VEƊE 21 - JAA TƏMARWAŊ

Ko bə apəya kimirwiŋ də seŋka təmarwaŋ

¹ Kəya ten asaŋ ko bə apəya kimirwiŋ də seŋka təmarwaŋ. Ko bə apəya bə ajew, seŋka də ajew daana kan kəmtəŋ, yə pa pəda.

² Kəya ten asaŋ vil kə Pepeŋ, Zeruzalem Təmarwaŋ bə sorke da warda apəy da sar Pepeŋ da. A pasa damdi tər də minti ɗampaŋ kusrə wəra bə de koŋkor ana.

³ Ten əskəŋ dordə karman kəman bə waate kel da koloŋ sar jaaŋa də kumnaŋ da minti: «Də ko toŋ hebkəna faɗi, Pepeŋ isi yaŋ aduubə də kaŋa, yə bə ji yaŋ kaa nuutu. Wə də kusru bə isi yaŋ diiri, wə bə ji yaŋ Pep neeteŋ gəm.

⁴ Wə bə sətəy kan kə diri yaŋ wəra keɗe. Meŋ bə ji pəda, laaweŋ, hageŋ, daana lasiŋ bə ji pəda gəm. gud maa mo kar gə dayday təwaŋ ne wəra.»

⁵ Kəya hulum bə cəərə jaaŋaŋ əsəŋ bə waate minti: «Aŋ golə la, ten haraŋ bə ji kara wəra kəmarwaŋ keɗe.» Wə waatənan minti: «Jeerə kel teŋ la gud maa mo kel katən haa kel kə gəəzi, yə haa kel ɓeti.»

⁶ Wə waatənan minti: «Ten doŋ ku kel ne wəra. Ten haa Alfa, ten haa Omega, Mele bə gud koŋ daana Tewe bə koŋ. Hulum bə minti kinkin duunu neŋ, ten əyu kan kə aye dədərgə gə minti ãye warda a ko diŋ daŋ yaŋ boobo faɗi.

⁷ Ten aye werke bə kar teŋ yaŋ a hulum bə minti pəŋ bulum neŋ. Ten bə ji yaŋ Pep nuutuŋ, wə bə ji yaŋ kormon gəm.

⁸ Kə kaa gə minti gəgan-gəgani a de neeteŋaŋ, gə bay deŋ, gə jəəti kel kə zeɓə-zeɓeŋ, gə minti awtaŋ titiŋ, gə booboŋ, gə jəəti zal, gə ke awalna a kar gə minti yə guluy pepe neeteŋ, daana gə ŋete kel keɗe, yə bə vay yaŋ a daŋgaya a ko bə cəwa də sufrə hərhəraŋa, haa me bə ɓasiŋ.»

Zeruzalem Təmarwaŋ

⁹ Kəya kumundu məna gud *kaa kə digi kə Pepeŋ seeɗa'iŋa gə minti a jəŋ wəra də taasə kəəsi bə ɗosə-ɗose də lasi də adoroŋ, bəŋ a waatan minti: «Bəəda, ten gam dərəm cəərə tər də minti Kormə Taaməkaŋ bə doora muruŋ.»

¹⁰ Kəya Tiiru Cetcetaŋ vaŋ cəərəna, hulum bə digiŋ kooroŋ warna dəərən a lewlew də pərki na anə tooto. Wə gaanan dərən cəərə Zeruzalema, vil kə Pepeŋ də minti bə ve da warda apəy da sar Pepeŋ da.

¹¹ A bə welɗe bəre'-bəre'a kas məyan kə Pepeŋ. Welɗe dəŋ damdi pərki pisi bə minti yə məntu «jaspəŋ» ana, wə seke anə həŋəl-həŋəl.

¹² Gulmun boblo kimpili wəra bə ɓəkə-ɓiki cəərə vil taŋa. Ku kuli bə camə-ceme ada hor cuuru ɓasi, kaa kə digi kə Pepeŋ wəra gə əstə-əsti ku kuli toŋa məna-məna hor cuuru ɓasi keɗe. Sam tanta də karmə kə *Israyel hor cəərə ɓasaŋ wəra də jeertə-jeerte məna-məna ku keɗe gəm.

¹³ Agəjaŋ də gulmun toŋa waaɗe keɗe, ku kuli bə camə-ceme ada: a gud koŋ na soope, a tiinə koŋ na soope, agal də goloŋ weete na soope, daana agal kə tamkaŋ na soope gəm.

