VEƊE 3 - JAA TƏMARWAŊ

Kefter a kaa gə Tapi gə Sardəŋ

¹ «Jeerə kel teŋ la a *hulum bə digi kə Pepeŋ bə minti bə gole cəərə kaa kə Tapi gə Sardəŋaŋ minti: ‹Hulum bə Tiiru Seeɗa'a kə Pepeŋ, də seska seeɗa'aŋ kəəsuŋ bə waataŋa minti: Joŋre nəətiŋ də dərən, kaa ablaw bə ɗiki cəərəŋa haa minti aŋ dədərgə zugi, ana doloy ha'aŋ, aŋ wəra gə mee-me.

² Aŋ harə la bə guni wəra, kaayaŋ gə minti wəra maŋ bə meŋ, aŋ əyəy səɓaki la. Gud maa mo ten asaŋ minti ku joŋre nəətiŋ doŋ wəra kəm pisi tiinə Pepeŋa ba.

³ Cəərəŋ harə la bə ɗiki kel gə minti aŋ a fəlnəy daana aŋ a iskiniy. Aŋ doy la, aŋ kolə kerkeŋ la a baymele nəətiŋ. Jəəne minti aŋ haraŋ bə guni baŋ, ten bə tuli haa damdi hulum bə dəgaayaŋ ana, bay minti aŋ ase cəwa də minti ten hare da dərəŋ.

⁴ Səma, sərdə kaa yaŋ hiw Sardə ada, teŋ zodoŋ dəməəmə neeteŋ wəra ba. Kaa teŋ bə gəryi yaŋ dəərən də dəməəmə bərwaŋ siri gud maa mo, yə gə nakə-neke kir tere dəməəmə taŋ gud ɓeti neeteŋa.

⁵ Hulum bə minti pəŋ bulum neŋ, wə bə dere dəməəmə bərwaŋ taŋ yaŋ. Ten pəw səmu wəra giidə kefter bə dədərgəŋa ba. Ten bə waate səmu yaŋ wəra minti wə katən tiinə Barəna daana tiinə kaa kə digi nuutuŋaŋ gəm.

⁶ Tam hulum bə minti kosnom adaŋ, jeɓrə kel gə minti Tiiru Cetcetaŋ bə wəətiya a kaa kə Tapiŋ la pisi.›»

Kefter a kaa kə Tapi gə Filadelfiŋ

⁷ «Jeerə kel teŋ la a *hulum bə digi kə Pepeŋ bə minti bə gole cəərə kaa kə Tapi gə Filadelfiŋaŋ minti: ‹Hulum Cetcetiŋ, hulum bə Gəəzə-gəəziŋ, hulum bə minti lakəle bə ku kuli kə kumna *Davidiŋ kəəsuŋ, hulum bə minti wə bəŋəŋ ku kuli neŋ, hulum baalaŋ neke bə gisu ba; wə gisnu neŋ, hulum baalaŋ neke bə buŋu bə gəm, bə waataŋa minti:

⁸ Joŋre nəəti də dərən. Golə la, ten yaakənaŋ ku kuliŋ wəra bə bəŋə-biŋi tiiniŋa, hulum baalaŋ neke bə gisu ba. Wəra də dərən minti səɓaki dəŋ də kerpə-kerpe, də teŋ keɗe aŋ doŋ kel katən, aŋ maltaŋ kuŋ cəərəna ba.

⁹ Golə la, kaa té gə tapə-tepe ciiri kə *Sataŋ, kaa kə ŋete kel gə minti ji kusri minti té kaanə Ziwifi anaaŋa yə paapa kaanə Ziwifi baŋ, ten əyəy yaŋ kaasəŋa. Ten ji yaŋ kir minti yə ɗee la a feke də gigiiri tiiniŋa, kəya yə ase yaŋ minti ten bəlaŋ.

¹⁰ Aŋ doŋ kel nin də mi bə ku gəəliŋ tə bə moŋ, ten də kusrən, ten goloŋ cəərəŋ yaŋ də ko bə gəəli bə minti bə tuuki yaŋ cəərə kaŋa keɗe bə guluy kuɗiŋ.

