VEƊE 4 - JAA TƏMARWAŊ

Zaŋ asaŋ Pepeŋ je'i cəərə jaaŋa nuutuŋa

¹ Adordə kel teŋa, ɗeŋ a gole kəyaŋ, ku kuliŋ wəra bə bəŋə-biŋi tarmə pepeŋa. Dordə hulum bə minti ten a əskənə ajew bə hage damdi atoltom anaŋ, waatənan minti: «Luu da kanda, ten kam dərəm cəərə kar gə minti bə tuli adoroŋ.»

² A ko toŋa kəya faɗi, Tiiru Cetcetaŋ vaŋ cəərəna, kəya ten asaŋ jaaŋa də kumna ta'i apəy na, hulum bə əsə-isi cəərə cin.

³ Hulum toŋ welɗe anə pelek-peleki damdi pərki bə ji ataara də minti yə manta minti «jaspəŋ» daana «sardəwan» ana. Agəjaŋ də jaaŋaŋa ha'aŋ, akaarə pepeŋ də gaa-ge ada bə welɗe anə jələw-jələw damdi pərki bə minti yə məntu «emerodiŋ» ana.

⁴ Agəjaŋ də jaaŋa taŋa ɓəəka ha'aŋ, jaaŋa də kumna daalaŋ wəra də maltə-malte ada ta'-ta'i hor-hor ɓasi cəərə waaɗe, kaa kəmtəŋ gə tiinə kaŋ gə əstə-əsti ada hor-hor ɓasi ciiri waaɗe gəm. Dəməəmə bərwa də tarə-tere siri, kaŋkəlaŋ gə ciiriŋ gə ɗampə-ɗampe də kooso bə gusi bə awəy-awəy.

⁵ Sar jaaŋa də aduubaŋ daŋ, anə welɗe bə koŋ, dordə kar kəman daana təbay də ko bə debeŋ bə kalte də warda da ada. Lampa də do'tə-do'te tiinə jaaŋa taŋa ada seeɗa, lampa taŋ haa Tiiru Seeɗa'a kə Pepeŋ.

⁶ Tiinə jaaŋa taŋa, karman kəman yaŋ ada damdi kan gə minti aŋ ase kar gə guudiŋ wardaŋ ana, wə welɗe bəre'-bəre'i. Aduubə də jaaŋa daana agəjaŋ dəŋ, kar gə dədərgə waaɗe ɓəknə cəərə wəra. Kar teŋ, diri wəra kusri keɗe, tiini, kirki gəm.

⁷ Karman bə ajew bə adəwaldiŋ, duru haŋ googo, bə ɓasiŋ haŋ kormə kurki parway; bə soope diŋ haŋ hulum kisirki; bə waaɗeŋ haŋ marla bə faa-fe apəya cawi.

⁸ Kar té waaɗe'iŋ, mundu mundu mo də gəraŋ kənki, də dər wəra sar gəraŋ di keɗe, agal akera, agal taakawa gəm. Yə ge gudul saksaki, daaway də duugŋ keɗe minti: «*Cetcetiŋ, Cetcetiŋ, Cetcetiŋ, haa Barkaŋ Pepeŋ, Bar Səɓakiŋ, wə a jəŋ caw, wə hebkəna caw, wə bə bi yaŋ caw.»

⁹ Saksaki bə minti kar teŋ ge gudul bə tokɗe, bə əŋku səmu daana bə ji suuse a hulum bə minti bə əsə-isi cəərə jaaŋaŋaŋ, bə minti caw dədərgə bə faɗnə-faɗnaŋ,

¹⁰ kaa kəmtəŋ hor-hor ɓasi ciiri waaɗe'i gə tiinə kaŋ vaŋ də gigiiri tiinə hulum bə minti bə əsə-isi cəərə jaaŋaŋaŋ, bə ke awalna a hulum bə minti caw dədərgə bə faɗnə-faɗnaŋaŋ. Yə təkaŋ kaŋkəlaŋ neete wəra, yə vəənəy laki tiinə jaaŋaŋa bə waate minti:

¹¹ «Bar are, Pepeŋ, tam kir fele tokɗeŋ, aŋkeŋ daana səɓakiŋ. Gud maa mo, jəŋ kar keɗe haa tam, tam bəlaŋ minti yə jəə la zugi, yə máŋ zugi haa gud teŋa.»