VEƊE 6 - JAA TƏMARWAŊ

Kormə Taaməkaŋ pokte kaknay wəra

¹ Kaknay seeɗa'iŋ, ten asaŋ Kormə Taaməkaŋ bə poke gə ajewa wəra. Ten əskəŋ kumundu məna gud kar gə dədərgə waaɗe'iŋaŋ bə naakte ku damdi koŋ dabte ana bə waate minti: «Bəəda!»

² Ten goloŋ, kəya ten asaŋ gədaamo gibirwi. Hulum bə luu-li cuuruŋ də ɓooro kəəsu. Yə əynu kaŋkəlaŋ gə abay-abay. Wə wəra bə pəə-pi bulum, wə kooroŋ cəərə seŋkaŋ bə ɗe a pi bulum pa.

³ Kormə Taaməkaŋ pokoŋ kaknay gə ɓasiŋ wəra kəyaŋ, ten əskəŋ karman bə dədərgə bə ɓasiŋ bə waate wəra koloŋ minti: «Bəəda!»

⁴ Kəya gədaamo baalaŋ kəlaŋ warda, wə kəəli. Yə ayaŋ a hulum bə luu-li cuuruŋ səɓaki də ɓalke kəkaɓi də cəərə seŋkaŋ wəra minti kaŋ awtə kumsi la. Kəya yə əynu caafay tempəla ada gəm.

⁵ Kormə Taaməkaŋ pokoŋ kaknay gə soopeŋ wəra kəyaŋ, ten əskəŋ karman bə dədərgə bə soopeŋ bə waate wəra koloŋ minti: «Bəəda!» Ten goloŋ, kəya ten asaŋ gədaamo kisirki. Hulum bə luu-li cuuruŋ də kooso bə gole eele də kar kəəsu kay.

⁶ Kəya ten əskəŋ dordə karman bə hage gud kar gə dədərgə waaɗe'iŋa bə waate minti: «Tay bə de kaŋ! Agoda bə kuntiŋ məna, wə kir werke bə je bə joŋre kə hulum hal a hiŋa, agoda soope bə kaasaw gə minti begeŋ həməy, wə kir werke bə je bə joŋre kə hulum hal a hiŋa gəm. Səma son daana kumuy bə atələələmaŋ ha'aŋ, a ze gusi diŋ ba anə hasi.»

⁷ Kormə Taaməkaŋ pokoŋ kaknay gə waaɗeŋ wəra kəyaŋ, ten əskəŋ karman bə dədərgə bə waaɗeŋ bə waate minti: «Bəəda!»

⁸ Ten goloŋ, kəya ten asaŋ gədaamo, wə anə afiyaka. Yə mante hulum bə luu-li cuuruŋ minti «Meŋ». Hulum bə minti yə məntu «Ko bə kaa kə mee-meŋ» təpaŋ guudu da. Seŋkaŋ də agal də waaɗe'aŋ, yə əynəy abay cəərə agala məna də kaa gə giidəŋ minti yə əwəy la wəra də caafay, də tay, də ɗemeŋ, də bege bə waŋ-waŋ.

⁹ Kormə Taaməkaŋ pokoŋ kaknay gə wiiɗiw wəra kəyaŋ, ten asaŋ tiirə kaa gə minti yə a cəmnəy wəra gud kel kə Pepeŋaŋ, daana gud kel gə minti yə a jəŋ bar kəkəy wəra ciiriŋ. Yə gə əsə-isi laki kampar *ko bə jəəti keereŋa a Pepeŋ.

¹⁰ Kəya yə bə naakte kuya minti: «Kumnaŋ, Hulum Cetcetiŋ, Hulum bə Gəəzə-gəəziŋ, tam mi kəm hãã koŋ kotnə mo minti tam jeme kəəti də kaa gə cəərə seŋkaŋ daana tam ge acukur də are gə mee-meŋ?»

¹¹ Kəya yə ayaŋ jamba bərwa a mindi mindi aduubə də kaa teŋa. Pepeŋ wəətənəy minti yə məə la kəm sawəwa hãã bə minti kəsəəni kaayaŋ gə joŋreŋ gə minti yə bə əwəy wəra damdi té ana gəm doo kuy la wəra kəm.

¹² Kormə Taaməkaŋ pokoŋ kaknay gə kənki wəra kəyaŋ, ten asaŋ seŋkaŋ bə miiri də səɓaki ŋgiɗ-ŋgiɗi, cəwaŋ koloŋ wəra sarka nilik-niliki, kitir koloŋ wəra kəəli keɗe bə kor ana.

¹³ Seskaŋ suuruŋ warda adawra da damdi we bə nimnim bə bay neŋ suuri warda adawra da a ko bə minti kaŋkaw gə səɓakiŋ jəŋ ne anaŋ.

¹⁴ Tarmə koŋ haŋ guudə warna damdi yə hayɗe gisi daagoŋ wəraŋ ana, pərkiŋ daana ajomgaŋ neŋneŋ keɗe yaaktaŋ kuɗiy wəra, yə zeedeŋ guudi gəm.

¹⁵ Kəkamna kə cəərə seŋkaŋ, kaa kə abay-abay, kəkamna kə kəsootoŋ, kaa kə hurmaŋ, kaa kə səɓakiŋ, kafkam keɗe, də kaa kaayaŋ gə minti teŋ paapa kafkam baŋ keɗe, ɗeŋ a ŋoyte giidə hulukiŋa daana aduubə də anə pərkiŋa.

¹⁶ Yə əsəŋ bə waate pərkiŋa də kormə pərkiŋ minti: «Aŋ awtə la wəra cəərə are, aŋ ŋoytə are la wəra ku gole kə hulum bə cəərə jaaŋaŋa, aŋ ŋoyte are la wəra tooto-tooto kas waŋ kə Kormə Taaməkaŋ!

¹⁷ Gud maa mo, hi boblo bə waŋ neeteŋ nəkaŋ ta, minti toŋ bə isi tiini pə mo?»