VEƊE 5 - JAA TƏMARWAŊ

Kefter daana Kormə Taaməka

¹ Kəya, ten asaŋ kefter bə hayɗə-hayɗe anə niɓi giidə kasi hulum kemer bə əsə-isi cəərə jaaŋaŋaŋ. Kefter toŋ bə jeerə-jeere kirku daana giidu gəm, ku wəra bə larpə-larpe də kaknay ta'-ta'i seeɗa.

² Kəya, ten asaŋ *hulum bə digi bə səɓaki kə Pepeŋ bə sewle də səɓaki minti: «Mindi toŋ bə nakə-neke kir poke kaknay wəra ku keftera daana bə buŋu ku wəra mo?»

³ Hulum paapa anə məna bə nakə-neke bə buŋu bə gulu giidu ba; paapa apəy da ba, paapa adawra kəna ba, gud koŋa adawra bə gəm.

⁴ Kəya ten əsəŋ bə hage wəra hasi faɗi, gud minti yə fəlaŋ hulum anə məna bə nakə-neke kir biŋi ku kefter daana bə gulu giidu baŋ.

⁵ Kəyaŋ, hulum aduubə də kaa kəmtəŋ gə tiinə kaŋa əsəŋ bə waatana minti: «A hage ba! Golə la, hulum bə minti yə məntu Googoŋ bə minti a gidiirə Zudaŋ, a kaasaw də *Davidiŋ, wə pəŋ bulum ne wəra, wə bə nakə-neke bə pokte kaknay seeɗa'iŋ wəra daana bə biŋi ku kefter wəra gəm.»

⁶ Ɗe a goleŋa, Kormə Taaməka bə əsə-isi gil aduubə də jaaŋa də aduubəŋa, kar gə dədərgəŋ, daana kaa kəmtəŋ gə tiinə kaŋ wəra gə ɓəkə-ɓiki cuuru cẽẽ. Kormə Taaməka toŋ gole damdi yə a jəmnu wəra bə keere ana. Gəw du seeɗa, duru seeɗa gəm, haa Tiiru Seeɗa'a kə Pepeŋ də minti wə a gaana cəərə seŋkaŋ na a koŋa keɗe'iŋ.

⁷ Kormə Taaməkaŋ bəŋ a de kefter bə minti a jəŋ a kasi hulum kemer bə minti a jəŋ bə əsə-isi cəərə jaaŋaŋaŋ.

⁸ Bə minti wə doŋ kefter doo kəyaŋ, kar gə dədərgə waaɗe'iŋ daana kaa kəmtəŋ hor-hor ɓasi ciiri waaɗe'i gə tiinə kaŋ əsəŋ bə ve də gigiiri tiinə Kormə Taaməkaŋa. Mindi mindi aduubə di də gundi kəəsu, daana də taasa bə ɗampə-ɗampe də kooso bə gusi awəy-awəy bə ɗosə-ɗose də urde. Urde toŋ haa toose kə kaa kə Pepeŋ.

⁹ Yə bə ge gudul kimirwi bə tokɗe Kormə Taaməkaŋa minti: «Tam bə nakə-neke bə he kefter, daana bə poke kaknay gə kuŋ wəra. Gud maa mo yə awnam wəra bə ji keereŋ, tam məɗəŋ cəərə kaŋ a Pepeŋ də kor dəm gə aduubə də kaasaw də kaŋ keɗe, ku kaŋ keɗe, gidiirə kaŋ keɗe, gə giidə seŋkaŋ keɗe gəm.

¹⁰ Tam kulnuy wəra *kaa kə keere kə Pep náŋ minti yə jəə la kaa nuutu a ko bə kumna nuutuŋa, daana yə əsə la kəkamna cəərə seŋkaŋa.»

¹¹ Ɗe a goleŋa, ten əskəŋ dordə *kaa kə digi kə Pepeŋ ablaw anə guɓ-guɓi paapa kir aŋke ba. Yə wəra gə ɓəkə-ɓiki anə cẽẽ cəərə jaaŋaŋa, kar gə dədərgəŋ, daana kaa kəmtəŋ gə tiinə kaŋa.

¹² Yə əsəŋ bə waate wəra koloŋ minti: «Kormə Taaməka bə minti yə a jəmnu wəraŋ, bə nakə-neke kir fele abay, hurmaŋ, səɓakiŋ, aŋkeŋ daana hage bə sam!»

¹³ Kəya kar gə jəə-ji gə apəyaŋ, gə cəərə seŋkaŋ, gə gud koŋ adawra, gə dər kan, daana kar gə minti wəra zugi a koŋa keɗeŋ, ten iskiniy kuy bə waate minti: «Hage bə sam, aŋkeŋ, tokɗeŋ daana gərɓəɓiŋ, jəə la bə faɗnə-faɗna kə Hulum bə minti bə əsə-isi cəərə jaaŋaŋaŋ daana kə Kormə Taaməkaŋ!»

¹⁴ Kar gə dədərgə waaɗe'iŋ haraŋ kel minti: «*Amen!» Kaa kəmtəŋ gə tiinə kaŋ vaŋ də gigiiri tiinə Pepeŋa daana tiinə Kormə Taaməkaŋ bə kay awalnaŋ.