¹⁴ Gud gulmun toŋ bə gaa-ge cəərə pərki hor cuuru ɓasi. Sam *kaa kə vaa-ve hor ciiri ɓasiŋ kə Kormə Taaməkaŋ wəra bə jeertə-jeerte cəərə pərki toŋa.

¹⁵ Hulum bə digi bə minti a bə waatan kelaŋ, karman bə ŋamte koŋ, haa seeka də ɗampə-ɗampe də kooso bə gusi awəy-awəy, yaŋ kəəsu bə ŋamte vil, ku kuli dəŋ, daana gulmun dəŋ gəm.

¹⁶ Vil taŋ agəjaŋ də wəra waaɗe keɗe gəga'-gəga'i. Hulum bə digiŋ ŋamtəna də seeka nuutuŋ. Agəjaŋ də məna'aŋ ŋamtaŋ kilewmeeter 2.400. Naaya taŋ wəra keɗe bədoona gəm. Tempəla də da apəyaŋ, ŋamtaŋ bədoona gəm.

¹⁷ Wə ŋamtaŋ gulmun gəm. Wə ŋəmtunu haa də karman bə minti kaŋ ŋamte kar diidəday duuruŋ. Wə ŋamtaŋ meeter 66.

¹⁸ Gulmun bə hərsə-hərsi də jaspəŋ, vil də hərsə-hərsi də kooso bə gusi awəy-awəy bə minti karman baalaŋ paapa duru baŋ, a seke anə həŋəl-həŋəl.

¹⁹ Pərki bə minti yə a gaŋ gud gulmun bə vil cuuruŋ, wə haa gidiirə pərki pis-pisiŋ keɗe. Pərki bə ajew haa «jaspəŋ», bə ɓasiŋ haa «safir», bə soopeŋ haa «agatiŋ», bə waaɗeŋ haa «emerodiŋ»,

²⁰ bə wiiɗiw haa «oniksəŋ», bə kənkiŋ haa «sardəwan», bə seeɗaŋ haa «kirsolitiŋ», bə azəgən haa «beril», bə tampəlaŋ haa «topaziŋ», bə hor haa «kirsoprasiŋ», bə hor cuuru məna'iŋ haa «hiyasantiŋ», bə hor cuuru ɓasiŋ haa «ametestiŋ».

²¹ Ku kuliŋ hor cuuru ɓasi keɗe wəra bə ɗampə-ɗampe də pərki gibirwi pisi, məna-məna keɗe. Giidə vil taŋa ha'aŋ, ko bə minti kəkəy tapte adaŋ bə ɗampə-ɗampe də kooso bə gusi awəy-awəy bə minti karman baalaŋ paapa duru baŋ, wə anə yəŋəl-yəŋəl.

²² Səma ten asaŋ kuli bə minti yə tokɗe Pepeŋ giiduŋ giidə vil taŋa ada ba, gud maa mo Barkaŋ Pep Bar Səɓakiŋ də Kormə Taaməkaŋ, koloŋ damdi kuli bə tokɗe Pepeŋ ana haa té faɗi.

²³ Vil paapa də caadə cəwa də wele koŋ kumundu ba də kitir minti yə walə koŋ la cəərə pəda, gud maa mo məyan kə Pepeŋ wele koŋ wəra, Kormə Taaməkaŋ welɗe damdi lampaŋ ana gəm.

²⁴ Gidiirə kaŋ bə ji máŋ haa zugi dər pəɗakiŋa, kəkamna gə cəərə seŋkaŋ bi yaŋ də hurma neeteŋ ada.

²⁵ Ku kuli naataŋ bə ji yaŋ wəra bə pəŋtə-pəŋti a hitiŋa saksaki. Yə gisu ku hõy ba gud bə minti duugŋ bə ji pəda.

²⁶ Yə bə pəəti yaŋ də kar kə məyan-məyan də hurma kə gidiirə kaŋ ada.

²⁷ Karman bə minti paapa cetceti baŋ bə kele giidə vil taŋ da ba, hulum bə minti jəəti dəgləŋ daana ŋete kel kele ada na bə gəm. Ve ada na haa kaa gə minti səməy a wəra gə jeerə-jeere giidə kefter bə dədərgə kə Kormə Taaməkaŋaŋ təwa'i.