VEƊE 8 - JAA TƏMARWAŊ

Kormə Taaməkaŋ poke kaknay gə seeɗa wəra

¹ Bə minti Kormə Taaməkaŋ pokoŋ kaknay gə seeɗaŋ wəra anəkay, ko bə apəyaŋ də kar gə minti adaŋ keɗe doŋ wəra anə ɗeket-keti nusi də ler hal.

² Kəya ten asaŋ *kaa kə digi kə Pepeŋ seeɗa'i gə əsə-isi tiinuŋ. Yə əynəy atoltom kəəsi keɗe.

³ Hulum bə digi baalaŋ kəman bəŋ a isi sar *ko bə jəəti keereŋa a Pepeŋ. Wə haŋ kooso bə gusi bə awəy-awəy bə minti yə kuuti urdeŋ giiduŋ kəəsu kay. Kəya yə əynu urdeŋ anə pər minti wə jəə keere la a Pepeŋ duuru, wə tapə toose kə kaa kə Pepeŋ la də keereŋ gəm. Wə jəŋ keereŋ haa cəərə ko bə ji keereŋa a Pepeŋ, bə minti yə a ɗəmpunu də kooso bə gusi awəy-awəy daana bə minti tiinə jaaŋa kə Pepeŋaŋ.

⁴ Kese bə urde bə kasi hulum bə digiŋ faŋ apəya diwilla tiinə Pepeŋ na, də toose kə kaa kə Pepeŋ keɗe.

⁵ Kəya hulum bə digiŋ haŋ kooso bə minti yə ki urdeŋ giiduŋ, wə ɗusnu wəra də kuɓursi bə ko bə jəəti keereŋ, wə gəənu cəərə seŋka da. Kəya naakte bə təbay bə koŋ, dordə kar, welɗe bə koŋ daana miiri bə seŋkaŋ ŋgiɗ-ŋgiɗiŋ jəŋ faɗi gəm.

Dordə atoltom waaɗe'aŋ

⁶ *Kaa kə digi kə Pepeŋ seeɗa'i gə minti atoltom wəra kəəsi seeɗa keɗe'iŋ, ɗampaŋ kusri wəra bə ufəŋ.

⁷ Hulum bə digi bə ajew ufuŋ atoltom nuutuŋ, kəya asərpəyaŋ daana cəwaŋ də tapə-tepe dərə də kor əsəŋ bə rayte də səɓaki cəərə seŋkaŋa faɗi. Cəwaŋ kuŋ agal də seŋka də soopeŋ wəra, a kuŋ kəbaŋ daana kaɗəkaw gə giidə seŋka taŋ wəra keɗe gəm.

⁸ Hulum bə digi kə Pepeŋ bə ɓasiŋ ufuŋ atoltom nuutuŋ, kəya karman kəman damdi pərki boblo ana bə do'ə-do'e, awaŋ dər kan kəmtəŋa. Agal də soope də kan kəmtəŋ koloŋ wəra kor.

⁹ Kar gə minti a jəŋ dədərgə zugi dər kan teŋaŋ meŋ wəra, kətartaw kəmtəŋ gə minti cəərə kan teŋa ɓalkətaŋ wəra keɗe gəm.

¹⁰ Hulum bə digi kə Pepeŋ bə soopeŋ ufuŋ atoltom nuutuŋ, kəya seska mooto kəman bə halɗe kəsəlɗə damdi cəwaŋ ana, awaŋ warda adawra da. A awaŋ cəərə agal də soope də anə vora daana ko bə minti kan ãyte warda də adaŋ.

¹¹ Seska taŋ yə manta minti «Gəlag-gəlagi». Agal də soope də kan koloŋ wəra gəlag-gəlagi. Kaŋ ablaw gə minti səənəy meŋ wəra kas gəlag-gəlagi diŋ.

¹² Hulum bə digi kə Pepeŋ bə waaɗeŋ ufuŋ atoltom nuutuŋ, kəya agal də soope də cəwa də wele koŋ, kitir daana seskaŋ gəyaŋ wəra faɗi, yə paapa bə welɗe pəda də aŋar də ko kəman ta'i. Ko bə daaway, agal du də soopeŋ, welɗe də cəwa də apəyaŋ jəŋ duru ba. Ko bə duugŋ, agal du də soopeŋ, kitir daana seskaŋ, welɗe diŋ jəŋ cuuru bə gəm.

¹³ Ɗe a goleŋa, ten əskəŋ marla kəman bə ɓəkti na apəy na bə sewle wəra anə koloŋ-koloŋ minti: «Gəəliŋ! Gəəliŋ! Gəəliŋ cəərə kaa gə cəərə seŋkaŋa kas naakte bə ku bə atoltom də minti kaa kə digi kə Pepeŋ soope'iŋ bə ɗe a ufəŋ!»