VEƊE 22 - JAA TƏMARWAŊ

¹ Kəya *hulum bə digi kə Pepeŋ bə minti a jəŋ bə waatan kela gaanan dərən cəərə kan gə paaŋe gə aye dədərgəŋa, diri anə yəŋəl-yəŋəl. Yə ãye warda haa gud jaaŋa də kumna kə Pepeŋ da də kə Kormə Taaməkaŋ.

² Wə ɓarsaŋ kəəsu ɓasi, aduubə di, a ko bə minti kəkəy bə vil tapte adaŋ, kəbaŋ gə aye dədərgəŋ ada gə garə-gere. Yə we a leŋa kampa hor cuuru ɓasi, yə we kampa məna a kitira, kusniŋ seerte gidiirə kaŋ wəra gəm.

³ Karman bə minti Pepeŋ jeme kəəti də kaŋ guuduŋ ji giidə vil taŋ na pəda. Jaaŋa də kumna kə Pepeŋ də kə Kormə Taaməkaŋ bə ji haa giidə. Kaa gə ji joŋreŋ a Pepeŋ bə kaw awalna yaŋ,

⁴ yə bə əsu yaŋ duru, səmu ji yaŋ bə jeerə-jeere tiini gəm.

⁵ Ko bə duugŋ bə ji pəda, yə bə ji də caadə pəɗaki də lampa daana də cəwa də wele koŋ bə gəm, gud bə minti Barkaŋ Pepeŋ mele pəɗaki nuutuŋ yaŋ ciiri. Yə bə hame kumnaŋ yaŋ bə faɗnə-faɗna.

Hare kə Yeesu daŋ

⁶ Kəya *hulum bə digi kə Pepeŋ waatənan minti: «Kel teŋ keɗe yə gəəzi, yə ɓeti. Gud maa mo Barkaŋ Pep bə minti a yaakaŋ kel nuutuŋ bə kalte wəra ku *kaa kə jogte ku miniŋaŋ, wə gaŋ hulum bə digi nuutuŋ minti wə ɗee la a ke gud kel gə minti wəra maŋ bə tuliŋ a kaa kə joŋre kə toŋ.»

⁷ Yeesu minti: «Aŋ jeɓrə la pisi! Ten wəra maŋ bə bi. Waaleŋ kə hulum bə minti humi kosoŋ cəərə kel gə minti kefter toŋ kay kənaŋ jugnuy.»

⁸ Ten Zaŋ əskəŋ kel teŋ, ten əsnəy də dərən. Kəya ten vaŋ də gəgəərən bə ke awalna a hulum bə digi bə minti a gaanan dərən cəərə kar teŋaŋ.

⁹ Səma wə waatənan minti: «A ji teŋ ba! Ten haa hulum bə joŋre damdi tam ana, damdi kumsum gə jogte ku mini kə Pepeŋ, də kaayaŋ gə minti jəŋ joŋreŋ də kel gə giidə kefter toŋ keɗe'iŋ ana gəm. Kaa awalna la haa a Pepeŋ!

¹⁰ Kel gə minti kefter toŋ jugnuy wəraŋ kəyaŋ, a doy gə metə-mete kay ba, gud maa mo hi bə minti yə de kuy yaŋ wəra duruŋ wəra maŋ.

¹¹ Hulum bə minti a bə jəəti baymeleŋaŋ raawə la bə jəwa, hulum bə minti paapa *cetceti baŋ raawə la bə ji paapa cetceti ba. Hulum bə minti wəra ɗeker, wə raawə la bə ji ɗeker nuutuŋa, hulum bə minti toŋ a wəra kə Pepeŋ, wə jəə la anə hoŋ wəra kə Pepeŋ gəm.»

¹² Yeesu minti: «Aŋ jeɓrə la pisi! Ten wəra maŋ bə bi. Ten bi haa də werke kə kaŋ kaasəna, ten werke mindi mindi mo haa də aŋar də joŋre bə minti wə a juunuŋ.

¹³ Ten haa Alfa, ten haa Omega, ten haa Hulum bə ajew daana Hulum bə adoroŋ, ten haa Mele bə gud koŋ daana Tewe bə koŋ gəm.»

¹⁴ Waaleŋ cəərə kaa gə minti baadaŋ dəməəmə neeteŋ wəraŋ kir minti yə falə kəkəy la bə ve aləw na ku kuli bə giidə vil na, bə ɗe a hame we də kəbaŋ gə aye dədərgəŋ.

¹⁵ Səma kaa gə minti jəəti kel gə zeɓə-zeɓeŋ, zal, booboŋ, awte titiŋ, ke awalna a kar gə minti yə guluy pepe neeteŋ, hataŋ kusri wəra bə ŋete kelaŋ, kaa teŋ keɗe yə yaake wəra tiilima.

¹⁶ Yeesu minti: «Ten Yeesu də kusrən, ten gaŋ hulum bə digiŋ bə ɗe a ke gud kar teŋ wəra a nəənəŋ, aŋ kaa kə Tapiŋ. Ten haa a kaasaw də gidiirə *Davidiŋa, Seska mooto də wele koŋ bəbəgiŋ.»

¹⁷ Tiiru Cetcetaŋ də mar Kormə Taaməkaŋ əsəŋ bə wəətu minti: «Bəəda!» Hulum bə minti əskəŋ kel teŋ neŋ, wə waatə la gəm minti: «Bəəda!». Hulum bə minti kinkin duunuŋ neŋ, wə bəəda. Hulum bə minti də caadə kan kə aye dədərgəŋ, wə bəəda a doy boobo faɗi.

Tewe bə kel

¹⁸ Ten Zaŋ, ten də waateŋ anə kaŋkaŋ sar hulum bə minti əskəŋ kel gə minti kefter toŋ kay kənaŋ jugnuy: hulum kəman gaŋ karman baalaŋ ne adaŋ, Pepeŋ gaw lasi də minti də jeerə-jeere giidə kefter toŋa kay kənaŋ cuuru.

¹⁹ Hulum bə minti haŋ karman ne wəra anə məna guudiŋ, Pepeŋ haw ku yaŋ wəra minti wə a kele giidə vil kə toŋa ba, wə a hame we də kəbaŋ gə aye dədərgəŋ bə gəm.

²⁰ Yeesu, hulum bə minti kaŋ gud kar teŋ wəraŋ, minti: «Gəəzi, ten wəra maŋ bə bi.» *Amen, Barkaŋ Yeesu, bəəda!

²¹ Pisi kə Barkaŋ Yeesu jəə la dəərəŋ keɗe. Amen.