wəra kaŋkaŋ a kaa gə minti bə bəluŋ.

¹³ Jəəne minti karman kəman kaŋ ku hulum ne bə ji baymeleŋ, wə a waate minti: «Kaanan kun haa Pepeŋ» ba. Gud minti bəŋa, karman neke bə ke ku Pepeŋ bə ji baymeleŋa ba, Pepeŋ də kusru, wə ke ku hulum bə ji baymele bə gəm.

¹⁴ A gəəzi diŋa ha'aŋ, karman bə minti ke ku hulum bə ji kel kə baymeleŋa haa ɗiki bə baymele bə ku tərmuyuŋ. Ɗiki toŋ təɗu bə ɗe a gaw a vew kə baymeleŋa haa tó.

¹⁵ Ɗiki bə baymeleŋ haŋ məənə ne giidə hulumaŋ, wə ɗe a we wəra haa baymeleŋ gəm. Bə minti baymeleŋ suŋ ne wəra giiduŋ, wə ɗe a awe cuuru wəra haa meŋ.

¹⁶ Aŋ kəsaanan gə minti giidən bəlaŋ, aŋ a yaake hulum bə ləŋaŋa ba:

¹⁷ kar pəsaŋ keɗe gə minti kuy wəra gə doo-deŋ bəŋ apəy da, kasi Pep bə minti jəŋ anə seskaŋ, də kitir, daana cəwaŋ. Wə kole ba hasi, wə he giidu wəra sar áŋa minti wə yaake áŋ dər tilməŋa damdi anə cəwaŋ jəəti áŋ ha'aŋ ana bə gəm.

¹⁸ Gud giidu, wə jəŋ áŋ minti áŋ falə dədərgə la haa də kel gə gəəzi nuutuŋ. Wə jəŋ teŋ bədoona ana haa minti, kar gə minti tó jiiniy keɗe'i, áŋ kolə la kaa kə ajew aduubə də kar teŋa haa áŋ faɗi.

Áŋ əskə kel la, áŋ humi kosoŋ la ciiri

¹⁹ Aŋ kəsaanan gə minti giidən bəlaŋ, cəərəŋ jəə la a kel teŋa kəya ɗəki minti: mindi mindi mo jəə la saksaki cəlam a jeɓre bə kela, səma wə a bandə-bande bə waate kela ba, bə kole waŋa bə gəm.

²⁰ Gud maa mo, hulum bə kolə-kole waŋ neke bə ji kel ɗekeriŋ dər Pepeŋa ba.

²¹ Gud teŋa ta, kel gə minti zeɓeŋ daana ɗiki bə baymele bə ablaw bə saraŋ tukcuriŋ keɗe, aŋ pəy la wəra ku tarməyaŋa. Ana ɗaw ha'aŋ, kel gə minti Pepeŋ ayaŋ dəŋ giidiŋaŋ, aŋ doy la bay teke cəərə kusrəŋ apəya, gud minti bəŋa, kel teŋ gə nakə-neke bə seereŋ wəra.

²² Aŋ a leŋe kusruŋ bə jeɓre kel kə Pepeŋa jeɓre təwa minti yə naknaŋ ne ba, aŋ jəə joŋre la diiri.

²³ Bədoona ana, hulum bə minti jeɓre Kel kə Pepeŋ jeɓre təwa'i, səma wə paapa bə ji joŋre diiri baŋ, wə bə ŋarə-ŋere də hulum bə minti he kotrom bə gole duru, wə ase kusru wəra ada bədoona dege'-dege'i gil faɗi.

²⁴ Bə minti wə goloŋ duru ne wəra golla də kotrom tə bə moŋ, wə koore. Kəya wə hare bə ase kusru minti tó a jəŋ kəna naanaanə moŋ, pəda.

²⁵ Kə hulum bə felke gud *Kel pəsaŋ kəmarwaŋ, wə paapa bə jiɓriya jeɓre təwa minti cuuru gay wəra baŋ, səma wə ji joŋre diiriŋ, hulum toŋ kəyaŋ, Pepeŋ gaw pisi yaŋ cəərə kar nuutu gə minti wə jəy keɗe'i. Gud maa mo, Kel pəsaŋ kəmarwaŋ teŋ, yə haa *ku giliŋ kə Pepeŋ bə minti wəra bə doo-de kuy, yə bidi kaa wəra ku baymeleŋa.

²⁶ Jəəne minti hulum kəman yaŋ bə ɗiki minti tó bə ɗe gud Pepeŋaŋ, anaaŋa kusulɗu paapa bə ame kəəsu baŋ, wə leŋe kusru, ɗe nuutu bə gud Pepeŋ wəra karman bə boobo.

²⁷ Karman bə minti Pep Abaŋ aŋke toŋ minti haa ɗe bə gud tó *cetcetiŋ daana kaŋkaŋiŋ, haa bə minti hulum bə ase caadə kaa kə kukuyu daana kəram gə bay dər gəəli neeteŋa, daana wə bə amə kusru pisi bay taɓke də kel kə bayməlaŋ gə cəərə seŋkaŋ.