VEƊE 9 - JAA TƏMARWAŊ

Dordə atoltom də wiiɗiw

¹ Hulum bə digi kə Pepeŋ bə wiiɗiw ufuŋ atoltom nuutuŋ kəyaŋ, ten asaŋ seska kəman bə awe warda adawra da. Yə ayna lakəle bə ku tələŋkə kələmləma də bay nobeŋ kaasa.

² A bəŋəŋ ku tələŋkə taŋ wəra kəyaŋ, keseŋ vaŋ warda də ada anə gursul damdi kese bə cəwa də do'e-do'eŋ ana. Cəwa də apəyaŋ gaŋ giziɓi wəra daana koŋ paapa bə ase pəda kas keseŋ.

³ Dər kese toŋa ha'aŋ, kəsaabo vaŋ warda də ada, yə duusuŋ warna cəərə seŋkaŋ na. Yə əynəy abay də witi kaŋ damdi kə turti də cəərə seŋkaŋa ana.

⁴ Kəya yə həənəy kuy wəra minti yə a ji kaɗəkaw bayməlaŋ ba, yə a ji kəbaŋ baymele bə gəm. Səma kaa gə minti tampoŋ kə Pepeŋ bay malte tiiniŋ, yə jəə teŋ la bayməlaŋ təwa.

⁵ Yə əynəy kəkəy bə awe kaŋ wəra awe ba, səma yə ləsəy la ablaw kir kitir wiiɗiw. Karman bə minti yə jəw sar kaŋaŋ, wə ɗeme haa damdi ɗeme bə minti turtiŋ wəŋ hulum neŋ ana.

⁶ Dər hi toŋa ha'aŋ, kaŋ golde meŋ, səma yə bə fəlu pəda. Yə bele yaŋ minti té mee la wəra, səma meŋ he guudu yaŋ wəra siri tooto.

⁷ Kəsaabo teŋ, kusri wəra gə ɗampə-ɗampe damdi gədaamo bə ɗe a duuriŋ ana. Tiini damdi hulum kisirki ana, karman damdi kaŋkəlaŋ gə ɗampə-ɗampe də kooso bə gusi awəy-awəy ana yaŋ ciiri gəm.

⁸ Kaaɗe gə ciiriŋ kempeleŋ damdi kaaɗe gə cəərə həlgə ana, kisni damdi kə googoŋ ana.

⁹ Didiki di wəra də kalə-kele karman cəərə damdi koroŋ bə jəə-ji də kooso ana. Gəraŋ di hage kirkik-kirkik damdi anə gədaamo taɗte puspusiŋ də tara bə ɗe a duuriŋ ana.

¹⁰ Digni də kew damdi dəgnə turtiŋ ana. Abay də minti yə lese kaŋ dəərəŋ kir kitir wiiɗiw, haa digni.

¹¹ Hulum bə digi kə Pepeŋ bə tələŋkəŋ kələmləma də bay nobeŋ bə əsə-isi ciiri kumnaŋ haa tó. Yə məntu də ku Hebereŋ minti «Abadon», yə məntu də ku Gerekiŋ minti «Apolyon», gud sam toŋ minti «hulum bə ɓalke koŋ».

¹² Gəəli bə ajew raawaŋ wəra, ador du kəyaŋ, gəəli baalaŋ bə tuuki yaŋ ɓasi pa.

Dordə atoltom də kənkiŋ

¹³ *Hulum bə digi kə Pepeŋ bə kənki ufuŋ atoltom nuutuŋ. Kəya ten əskəŋ dordə karman bə hage da agev də *ko bə jəəti keere bə minti bə ɗampə-ɗampe də kooso bə gusi awəy-awəy da, bə minti tiinə Pepeŋa.

¹⁴ Dordə karman toŋ waataŋ hulum bə digi bə kənki bə minti atoltom kəəsuŋ minti: «Kaa kə digi kə Pepeŋ gə əntə-ənti waaɗe'iŋ gə sar paaŋe boblo bə Efratiŋ, fuktuy la wəra.»

¹⁵ Kəya yə fuktunuy wəra faɗi gəm. Yə wəra gə ɗampə-ɗampe də anə hãã cəərə cəwa taŋa, hi toŋa, kitir toŋa, daana le toŋa, minti yə kir ɗe a awe kaa gə cəərə agal də soope'a də seŋkaŋ wəra keɗe.

¹⁶ Ten əskəŋ ha'aŋ, yə bə waate sam kəsooto neeteŋa də gədaamoŋ yə 200.000.000.

¹⁷ Bədoona ta, kar gə minti vəɗaŋ dərənaŋ, ten asaŋ anə gədaamoŋ də kaa gə cuuruŋ. Sirdiŋ də koroŋ kəəli siri, gaalaŋ də koroŋ kisirki damdi alakləway ana siri, kaayaŋ də koroŋ abufi siri. Cəərə gədaamoŋ damdi cəərə googoŋ ana. Cəwa kalte warda kuy da, də keseŋ, də karman bə minti yə məntu «sufrə».

¹⁸ Agal soope'a də kaa kəsarkaŋ bəsaŋ wəra kasi lese tó soope'iŋ, lese toŋ haa anə cəwaŋ, keseŋ daana sufrə.

¹⁹ Gud minti abay kə anə gədaamoŋ haa kuya daana digni. Digni damdi kancaw ana, ciiri ada bə ji lasiŋ a kaŋ.

²⁰ Kaa gə minti a yaakaŋ bay aweŋ kasi lasi taŋ, yə koloŋ kirki a kar gə minti yə a bə jəətiya ba. Yə yaakaŋ keerte bə kəwal daana bə kar gə minti yə guluy Pep neeteŋ ba. Yə ɗampaŋ kar té haa də kooso bə gusi awəy-awəy, də kooso pis-pisiŋ akas soloya ana, də kooso maaway, də pərkiŋ, kumundu ba də kəbaŋ. Haa kar gə minti neke bə ase ba, bə iski ba, bə ɗe bə gəm.

²¹ Yə koloŋ kirki a awe bə titiŋ, jəəti bə zal, jəəti bə booboŋ daana dəgaaya neeteŋ bə gəm.