VEƊE 7 - JAA TƏMARWAŊ

Kaa kə joŋre kə Pepeŋ 144.000

¹ Adoro kəyaŋ, ten asaŋ *kaa kə digi kə Pepeŋ waaɗe gə əstə-əsti agev də seŋkaŋa wəra waaɗe keɗe. Kaŋkaw gə minti pəəti agev də daŋ, yə duuniy wəra kay kir minti kumundu anə məna guudi a he cəərə seŋkaŋa ba, cəərə kana daana cəərə kəbaŋa bə gəm.

² Kəya ten asaŋ hulum bə digi baalaŋ bə li da agal də gud koŋ da anəkay, tampoŋ də minti sam Pep bə dədərgə cawiŋ bə jeerə-jeere cəərəŋ, kəəsu kay. Wə əsəŋ bə waate kela anə kaŋkaŋ a kaa kə digi gə minti yə əynəy səɓaki də ɓalke seŋkaŋ daana kan kəəsiŋ, minti:

³ «Aŋ a ɓalke seŋkaŋ, kan, də kəbaŋ wəra ba hãã bə minti are maltaŋ tampoŋ də ne tiinə kaa kə joŋre kə Pep náŋaŋ.»

⁴ Kaa gə minti yə məltənəy tampoŋ tiiniŋ, yə waatənan minti yə 144.000. Yə wəra a tanta kə karmə kə *Israyela wəra keɗe.

⁵ A tanta kə Zudeŋaŋ, kaa 12.000, kə Rubenaŋ 12.000, kə Gadiŋaŋ 12.000,

⁶ kə Aseraŋ 12.000, kə Neftaliŋaŋ 12.000, kə Manaseŋaŋ 12.000,

⁷ kə Simeyonaŋ 12.000, kə Leviŋaŋ 12.000, kə Izakaraŋ 12.000,

⁸ kə Zabuloŋaŋ 12.000, kə Zosefiŋaŋ 12.000, kə Beŋjameŋaŋ 12.000.

Kaa gə ablaw hə̃ə̃'i gə tiinə Pepeŋ

⁹ Adordə kel teŋaŋ, ɗeŋ a gole kəyaŋ, ten asaŋ kaa ablaw anə hə̃ə̃'a, paapa kir aŋke ba. Kaa teŋ pəətəŋ warda a seŋka da keɗe, a kaasaw də kaŋ da keɗe, a gidiirə kaŋ da keɗe, a ku kaŋ da keɗe gəm. Yə əsəŋ tiinə jaaŋa kə Pepeŋa daana tiinə Kormə Taaməkaŋa gəm. Yə də dəməəmə bərwa siri, gaavaw kəəsi ada kay.

¹⁰ Yə əsəŋ bə waate wəra koloŋ-koloŋ minti: «Pep náŋ bə minti əsəŋ cəərə jaaŋaŋa daana Kormə Taaməkaŋ, seereŋ bi haa kəəsi da.»

¹¹ *Kaa kə digi kə Pepeŋ keɗe gə ɓəkə-ɓiki cəərə jaaŋaŋ, cəərə kaa kəmtəŋ gə tiinə kaŋ, daana kar kaayaŋ gə dədərgə waaɗe'iŋ keɗe wəra cẽẽ. Kəya yə maltaŋ tiini adawra bə ke awalna a Pepeŋa. Yə minti:

¹² «*Amen! Hage bə sam, tokɗeŋ, aseŋ, ji bə suuseŋ, aŋkeŋ, abay daana səɓakiŋ jəə la nəmti bə faɗnə-faɗna, Pep naareŋ! Amen.»

¹³ Kəya hulum kəman aduubə də kaa kəmtəŋ gə tiinə kaŋa əsəŋ bə waatəna minti: «Kaa teŋ də jamba bərwaŋ siri ha'aŋ, yə haa kaa məntəŋ mo? Yə bəŋ haa də ane da mo?»

¹⁴ Ten minti: «Bərdənti, yə haa də dərəm.» Wə waatənan minti: «Yə bəŋ haa ku lasi mooto hasaŋ da. Yə baadaŋ jamba neeteŋ wəra, yə kolna wəra bərwa də kor də Kormə Taaməkaŋ.

¹⁵ Haa gud teŋa minti yə gə əsə-isi tiinə jaaŋa də Kumna kə Pepeŋa bə kaw awalnaŋa daaway də duugŋ keɗe giidə *Kuli nuutuŋa. Hulum bə cəərə jaaŋaŋ isi kaa teŋ yaŋ gud gəsaatərna du.

¹⁶ Tay daana kinkin ɗəməy hõy pəda. Cəwa də apəya də saawte pələk-pələkaŋ səwtəy hõy pəda gəm.

¹⁷ Gud maa mo, Kormə Taaməka bə minti bə əsə-isi aduubə də jaaŋaŋa bə guluy ciiri yaŋ damdi hulum bə ameŋ ana. Wə ɗe yaŋ a məltəy ku vor bə minti kan pəsaŋ bə ãye adaŋ. Kəya Pepeŋ sətəy kan kə diri yaŋ wəra neŋneŋ keɗe.»