¹¹ Ten maŋ bə tuli. Kel gə minti aŋ a duuniŋ, aŋ doy la kaasəŋa ŋəŋ kir minti hulum a bi a he werke bə bulum nəətiŋ wəra ba.

¹² Hulum bə minti pəŋ bulum neŋ, ten kulu yaŋ damdi larga də garə-gere giidə *Kuli kə Pep katəna bə daw kay ana, wə kele wəra hõy pəda anə hasi faɗi. Ten jiiru sam Pep katən yaŋ suru də sam Zeruzalem təmarwaŋ gəm, haa vil kə Pep katən də minti sorke warda apəy da sar Pepeŋ daŋ. Ten jiiru səman kimirwiŋ yaŋ suru gəm.

¹³ Tam hulum bə minti kosnom adaŋ, jeɓrə kel gə minti Tiiru Cetcetaŋ bə wəətiya a kaa kə Tapiŋ la pisi.›»

Kefter a kaa kə Tapi gə Lawdiseŋ

¹⁴ «Jeerə kel teŋ la a *hulum bə digi kə Pepeŋ bə minti bə gole cəərə kaa kə Tapi gə Lawdiseŋaŋ minti: ‹Hulum bə minti yə məntu *Amen, Bar kəkəy ɓeti daana bə gəəzə-gəəziŋ, hulum bə minti Pepeŋ jəŋ kar keɗe duuruŋ, bə waataŋa minti:

¹⁵ Joŋre nəətiŋ də dərən, minti aŋ paapa də cəwa ba, aŋ paapa gə arsə-arse bə gəm. Aŋ a jəə la də cəwa, kumundu ba gə arsə-arseŋ, a haa marya ɗaw!

¹⁶ Səma aŋ paapa də cəwa bə gəm, aŋ paapa gə arsə-arse bə gəm, aŋ lep-lepi tə bə moŋ, ten bə harsaŋ wəra!

¹⁷ Aŋ waate minti: «Áŋ də hurma, áŋ kotoŋ cəərə begeŋ wəra keɗe, áŋ paapa də caadə karman pəda.» Səma paapa də dərəŋ ba minti aŋ də caaca, də laawe, gə gayə-geye, gə bəwə-bəwi daana wəra gəlaanaŋ gəm.

¹⁸ Gud teŋa ta, ten waataŋ minti aŋ gusə kooso bə awəy-awəy bə yoorə-yoore pisiŋ la kaasəna kir minti aŋ kolə la kaa kə hurma. Aŋ gusə dəməəmə bərwaŋ la, bə tere sarəŋa kir minti kese bə gəlaanaŋ a jəŋ ba. Aŋ gusə gud kəɗaw gə dər la bə ke dərəŋa kir minti dərəŋ kolə la bə ase wəra pəsa.

¹⁹ Kaa gə minti ten bələy, ten hərtəy a kəkəya daana ten giliy gəm. Bədoona ana, aŋ harə la máŋ də cəwa bə ɗe guudəna daana aŋ kolə kerkeŋ la a baymele nəətiŋ.

²⁰ Aŋ golə la, ten bə əsə-isi ku kuliŋa, ten bə lete ku kuliŋa cəərəŋa minti ten kele na. Hulum bə minti əskənən dordən neŋ, wə bəŋəŋ ku kuli neŋ, ten kele girdu, are hame yaŋ də kumsi.

²¹ Hulum bə minti pəŋ bulum neŋ, ten əyu kəkəy yaŋ minti wə əsə la sarəna a jaaŋa də kumna katəna, damdi ten ɗeŋ a isi sar Barəna a jaaŋa də kumna nuutuŋa ana gəm adordə bə minti ten pəŋ bulum.

²² Tam hulum bə minti kosnom adaŋ, jeɓrə kel gə minti Tiiru Cetcetaŋ bə wəətiya a kaa kə Tapiŋ la pisi.›»